ഇന്ത്യയിൽ ഏറ്റവും കൂടുതൽ വിറ്റഴിക്കപ്പെടുന്ന കോംപാക്ട് സെഡാനായ മാരുതി സുസുക്കി ഡിസയറിന്റെ പുത്തൻ പതിപ്പ് വിപണിയിൽ അവതരിച്ചു. വില ഉൾപ്പെടെയുള്ള വിശദവിവരങ്ങളും പുറത്തുവിട്ടിട്ടുണ്ട്. ക്രാഷ് ടെസ്റ്റ് റിസൾട്ട് കൂടി പുറത്തു വന്നതോടെ വാഹനത്തിന്റെ വില കാത്തിരിക്കാനും കാരണമായി. LXI, VXI, ZXI, ZXI+ എന്നീ 4 വേരിയന്റ് ലെവലുകളിൽ വരുന്ന ഡിസയറിന് 6.79 ലക്ഷം മുതൽ 10.14 ലക്ഷം രൂപ വരെയാണ് ഇന്ത്യയിൽ മുടക്കേണ്ടി വരുന്ന എക്സ്ഷോറൂം വില. 2024 ഡിസംബർ 31 വരെ ബുക്ക് ചെയ്യുന്നവർക്ക് മാത്രമായിരിക്കും ഈ വിലയിൽ ലഭിക്കുക എന്നും കമ്പനി അറിയിച്ചിട്ടുണ്ട്.
പെട്രോൾ എഞ്ചിനുമായി വരുന്ന ഡിസയർ LXi മാനുവലിന് 6.79 ലക്ഷം, VXi മാനുവലിന് 7.79 ലക്ഷം, VXi എഎംടിക്ക് 8.24 ലക്ഷം, ഡിസയർ ZXi മാനുവൽ 8.89 ലക്ഷം, ZXi എഎംടിക്ക് 9.34 ലക്ഷം, ZXi+ മാനുവലിന് 9.69 ലക്ഷം, ZXi+ എഎംടിക്ക് 10.14 ലക്ഷം എന്നിങ്ങനെയാണ് ഡിസയറിന് വില മുടക്കേണ്ടി വരുന്നത്. സിഎൻജി ഓപ്ഷനുമായി ഡിസയർ VXi, ZXi എന്നിങ്ങനെ രണ്ട് വേരിയന്റുകളിൽ വാങ്ങാനാകും. ഇവയ്ക്ക് യഥാക്രമം 8.74 ലക്ഷം, 9.84 ലക്ഷം എന്നിങ്ങനെയാണ് എക്സ്ഷോറൂം വില വരുന്നത്. പുതിയ ഡിസയറിന് 3,995 മില്ലീമീറ്റർ നീളവും 1,735 മില്ലീമീറ്റർ വീതിയും 1,525 മില്ലീമീറ്റർ ഉയരവും 2,450 മില്ലീമീറ്റർ വീൽബേസും 163 മില്ലീമീറ്റർ ഗ്രൗണ്ട് ക്ലിയറൻസുമാണുള്ളത്.
നിലവിലെ മോഡലിൽ നിന്ന് വ്യത്യസ്തമായി അൽപ്പം ബോക്സി ഡിസൈനോടുകൂടിയ ലുക്ക് ആയിരിക്കും പുതിയ ഡിസയറിന് നൽകുക. സ്വിഫ്റ്റിൽ നൽകിയതിന് സമാനമായ പ്രൊജക്ഷൻ എൽഇഡി ഹെഡ്‌ലൈറ്റും എൽ ഷേപ്പ് ഡിആർഎല്ലും ചേർന്ന ഹെഡ്‌ലാമ്പ് യൂണിറ്റ്, ക്രോമിയം ആവരണം നൽകുന്ന റേഡിയേറ്റർ ഗ്രില്ല്, പുതുമയുള്ള ബമ്പർ എന്നിവയായിരിക്കും മുൻഭാഗത്ത് പ്രതീക്ഷിക്കണ്ട മാറ്റങ്ങൾ. അലോയ് വീലിലായിരിക്കും വശങ്ങളിലെ മാറ്റം കാണാനാവുക. പിന്നിലെ ബമ്പറിലും റെയിൽ ലാമ്പിലും പുതുമ നൽകാൻ സാധ്യതയുണ്ട്.
