സ്വവർഗ വിവാഹം നിയമവിധേയമാക്കുന്ന തെക്കുകിഴക്കൻ ഏഷ്യയിലെ ആദ്യ രാജ്യമായി മാറിയിരിക്കുകയാണ് തായ്‌ലൻഡ്. ഈ മേഖലയിലെ LGBTQ+ ന്റെ അവകാശങ്ങൾക്ക് വേണ്ടി പ്രവർത്തിക്കുന്നവർക്ക് ചരിത്ര വിജയം നേടിക്കൊടുത്തുകൊണ്ട് മഹാ വജിറലോങ്‌കോൺ രാജാവ് വിവാഹ സമത്വ ബില്ലിൽ ഔദ്യോഗികമായി ഒപ്പു വയ്ക്കുകയും ചെയ്തു.
ജൂണിൽ സെനറ്റ് പാസാക്കിയ ബിൽ റോയൽ ഗസറ്റിൽ പ്രസിദ്ധീകരിച്ചിരുന്നു. 2025 ജനുവരി 22-ന് ഇത് പ്രാബല്യത്തിൽ വരികയും ചെയ്യും. ഇതോടെ സ്വവർഗ ദമ്പതികൾക്ക് അവരുടെ നിയമപരമായി രജിസ്റ്റർ ചെയ്യാനാകും. തായ്‌വാനും നേപ്പാളിനും ശേഷം സ്വവർഗ വിവാഹത്തിന് അനുമതി നൽകുന്ന ഏഷ്യയിലെ മൂന്നാമത്തെ രാജ്യമാണിത്. തുല്യതയിലേക്കുള്ള ഈ സുപ്രധാന ചുവടുവയ്പ്പ് തായ്‌ലൻഡിലെ LGBTQ+ വക്താക്കൾ വർഷങ്ങളായി നടത്തിയ പ്രചാരണത്തിൻ്റെ വിജയം തന്നെയാണെന്ന് പറയാം.
ആക്ടിവിസ്റ്റുകളുടെയും രാഷ്ട്രീയക്കാരുടെയും രണ്ട് പതിറ്റാണ്ടിലേറെ നീണ്ട പരിശ്രമത്തിന് ശേഷമാണ് ബിൽ വരുന്നത്. ഏഷ്യയിലെ ഏറ്റവും പ്രശസ്തമായ വിനോദസഞ്ചാര കേന്ദ്രങ്ങളിലൊന്നായ തായ്‌ലൻഡ്, ഊർജ്ജസ്വലമായ എൽജിബിടി സംസ്‌കാരത്തിനും സഹിഷ്ണുതയ്ക്കും പേരുകേട്ടതാണ്.
ഇന്ന് സ്വവർഗ വിവാഹം ലോകമെമ്പാടുമുള്ള പല രാജ്യങ്ങളിലും ഒരു നിയമപരമായ അവകാശമായി മാറിയിട്ടുണ്ട്. ഇത് LGBTQ+ അവകാശങ്ങൾക്കും തുല്യതയ്ക്കും വേണ്ടിയുള്ള സുപ്രധാന ചുവടുവെപ്പിനെയാണ് അടയാളപ്പെടുത്തുന്നത്. ഒന്നാം ലോക രാജ്യങ്ങൾ ഒഴികെ, സ്വവർഗ വിവാഹങ്ങൾ നിയമവിധേയമാക്കിയ അഞ്ച് രാജ്യങ്ങൾ നോക്കാം…
ദക്ഷിണാഫ്രിക്ക
സ്വവർഗ വിവാഹം നിയമവിധേയമാക്കിയ ആദ്യ ആഫ്രിക്കൻ രാഷ്ട്രമാണ് ദക്ഷിണാഫ്രിക്ക. 2006-ലാണ് ദക്ഷിണാഫ്രിക്ക ഈ ചരിത്രം സൃഷ്ടിച്ചത്. ലോകത്തിലെ ഏറ്റവും പുരോഗമനപരമായ ഭരണഘടനയാണ് ദക്ഷിണാഫ്രിക്കയുടേത്. ഇതിൽ ലൈംഗിക ആഭിമുഖ്യത്തെ അടിസ്ഥാനമാക്കിയുള്ള വിവേചനത്തെ വ്യക്തമായി നിരോധിക്കുന്നു. സ്വവർഗ്ഗവിവാഹം നിയമവിധേയമാക്കുന്നത് മനുഷ്യാവകാശങ്ങളോടുള്ള പ്രതിബദ്ധതയിൽ സ്വാഭാവികമായ പുരോഗതിയാക്കി മാറ്റുകയും ചെയ്യുന്നു.
