ചിപ്പ് നിര്‍മാണ മേഖലയിലെ ആഗോളഭീമനായ അമേരിക്കന്‍ കമ്പനി ഇന്റല്‍ 18,000 ജീവനക്കാരെ പിരിച്ചുവിടുന്നു. ഏപ്രില്‍ മുതല്‍ ജൂണ്‍ വരെ കമ്പനി നേടിയ ലാഭത്തില്‍ പ്രതീക്ഷിച്ചതിനെക്കാളും 160 കോടി ഡോളറിന്റെ ഇടിവു സംഭവിച്ചതിനാലാണ് നടപടി. കൂട്ടപ്പിരിച്ചുവിടലിലൂടെ 2000 കോടി ഡോളര്‍ ലാഭിക്കാമെന്നാണ് കമ്പനി നിലപാട്. 1,23,800 ജീവനക്കാരാണ് കമ്പനിയിലുള്ളത്.
ഇതില്‍ 15 ശതമാനം ജീവനക്കാരെയാണ് പിരിച്ചുവിടുന്നത്. വാര്‍ഷിക ചെലവില്‍ 2000 കോടി ലാഭിക്കുക എന്ന ലക്ഷ്യത്തോടെയാണ് കമ്പനിയുടെ പിരിച്ചുവിടല്‍ നീക്കം.
ജൂണില്‍ ഇസ്രായേലിലെ ഫാക്ടറി പ്രൊജക്ടിന്റെ വികസന പ്രവര്‍ത്തനങ്ങള്‍ നിര്‍ത്തിവെക്കുകയാണെന്ന് ഇന്റല്‍ പ്രഖ്യാപിച്ചിരുന്നു. പകരം 1500 കോടി ഡോളര്‍ ഒരു ചിപ്പ് പ്ലാന്റില്‍ നിക്ഷേപിക്കാനാണ് ശ്രമം. മൂലധനം ഉത്തരവാദിത്വത്തോടെ കൈകാര്യം ചെയ്യേണ്ട ആവശ്യകതയുള്ളതിനാലാണ് ഇത്തരം ഒരു തീരുമാനമെടുത്തതെന്ന് കമ്പനി വ്യക്തമാക്കി.
ആര്‍ട്ടിഫിഷ്യല്‍ ഇന്റലിജന്‍സ് രംഗത്ത് എതിരാളികളായ എന്‍വിഡിയ, എംഎംഡി, ക്വാല്‍കോം തുടങ്ങിയ സ്ഥാപനങ്ങളില്‍ നിന്ന് ഇന്റല്‍ നിലവില്‍ കനത്ത വെല്ലുവിളിയാണ് നേരിടുന്നത്. ദശാബ്ദങ്ങളായി ലാപ്ടോപ്പുകള്‍ മുതല്‍ ഡാറ്റാ സെന്ററുകള്‍ വരെ പ്രവര്‍ത്തിച്ചിരുന്നത് പ്രധാനമായും ഇന്റലിന്റെ ചിപ്പുകള്‍ ഉപയോഗിച്ചായിരുന്നു. ചിപ്പ് വിപണിയിലെ മേധാവിത്വവും ഇന്റലിനായിരുന്നു. എന്നാല്‍ എഐ പ്രൊസസറുകളില്‍ ശ്രദ്ധ കേന്ദ്രീകരിച്ച എന്‍വിഡിയ ഉള്‍പ്പടെയുള്ള കമ്പനികള്‍ ഈ കുത്തക തകര്‍ത്തു. ഇതോടെയാണ് ഇന്റല്‍ പ്രതിസന്ധി നേരിടുന്നത്.