360 ഡിഗ്രി ക്യാമറ, വയർലെസ് ആപ്പിൾ കാർപ്ലേ, ആൻഡ്രോയിഡ് ഓട്ടോ എന്നിവയുള്ള വലിയ 9 ഇഞ്ച് ഇൻഫോടെയ്ൻമെന്റ് സിസ്റ്റം, വയർലെസ് ചാർജർ, ഹെഡ്-അപ്പ് ഡിസ്പ്ലേ, ഓട്ടോമാറ്റിക് ക്ലൈമറ്റ് കൺട്രോൾ എന്നിവയാണ് പുതിയ കാറിൽ പ്രതീക്ഷിക്കുന്ന മറ്റ് സവിശേഷതകൾ. ഇതിന് 4.2 ഇഞ്ച് ഡിജിറ്റൽ എംഐഡി ഉള്ള ഒരു അനലോഗ് ഇൻസ്ട്രുമെന്റ് ക്ലസ്റ്റർ ഉണ്ടായിരിക്കും.
സ്റ്റാൻഡേർഡായി 6 എയർബാഗുകൾ, ഇലക്‌ട്രോണിക് സ്റ്റബിലിറ്റി പ്രോഗ്രാം, ഹിൽ ഹോൾഡ് കൺട്രോൾ, ഓട്ടോ ക്ലൈമറ്റ് കൺട്രോൾ, റിയർ പാർക്കിംഗ് സെൻസറുകൾ, റിവേഴ്സ് ക്യാമറ എന്നിവ ലഭിച്ചേക്കും. ഉയർന്ന വേരിയന്റുകൾക്ക് ADAS ലഭിക്കുമെന്നും ചില റിപ്പോർട്ടുകൾ സൂചിപ്പിക്കുന്നു. ഇന്റീരിയറിൽ ബീജ് അപ്ഹോൾസ്റ്ററി, ഡാർക്ക് കളർ ഡാഷ്ബോർഡ് തീം എന്നിവയും ഉൾപെടുന്നുണ്ട്. സെഗ്‌മെന്റിൽ ആദ്യമായി സിംഗിൾ പേൻ സൺറൂഫ് കൊണ്ടു വരുന്ന മോഡലായിരിക്കും ഡിസയർ എന്നാണ് സ്‌പൈ ചിത്രങ്ങൾ സൂചിപ്പിക്കുന്നത്.
Read more
മാരുതി സുസുക്കി ആദ്യമായി സ്വിഫ്റ്റിൽ നൽകിയ Z സീരീസ് എൻജിനായിരിക്കും ഡിസയറിലും നൽകുക. ഇസഡ് സീരീസ് 1.2 ലിറ്റർ മൂന്ന് സിലിണ്ടർ പെട്രോൾ എൻജിനാണ് പുതിയ സ്വിഫ്റ്റിൽ നൽകിയിട്ടുള്ളത്. ഈ എൻജിൻ 80.4 ബിഎച്ച്പി കരുത്തും പവറും 111.7 എൻഎം ടോർക്കുമാണ് ഉത്പാദിപ്പിക്കുന്നത്. അഞ്ച് സ്പീഡ് മാനുവലിനൊപ്പം എജിഎസ് ഓട്ടോമാറ്റിക്കുമാണ് ഈ വാഹനത്തിൽ ട്രാൻസ്മിഷൻ ഒരുക്കുന്നത്. ഉയർന്ന ഇന്ധനക്ഷമതയായിരിക്കും വാഹനത്തിന്റെ ഹൈലൈറ്റ്. വിപണിയിൽ ഹ്യുണ്ടായ് ഓറ, ഹോണ്ട അമേസ്, ടാറ്റ ടിഗോർ തുടങ്ങിയ കാറുകളോടാണ് ഡിസയറിന്റെ മത്സരം.