അർജൻ്റീന
ലാറ്റിനമേരിക്കയിൽ സ്വവർഗ വിവാഹം നിയമവിധേയമാക്കുന്ന ആദ്യ രാജ്യമാണ് അർജൻ്റീന. 2010-ലാണ് ഇവിടെ സ്വവർഗ വിവാഹം നിയമവിധേയമാക്കിയത്. സ്വവർഗ ദമ്പതികൾക്ക് വിവാഹം കഴിക്കാനും ദത്തെടുക്കലിനും അനന്തരാവകാശ അവകാശങ്ങളും ഉൾപ്പെടെയുള്ള അവകാശങ്ങൾ ആസ്വദിക്കാനും ഈ സുപ്രധാന തീരുമാനം അനുവദിക്കുന്നു.
ജർമ്മനി
2017-ൽ ബുണ്ടെസ്റ്റാഗിലെ വോട്ടെടുപ്പിന് ശേഷമാണ് ജർമ്മനി സ്വവർഗ വിവാഹം നിയമവിധേയമാക്കിയത്. ഈ മാറ്റം സിവിൽ പങ്കാളിത്തത്തിന് പകരം സ്വവർഗ ദമ്പതികൾക്ക് പൂർണ്ണ വിവാഹ അവകാശങ്ങൾ നൽകി. മാത്രമല്ല, അവരെ വിവാഹം കഴിക്കാനും കുട്ടികളെ ദത്തെടുക്കാനും അനുവദിച്ചു. ജർമ്മനിയുടെ ഈ മാറ്റം രാജ്യത്തിലെ LGBTQ+ അവകാശങ്ങളിൽ ഒരു സുപ്രധാന നിമിഷം അടയാളപ്പെടുത്തി.
തായ്‌വാൻ
2019-ലാണ് സ്വവർഗ വിവാഹം നിയമവിധേയമാക്കുന്ന ഏഷ്യയിലെ ആദ്യത്തെ രാജ്യമായി തായ്‌വാൻ മാറിയത്. വർഷങ്ങളുടെ ആക്ടിവിസത്തിനും കോടതിയിൽ നടത്തിയ യുദ്ധങ്ങൾക്കും ശേഷമാണ് ഈ തീരുമാനം ഉണ്ടായത്. തായ്‌വാൻ്റെ പുരോഗമനപരമായ നിലപാട് അതിനെ ഈ മേഖലയിലെ LGBTQ+ അവകാശങ്ങളിൽ മുൻപന്തിയിലാക്കി.
മെക്സിക്കോ
വിവാഹ സമത്വത്തിലേക്കുള്ള മെക്‌സിക്കോയുടെ പാത പടിപടിയായിട്ടായിരുന്നു. ഓരോ സംസ്ഥാനങ്ങളും വർഷങ്ങളായി സ്വവർഗ വിവാഹം നിയമവിധേയമാക്കി കൊണ്ടുവരികയായിരുന്നു. എന്നാൽ 2022 ലെ കണക്കനുസരിച്ച് എല്ലാ മെക്സിക്കൻ സംസ്ഥാനങ്ങളും ഇപ്പോൾ സ്വവർഗ വിവാഹങ്ങളെ അംഗീകരിച്ചിട്ടുണ്ട്. ഇത് ലാറ്റിനമേരിക്കയുടെ പുരോഗതിയുടെ പ്രധാന ഉദാഹരണമായി രാജ്യത്തെ എടുത്തു കാണിക്കുന്നു.
സ്വവർഗ വിവാഹം അംഗീകരിക്കുന്ന രാജ്യങ്ങളുടെ പട്ടികയിൽ തായ്‌ലാൻഡും എത്തിയതോടെ ഇപ്പോൾ വിവാഹ സമത്വത്തിനായുള്ള ആഗോള മുന്നേറ്റം ശക്തി പ്രാപിച്ചുകൊണ്ടിരിക്കുകയാണ്. കൂടുതൽ രാജ്യങ്ങൾ ഈ പാത പിന്തുടരുന്നതോടെ, വിവാഹ സമത്വം ലോകമെമ്പാടും അംഗീകരിക്കപ്പെടുകായും എല്ലായിടത്തും സ്നേഹം ഒരേ ബഹുമാനത്തോടും നിയമസാധുതയോടും കൂടി പരിഗണിക്കപ്പെടുന്നുവെന്നും ഉറപ്പാക്കും.
എന്നാൽ ഇറാൻ, അഫ്ഗാനിസ്ഥാൻ, സൗദി അറേബ്യ, ബ്രൂണെ തുടങ്ങിയ രാജ്യങ്ങൾ LGBTQ+ അവകാശങ്ങൾക്കും കടുത്ത മനുഷ്യാവകാശ ലംഘനങ്ങൾക്കും എതിരെയാണ്. ഈ രാജ്യങ്ങളിൽ, LGBTQ+ വിഭാഗത്തിൽപ്പെട്ട ആളുകൾക്ക് വധശിക്ഷയും ചാട്ടവാറടിയും ഉൾപ്പെടെയുള്ള പല ക്രൂരമായ ശിക്ഷകളാണ് നൽകുന്നത്.