അടുത്ത രണ്ടോ മൂന്നോ വർഷത്തിനുള്ളിൽ ഇന്ത്യയിൽ നാല് പുതിയ എസ്‌യുവികൾ വരെ അവതരിപ്പിക്കാൻ പദ്ധതിയിടുകയാണ് ടൊയോട്ട കിർലോസ്‌കർ മോട്ടോർ (ടികെഎം). മാരുതി സുസുക്കിയുടെ ഇ വിറ്റാരയുടെ പ്ലാറ്റ്‌ഫോമിനെ അടിസ്ഥാനമാക്കിയുള്ള ഒരു ഓൾ-ഇലക്ട്രിക് എസ്‌യുവി ഇവയിൽ ശ്രദ്ധേയമായ ഒരു കൂടി ചേർക്കൽ ആയിരിക്കും. അടുത്ത വർഷം അവസാന പകുതിയോടെ അരങ്ങേറ്റം കുറിക്കുന്ന ഈ ഇലക്ട്രിക് മോഡൽ ടൊയോട്ടയുടെ കയറ്റുമതി തന്ത്രത്തിൻ്റെ ഭാഗമായി അന്താരാഷ്ട്ര വിപണികളെ ലക്ഷ്യമിട്ടുകൊണ്ടാണ് എത്തുക.
ടൊയോട്ട അതിൻ്റെ ഇലക്ട്രിക് മിഡ്‌സൈസ് എസ്‌യുവി അനാച്ഛാദനം ചെയ്യുന്നതിന് മുമ്പ്, ഇന്ത്യൻ വിപണിക്ക് അനുയോജ്യമായ രണ്ട് പുതിയ ഹൈബ്രിഡ് എസ്‌യുവികൾ പുറത്തിറക്കാനും സാധ്യതയുണ്ട്. കൂടാതെ ഫോർച്യൂണറിന് താഴെയുള്ള ഒരു പുതിയ ഓഫ്-റോഡ് എസ്‌യുവിയും വാഹന നിർമ്മാതാവ് അവതരിപ്പിച്ചേക്കാം.
ടൊയോട്ട eSUV: 2025 ൻ്റെ അവസാന പകുതിയിൽ അരങ്ങേറ്റം കുറിക്കുന്ന മിഡ്‌സൈസ് ഇലക്ട്രിക് എസ്‌യുവി കഴിഞ്ഞ വർഷം അനാച്ഛാദനം ചെയ്ത അർബൻ എസ്‌യുവി കൺസെപ്റ്റിൽ നിന്നുള്ള ഡിസൈൻ ഉൾക്കൊള്ളും. ആധുനികവും എയറോഡൈനാമിക് സ്റ്റൈലിംഗും ഇതിൽ ഉൾക്കൊള്ളും. ഇത് 550 കിലോമീറ്റർ വരെ ഡ്രൈവിംഗ് ശ്രേണി വാഗ്ദാനം ചെയ്യുമെന്നാണ് പ്രതീക്ഷിക്കുന്നത്. 27PL പ്ലാറ്റ്‌ഫോമിൻ്റെ പരിഷ്‌ക്കരിച്ച പതിപ്പിൽ നിർമ്മിച്ച എസ്‌യുവി സിംഗിൾ, ഡ്യുവൽ ഇലക്ട്രിക് മോട്ടോർ കോൺഫിഗറേഷനുകൾക്കുള്ള ഓപ്ഷനുകളോടെയാണ് വരുന്നത്.
