പ്രമുഖ വൈദ്യുത ഇരുചക്ര വാഹന നിർമ്മാതാക്കളായ ഏഥർ എനർജി വില കുറഞ്ഞ മോഡൽ ഉൾപ്പടെ മൂന്ന് പുത്തൻ മോഡലുകൾ വിപണിയിലിറക്കി. ഉപയോക്താക്കൾ ഏറെക്കാലമായി കാത്തിരുന്ന 450എസും 450 എക്‌സിന്റെ പരിഷ്‌കരിച്ച രണ്ട് പതിപ്പുകളുമാണ് എത്തിയിരിക്കുന്നത്.
ഏഥർ 450 എസ് ഇലക്ട്രിക്ക് സ്കൂട്ടറിന് 2.9 kWh ബാറ്ററിയാണ് കരുത്ത് പകരുന്നത്. ഫുൾ ചാർജ് ചെയ്താൽ വാഹനം 115 കിലോമീറ്റർ വരെ റേഞ്ച് നൽകുമെന്നാണ് കമ്പനിയുടെ അവകാശവാദം. 40 കിലോമീറ്റർ വരെ വേഗത്തിലെത്താൻ 3.9 സെക്കൻഡ് മാത്രമാണ് വാഹനത്തിന് വേണ്ടി വരുന്നത്. മണിക്കൂറിൽ 90 കിലോമീറ്ററാണ് ഏഥർ 450എസ് സ്കൂട്ടറിന്റെ ഉയർന്ന വേഗത. 5.4 kW പീക്ക് പവറിൽ പരമാവധി 22 എൻഎം ടോർക്ക് വരെ വികസിപ്പിക്കാനും ഈ എൻട്രി ലെവൽ മോഡലിന് സാധിക്കും.
ഡീപ്‌വ്യൂ TM ഡിസ്‌പ്ലേ, പുതിയ സ്വിച്ച് ഗിയർ, എമർജൻസി സ്റ്റോപ്പ് സിഗ്നൽ, 7 ശതമാനം വരെ റേഞ്ച് മെച്ചപ്പെടുത്തുന്ന കോസ്റ്റിംഗ് റീജൻ എന്നിവയുൾപ്പെടെ നിരവധി പുതുമകളോടെയാണ് വാഹനം വരുന്നത്. ഏഥർ 450 എക്സ് സ്കൂട്ടർ 2.9 kWh ബാറ്ററി വേരിയന്റിലും 3.7 kWh ബാറ്ററി വേരിയന്റിലും ലഭ്യമാകും. ഇവ യഥാക്രമം 111 കിലോമീറ്റർ,150 കിലോമീറ്റർ റേഞ്ച് നൽകുന്നു. 17. 78 ഇഞ്ച് ടച്ച്സ്ക്രീനാണ് വാഹനത്തിലുള്ളത്. റൈഡ് അസിസ്റ്റ്, ഏഥർ ബാറ്ററി പ്രൊട്ടക്റ്റ്, ഏഥർ സ്റ്റാക്ക് അപ്ഡേറ്റുകൾ, ഏഥർ കണക്റ്റ് എന്നിവയും ഈ വാഹനത്തിലുണ്ട്.
ഏഥർ 450എസ്, 450എക്സ് എന്നീ ഇലക്ട്രിക് സ്കൂട്ടറുകളിൽ പുതിയ സ്വിച്ച് ഗിയർ, മെച്ചപ്പെട്ട ടച്ച് എക്സ്പീരിയൻസ്, രണ്ട് പുതിയ സ്വിച്ചുകളുമുണ്ട്. വൺ-ക്ലിക്ക് റിവേഴ്സ്, ജോയ്സ്റ്റിക്കാണ് സ്കൂട്ടറുകളിലെ മറ്റൊരു സവിശേഷത. പുതിയ ഫാൾ സേവ് ഫീച്ചറാണ് ഏഥർ സ്കൂട്ടറുകളിലെ മറ്റൊരു പ്രധാന അപ്ഗ്രേഡ്.
450 എസിൻറെ വില 1.30 ലക്ഷം രൂപയാണ്. 450 എക്സിൻറെ 2.9 kWh പതിപ്പിന് 1,38,000 രൂപയും 3.7 kWh പതിപ്പിന് 1.45 ലക്ഷം രൂപയുമാണ് എക്‌സ്‌ഷോറൂം വില വരുന്നത്. ഏഥറിന്റെ ഔദ്യോഗിക വെബ്സൈറ്റിൽ 450S, 450X എന്നിവയ്ക്കുള്ള ബുക്കിങ് ഇതിനകം ആരംഭിച്ചു കഴിഞ്ഞു.