ഇന്ത്യന്‍ വാഹന വിപണിയില്‍ വാങ്ങാനാളില്ലാതെ ഷോറൂമുകളില്‍ കെട്ടിക്കിടക്കുന്നത് 8 ലക്ഷത്തോളം കാറുകള്‍. ഫെഡറേഷന്‍ ഓഫ് ഓട്ടോമൊബൈല്‍ ഡീലേഴ്‌സ് അസോസിയേഷന്റെ റിപ്പോര്‍ട്ട് പ്രകാരം 79,000 കോടി രൂപയുടെ 8 ലക്ഷം കാറുകളാണ് ഷോറൂമുകളിലും വെയര്‍ഹൗസുകളിലുമായി കെട്ടിക്കിടക്കുന്നത്.
ഇന്ത്യന്‍ കാര്‍ വിപണി ആദ്യമായാണ് ഇത്തരം ഒരു പ്രതിസന്ധി നേരിടുന്നതെന്നാണ് കാര്‍ ഡീലര്‍മാര്‍ പറയുന്നത്. കടുത്ത സാമ്പത്തിക പ്രതിസന്ധിയിലൂടെയാണ് രാജ്യത്തെ കാര്‍ ഡീലര്‍മാര്‍ കടന്നുപോകുന്നത്. ഈ വര്‍ഷം മെയ് മുതലാണ് വിപണിയില്‍ പ്രതിസന്ധി നേരിടാന്‍ തുടങ്ങിയത്. മെയ് മുതല്‍ വില്‍പ്പനയില്‍ ഇടിവ് നേരിട്ടതോടെയാണ് വിപണിയില്‍ പ്രതിസന്ധി ആരംഭിച്ചത്.
വില്‍പ്പന കുറഞ്ഞിട്ടും ഉത്പാദനം കുറയ്ക്കാതിരുന്നതും വാഹനങ്ങള്‍ കെട്ടിക്കിടക്കുന്നതിന് കാരണമായി. ഫെസ്റ്റിവല്‍ സീസണുകള്‍ മുന്നില്‍ കണ്ട് ഷോറൂമുകളിലെത്തിച്ച സ്‌റ്റോക്കിന് തിരിച്ചടി നേരിട്ടത് സെപ്റ്റംബറിലെ വില്‍പ്പനയില്‍ ഗണ്യമായ കുറവ് കൂടി രേഖപ്പെടുത്തിയതോടെയാണ്. 18.81 ശതമാനമാണ് സെപ്റ്റംബറിലെ വില്‍പ്പനയില്‍ മാത്രം കുറവുണ്ടായത്.
നിലവില്‍ രാജ്യത്ത് ഏറ്റവും കൂടുതല്‍ വില്‍പ്പനയുള്ളത് പ്രീമിയം സെഗ്മെന്റ് വാഹനങ്ങളാണ്. പത്ത് ലക്ഷത്തിന് താഴെ വിലയുള്ള വാഹനങ്ങള്‍ക്ക് നിലവില്‍ ആവശ്യക്കാരില്ലെന്നതും വിപണിയെ സാരമായി ബാധിച്ചിട്ടുണ്ട്. രജിസ്‌ട്രേഷന്‍ ചെലവുകളും മറ്റുമായി സാധാരണക്കാര്‍ക്ക് താങ്ങാനാവാത്ത നിലയിലേക്ക് പുതിയ വാഹനങ്ങളുടെ തുക വര്‍ദ്ധിച്ചതും വിപണിയ്ക്ക് പ്രതികൂലമായിട്ടുണ്ട്.
പത്ത് ലക്ഷം രൂപയ്ക്കുള്ളില്‍ വാഹനങ്ങള്‍ വാങ്ങുന്നവര്‍ പുതിയ വാഹനങ്ങളില്‍ നിന്ന് യൂസ്ഡ് കാര്‍ സെഗ്മെന്റിലേക്ക് ചുവട് മാറ്റിയതും ഷോറൂമുകളില്‍ കെട്ടിക്കിടക്കുന്ന വാഹനങ്ങള്‍ക്ക് പ്രതിസന്ധി സൃഷ്ടിക്കുകയാണ്.