പുതിയ ടൊയോട്ട ഫോർച്യൂണർ : ഇതിനകം നിരവധി അന്താരാഷ്ട്ര വിപണികളിൽ ലഭ്യമായ MHEV ടൊയോട്ട ഫോർച്യൂണർ 48-വോൾട്ട് മൈൽഡ്-ഹൈബ്രിഡ് സിസ്റ്റമാണ് ഉൾക്കൊള്ളുന്നത്. 2.8L ഫോർ-സിലിണ്ടർ GD സീരീസ് ഡീസൽ എഞ്ചിനുമായി ജോടിയാക്കുമ്പോൾ ഇന്ധനക്ഷമത മെച്ചപ്പെടുത്തുകയും എമിഷൻ കുറയ്ക്കുകയും ചെയ്യുന്നു. ഈ സജ്ജീകരണം ആക്സിലറേഷൻ സമയത്തും ലോ-സ്പീഡ് ഡ്രൈവിംഗിലും പ്രകടനം വർദ്ധിപ്പിക്കുന്നു. അതേസമയം, പുതിയ ടർബോ പെട്രോൾ എഞ്ചിൻ അവതരിപ്പിക്കാൻ സാധ്യതയുള്ള അടുത്ത തലമുറ ഫോർച്യൂണർ വികസനത്തിലാണ്.
7-സീറ്റർ ടൊയോട്ട ഹൈറൈഡർ: മൂന്ന് നിരകളുള്ള ടൊയോട്ട അർബൻ ക്രൂയിസർ ഹൈറൈഡർ 2025-ൻ്റെ തുടക്കത്തിനും മധ്യത്തിനുമിടയിൽ വിപണിയിലെത്തുമെന്ന് പ്രതീക്ഷിക്കുന്നു. ഇത് മത്സരാധിഷ്ഠിത മിഡ്‌സൈസ് എസ്‌യുവി സെഗ്‌മെൻ്റിലേക്ക് പ്രവേശിയ്ക്കും. MG ഹെക്ടർ പ്ലസ്, ടാറ്റ സഫാരി, മഹീന്ദ്ര XUV700, സിട്രോൺ C3 എയർക്രോസ്, ഹ്യൂണ്ടായ് അൽകസാർ തുടങ്ങിയ എതിരാളികളോട് ഈ മോഡൽ മത്സരിക്കും. 1.5 L മൈൽഡ്-ഹൈബ്രിഡ്, 1.5 L സ്ട്രോംഗ്-ഹൈബ്രിഡ് പെട്രോൾ എഞ്ചിനുകൾ ഉൾപ്പെടെ നിലവിലുള്ള പവർട്രെയിൻ ഓപ്ഷനുകൾ നിലനിർത്തിക്കൊണ്ട് പുതിയ പതിപ്പ് പുതുക്കിയ സ്റ്റൈലിംഗും മെച്ചപ്പെടുത്തിയ ഫീച്ചർ സെറ്റും ഉൾപ്പെടുത്തും. 5 സീറ്റർ വേരിയൻ്റിൽ ലഭ്യമായ AWD കോൺഫിഗറേഷൻ മൂന്ന് വരി മോഡലിലും നൽകുമോ എന്നത് കണ്ടറിയണം.
ടൊയോട്ട മിനി ഫോർച്യൂണർ: ടൊയോട്ട, IMV 0 പ്ലാറ്റ്‌ഫോമിനെ അടിസ്ഥാനമാക്കി, ഫോർച്യൂണറിൻ്റെ കൂടുതൽ ഒതുക്കമുള്ള പതിപ്പ് ഉടൻ തന്നെ തായ്‌ലൻഡിൽ നിർമ്മിക്കാൻ ഒരുങ്ങുകയാണ് എന്നാണ് റിപോർട്ടുകൾ സൂചിപ്പിക്കുന്നത്. ഈ പുതിയ എസ്‌യുവി ഹൈലക്‌സ് ചാമ്പുമായി വിവിധ ഘടകങ്ങൾ പങ്കിടും. പൂർണ്ണ വലിപ്പമുള്ള ഫോർച്യൂണറിന് ചെലവ് കുറഞ്ഞ ബദൽ വാഗ്ദാനം ചെയ്യുന്നതിനായി രൂപകൽപ്പന ചെയ്തിരിക്കുന്ന ഈ മോഡൽ ഭാവിയിൽ ടൊയോട്ട ഇന്ത്യൻ വിപണിയിൽ കൊണ്ടു വന്നേക്കുമെന്നാണ് കരുതുന്നത്.