നിസ്സാന്‍ മൈക്രയുടെ പിന്മുറക്കാരനായി ഇലക്ട്രിക് മോഡല്‍ എത്തുന്നു. ഒരു ഐ സി ഇ മോഡലിന് പകരം പ്യുവര്‍ ഇലക്ട്രിക് മോഡലാവും മൈക്രയുടെ പകരക്കാരനായി എത്തുക. ഇതിന് മുന്നോടിയായി പുതിയ മോഡലിനെ ഒരു ടീസര്‍ ഇപ്പോള്‍ നിസ്സാന്‍ പുറത്തിറക്കിയിരിക്കുകയാണ്. റിപ്പോര്‍ട്ടുകള്‍ പ്രകാരം പുറത്തിറങ്ങുന്ന പുതിയ മോഡല്‍ ഹാച്ച്ബാക്ക് CMF-BEV എന്ന പുതിയ പ്ലാറ്റ്ഫോമിനെ അടിസ്ഥാനമാക്കിയുള്ളതായിരിക്കും. അത് റെനോ-നിസാന്‍-മിത്സുബിഷി അലയന്‍സ് സഹകരിച്ച് വികസിപ്പിച്ചെടുക്കും. കൂടുതല്‍ വിവരങ്ങള്‍ കമ്പനി പുറത്തുവിട്ടിട്ടില്ല. പുതിയ വാഹനത്തിനെ സംബന്ധിച്ചുള്ള മറ്റുവിവരങ്ങളും നിസാന്‍ രഹസ്യമായി വച്ചിരിക്കുകയാണ്.
ഇപ്പോള്‍ പുറത്തിറങ്ങിയിരിക്കുന്ന വീഡിയോയില്‍ നിന്നും വാഹനം ഒരു വലിയ റൗണ്ട് ഡേടൈം റണ്ണിംഗ് എല്‍ഇഡി ഡിആര്‍എല്ലുള്ള ഒരു ചെറിയ സിറ്റി സിപ്പര്‍ ഹാച്ച്ബാക്ക് ആണെന്ന് മനസിലാക്കാം. അതോടൊപ്പം നിസാന്റെ ഇല്യുമിനേറ്റഡ് ലോഗോയും കാണാം. വാഹനത്തിന്റെ പേരോ മറ്റു കാര്യങ്ങളോ നിര്‍മാതാക്കള്‍ വെളിപ്പെടുത്താന്‍ തയ്യാറായിട്ടില്ല.
ഈ പുതിയ മോഡല്‍ നിസാന്‍ രൂപകല്‍പ്പന ചെയ്യുകയും തങ്ങളുടെ പുതിയ കോമണ്‍ പ്ലാറ്റ്ഫോം ഉപയോഗിച്ച് റെനോ എഞ്ചിനീയറിംഗ് ചെയ്യുകയും നിര്‍മ്മിക്കുകയും ചെയ്യും എന്ന് പ്രഖ്യാപന വേളയില്‍ നിസാന്‍ ചീഫ് ഓപ്പറേറ്റിംഗ് ഓഫീസര്‍ അശ്വനി ഗുപ്ത അറിയിച്ചു. ഇത് തങ്ങളുടെ അലയന്‍സ് അസറ്റുകളുടെ ഉപയോഗം പരമാവധി പ്രയോജനപ്പെടുത്തുന്നുവെന്നും അദ്ദേഹം കൂട്ടിച്ചേര്‍ത്തു. മാത്രമല്ല തങ്ങളുടെ ഐതിഹാസികമായ മൈക്രയെ മാറ്റി സ്ഥാപിക്കുന്ന, ഈ പുതിയ മോഡല്‍ യൂറോപ്പിലെ തങ്ങളുടെ ഉപഭോക്താക്കള്‍ക്ക് കൂടുതല്‍ ആവേശം നല്‍കുമെന്ന് തനിക്ക് ഉറപ്പുണ്ട് എന്നും ഗുപ്ത വ്യക്തമാക്കി.
ഈ പുതിയ പ്ലാറ്റ്ഫോം റെനോ സോയും നിസാന്‍ ലീഫും ഉപയോഗിക്കുന്ന നിലവിലെ പ്ലാറ്റ്ഫോമിന് പകരമാകുമെന്നും ചെലവ് ഏകദേശം 33 ശതമാനം കുറയ്ക്കാനും വൈദ്യുതി ഉപഭോഗം 10 ശതമാനം കുറയ്ക്കാനും കഴിയുമെന്നും മെര്‍ജ്ഡ് അസോസിയേഷന്‍ സ്ഥിരീകരിച്ചിട്ടുണ്ട്. വരാനിരിക്കുന്ന മോഡല്‍ നിസാന്റെ എന്‍ട്രി ലെവല്‍ മോഡല്‍ എന്ന നിലയിലായിരിക്കും വിപണിയിലെത്തുക. വാഹനത്തിന്റെ എഞ്ചിനീയറിംഗും നിര്‍മ്മാണവും അലയന്‍സ് പങ്കാളിത്തമുള്ള ഫ്രഞ്ച് വാഹന നിര്‍മ്മാതാക്കളായ റെനോയുടെ ഫ്രാന്‍സിലെ ഇലക്ട്രിസിറ്റി പ്ലാന്റില്‍ നടത്തുമെന്നാണ് അറിയുന്നത്. അങ്ങനെയാണെങ്കില്‍ 2024 ല്‍ ഈ മോഡല്‍ വിപണിയില്‍ പ്രതീക്ഷിക്കാം.