ക്ലൗഡ്, AI ഇൻഫ്രാസ്ട്രക്ചറുകൾക്കായി അടുത്ത രണ്ട് വർഷത്തിനുള്ളിൽ ഇന്ത്യയിൽ 3 ബില്യൺ ഡോളർ നിക്ഷേപം നടത്തുമെന്ന് മൈക്രോസോഫ്റ്റ് ചെയർമാനും സിഇഒയുമായ സത്യ നാദെല്ല ചൊവ്വാഴ്ച പ്രഖ്യാപിച്ചു. ബംഗളൂരുവിൽ നടന്ന കമ്പനിയുടെ AI (ആർട്ടിഫിഷ്യൽ ഇൻ്റലിജൻസ്) പരിപാടിയിൽ സംസാരിച്ച നദെല്ല, ഈ നിക്ഷേപങ്ങൾ ഇന്ത്യയെ AI-ഫസ്റ്റ് ആക്കാനുള്ള ഞങ്ങളുടെ പ്രതിജ്ഞാബദ്ധത വീണ്ടും ഉറപ്പിക്കുന്നതായും രാജ്യത്തുടനീളമുള്ള ആളുകൾക്കും സ്ഥാപനങ്ങൾക്കും വിശാലമായ പ്രയോജനം ഉറപ്പാക്കാൻ സഹായിക്കുമെന്നും പറഞ്ഞു.
2030-ഓടെ കമ്പനി 10 ദശലക്ഷം ആളുകൾക്ക് AI നൈപുണ്യത്തിൽ പരിശീലനം നൽകുമെന്നും അദ്ദേഹം പ്രഖ്യാപിച്ചു. ഈ പരിശീലനം അതിൻ്റെ ADVANTA(I)GE ഇന്ത്യ പ്രോഗ്രാമിൻ്റെ രണ്ടാം പതിപ്പിൻ്റെ ഭാഗമാണ്. 2025-ഓടെ രണ്ട് ദശലക്ഷം ആളുകളെ AI നൈപുണ്യത്തിൽ പരിശീലിപ്പിക്കുക എന്ന ലക്ഷ്യത്തോടെയാണ് കമ്പനി കഴിഞ്ഞ വർഷം ADVANTA(I)GE ഇന്ത്യ സംരംഭം ആരംഭിച്ചത്. ഒരു വർഷത്തിനുള്ളിൽ 2.4 ദശലക്ഷം വ്യക്തികൾ പരിശീലനം നേടിയതോടെ ഈ ലക്ഷ്യം പൂർത്തീകരിച്ചു. പങ്കെടുത്തവരിൽ 65% സ്ത്രീകളായിരുന്നു എന്നതും ശ്രദ്ധേയമാണ്.
ഇന്ത്യയിലെ ഡാറ്റാസെൻ്റർ കാമ്പസുകളിലുടനീളം മൈക്രോസോഫ്റ്റ് അതിൻ്റെ ക്ലൗഡ്, AI ഇൻഫ്രാസ്ട്രക്ചർ വികസിപ്പിക്കും. നിൽവിൽ ആഭ്യന്തര വിപണിയിൽ മൂന്ന് ഡാറ്റാസെൻ്റർ മേഖലകളുണ്ട്, നാലാമത്തേത് 2026-ൽ സജീവമാകും. രാജ്യത്ത് അതിവേഗം വികസിച്ചുകൊണ്ടിരിക്കുന്ന AI സ്റ്റാർട്ടപ്പുകളുടെയും ഗവേഷണ സമൂഹത്തിൻ്റെയും വർദ്ധിച്ചുവരുന്ന ആവശ്യങ്ങൾ നിറവേറ്റുന്നതിനായി ഒരു സ്കെയിലബിൾ AI കമ്പ്യൂട്ടിംഗ് ഇക്കോസിസ്റ്റം വികസിപ്പിക്കുകയാണ് രാജ്യത്തെ നിക്ഷേപം ലക്ഷ്യമിടുന്നതെന്ന് കമ്പനി അറിയിച്ചു. GitHub പ്ലാറ്റ്‌ഫോമിനെക്കുറിച്ച് സംസാരിക്കുമ്പോൾ, 2028-ഓടെ GitHub-ൽ ഏറ്റവും വലിയ ഡെവലപ്പർ കമ്മ്യൂണിറ്റി ഇന്ത്യയിലായിരിക്കുമെന്ന് സിഇഒ പറഞ്ഞു.