Connect with us
https://southlive.in/wp-content/uploads/2018/08/728-x-90-pix.jpg

AUTOMOBILE

‘സ്വര്‍ഗ്ഗ കവാട’ത്തിലേക്ക് കുതിച്ചു കയറി റേഞ്ച് റോവര്‍, അമ്പരപ്പ് മാറാതെ വാഹന പ്രേമികള്‍!

, 2:20 pm

ചൈനയിലെ ടിയാനെന്‍മെന്‍ മലനിരകള്‍ ലോകത്തിനു മുഴുവന്‍ ഒരു അത്ഭുതക്കാഴ്ച്ചയാണ്. 99 ചെങ്കുത്തായ വളവുകള്‍, 999 പടവുകള്‍ ചൈനയിലെ ഹുനാന്‍ പ്രവിശ്യയിലുള്ള ഹെവന്‍സ് ഗേറ്റ് സാഹസിക യാത്രികരുടെ പറുദീസയാണ്. നാല്‍പത്തഞ്ചു ഡിഗ്രി ചെരിവില്‍ കൊത്തിവെച്ച അറ്റമില്ലാത്ത പടവുകളെ നോക്കുമ്പോള്‍ തന്നെ ആരുടെയും മനസ് ഒന്നു പതറും. എന്നാല്‍ സ്വര്‍ഗകവാടത്തിന്റെ നെറുകയിലേക്ക് റേഞ്ച് റോവര്‍ സ്പോര്‍ട് ഓടിച്ചു കയറ്റിയ ഹോപിന്‍ തുങിനെ പക്ഷേ ആ ഭയമലട്ടിയില്ല, കൈവിറച്ചതുമില്ല. തന്റെ ഉദ്യമം വിജയം കണ്ടപ്പോള്‍ സ്വര്‍ഗ്ഗകവാടം തുറന്നെത്തിയ മാലാഖയെപ്പോലെന്നവണ്ണം ഹോപിന്‍ തുങ് പുഞ്ചിരി തൂകി.

11.26 കിലോമീറ്റര്‍ ദൂരം നീളുന്ന ഡ്രാഗണ്‍ റോഡ് പാതയില്‍ നിന്നുമാണ് റേഞ്ച് റോവര്‍ സ്പോര്‍ടിന്റെ ‘സ്വര്‍ഗ്ഗയാത്രയ്ക്ക്’ തുടക്കം. വിഖ്യാത പാനസോണിക് ജാഗ്വാര്‍ റേസര്‍ ഹോപിന്‍ തുങാണ് ഈ യാത്രയില്‍ റേഞ്ച് റോവറിന്റെ വളയം പിടിച്ചത്. റേഞ്ച് റോവറിന്റെ പ്ലഗ് ഇന്‍ ഹൈബ്രിഡ് മോഡലായ പി400ഇ ആണ് അഭ്യാസത്തിന് ഉപയോഗിച്ചത്. 404 പിഎസ് കരുത്തുള്ള ഈ വാഹനം അനയാസം 999 സ്റ്റെപ്പുകളിലൂടെ കുതിച്ചു പാഞ്ഞു. ഫോര്‍മുല ഇ, ഫോര്‍മുല വണ്‍, ലെ മാന്‍സ് തുടങ്ങിയ മത്സരങ്ങളില്‍ പങ്കെടുത്തിട്ടുണ്ടെങ്കിലും ഇത്ര സാഹസികത നിറഞ്ഞ ഡ്രൈവിംഗ് ചലഞ്ച് ഇതാദ്യമായിട്ടാണെന്ന് ഹോപിന്‍ തുങ് പറഞ്ഞു.

റേഞ്ച് റോവര്‍ സ്പോര്‍ട് ഹൈബ്രിഡ് മോഡലിന്റെ പ്രചാരണാര്‍ത്ഥം ലാന്‍ഡ് റോവര്‍ നടത്തി വരുന്ന അഡ്വഞ്ചര്‍ ക്യാമ്പയിന്റെ ഏറ്റവും ഒടുവിലത്തെ അധ്യായമാണ് ഡ്രാഗണ്‍ റോഡ് ചലഞ്ച്. ഹെവന്‍സ് ഗേറ്റ് കീഴടക്കുന്ന റേഞ്ച് റോവര്‍ സ്പോര്‍ടിന്റെ വീഡിയോ ഇന്റര്‍നെറ്റില്‍ വൈറലായി കഴിഞ്ഞു. രണ്ട് ലിറ്റര്‍ പെട്രോള്‍ എന്‍ജിനും 116 പിഎസ് കരുത്തുള്ള ഇലക്ട്രിക് മോട്ടറും ഉപയോഗിക്കുന്ന വാഹനത്തിന്റെ പരമാവധി കരുത്ത് 404 പിഎസും ടോര്‍ക്ക് 640 എന്‍എമ്മുമാണ്.

Advertisement