അമേരിക്കൻ ശതകോടീശ്വരൻ ഇലോൺ മസ്കിന്റെ വൈദ്യുത വാഹന കമ്പനിയായ ടെസ്‌ല ഇന്ത്യയിലേക്ക്. കമ്പനിയുടെ ഇന്ത്യന്‍ വിഭാഗമായ ടെസ്‌ല ഇന്ത്യ മോട്ടോര്‍ ആന്‍ഡ് എനര്‍ജി പൂനെയിലെ വിമന്‍ നഗറിലെ പഞ്ച്ശീല്‍ ബിസിനസ് പാര്‍ക്കില്‍ ടെസ്‌ല ഓഫീസ് സ്‌പെയ്‌സ് വാടകയ്‌ക്കെടുത്തതായാണ് റിപ്പോർട്ടുകൾ.
11.65 ലക്ഷം രൂപയാണ് 5,850 ചതുരശ്ര അടിവിസ്തീര്‍ണമുള്ള ഓഫീസിന് പ്രതിമാസ വാടക നിശ്ചയിച്ചിട്ടുള്ളത്. ടെസ്‌ല ഇന്ത്യ മോട്ടോര്‍ ആന്‍ഡ് എനര്‍ജി പ്രൈവറ്റ് ലിമിറ്റഡ് ടേബിള്‍സ്‌പേസ് ടെക്‌നോളജീസ് പ്രൈവറ്റ് ലിമിറ്റഡുമായി അഞ്ച് വര്‍ഷത്തെ വാടക കരാര്‍ ഒപ്പു വച്ചതായാണ് റിപ്പോർട്ട്. ഒക്ടോബര്‍ ഒന്നിന് ഓഫീസ് കെട്ടിടം പ്രവര്‍ത്തമാരംഭിക്കും.
ഇന്ത്യൻ വാഹന വിപണിക്ക് യോജിച്ച വൈദ്യുത കാർ ഇന്ത്യയിൽ തന്നെ നിർമിക്കാനാണ് ടെസ്‌ല ശ്രമിക്കുന്നത്. മാത്രമല്ല, ഇവിടെ നിന്ന് കാറുകൾ കയറ്റി അയക്കാനും ടെസ്‌ലയ്ക്ക് പദ്ധതിയുണ്ട്. ഇന്ത്യയിൽ നിർമിക്കുന്ന ടെസ്‌ലയ്ക്ക് ഏകദേശം 20 ലക്ഷം രൂപ വില വരുമെന്നാണ് പ്രതീക്ഷിക്കുന്നത്.
2021 ജനുവരിയിൽ ടെസ്‌ലയുടെ ഇന്ത്യൻ വിഭാഗം ബെംഗളൂരുവിൽ രജിസ്റ്റർ ചെയ്തിരുന്നു. എന്നാൽ പിന്നീട് പ്രവർത്തനങ്ങൾ ഒന്നും നടന്നിരുന്നില്ല. കഴിഞ്ഞ ജൂണില്‍ പ്രധാനമന്ത്രി നരേന്ദ്രമോദിയുമായി ഇലോൺ മസ്‌ക് കൂടികാഴ്ച നടത്തിയിരുന്നു. പദ്ധതി യാഥാര്‍ത്ഥ്യമായാൽ ഇന്ത്യയിലെ വൈദ്യുത കാര്‍ വിപണിയില്‍ ശക്തമായ മത്സരത്തിനാണ് കളമൊരുങ്ങുക.
ഇലക്ട്രോണിക്‌സ്, ഓട്ടോമൊബൈല്‍, ഇലക്ട്രിക്ക് വാഹനങ്ങൾ, എന്‍ജിനിയറിങ് തുടങ്ങി 4,000 ലധികം നിര്‍മാണ സംരംഭങ്ങള്‍ ഉള്ള ഏഷ്യയിലെ ഏറ്റവും വലിയ വ്യാവസായിക ഹബ്ബുകളിൽ ഒന്നാണ് പുണെ.