ബഹിരാകാശ പര്യവേക്ഷണത്തിൽ ശ്രദ്ധേയമായ നിരവധി നാഴികക്കല്ലുകൾ അമേരിക്കയുടെ പ്രധാന ബഹിരാകാശ ഏജൻസിയായ നാസ കൈവരിച്ചിട്ടുണ്ട്. എന്നാൽ നാസയുടെ ചരിത്രത്തിലും ചില പരാജയങ്ങൾ ഉണ്ടായിട്ടുണ്ട്. നാസയുടെ ചരിത്രത്തിലുണ്ടായ ഏഴ് പരാജയങ്ങൾ അങ്ങനെ പെട്ടെന്ന് ആരും മറക്കാൻ സാധ്യതയില്ല.
അപ്പോളോ 1 ദുരന്തം
1967 ജനുവരി 27-ന്, അപ്പോളോ 1 ദൗത്യത്തിനായുള്ള ഒരു പ്രീ-ലോഞ്ച് പരീക്ഷണമാണ് ദുരന്തത്തിൽ അവസാനിച്ചത്. ബഹിരാകാശയാത്രികരായ ഗസ് ഗ്രിസോം, എഡ് വൈറ്റ്, റോജർ ബി. ചാഫി എന്നിവർ ഒരു പരിശോധന നടത്തുന്നതിനിടെയാണ് കമാൻഡ് മൊഡ്യൂളിൽ തീപിടുത്തമുണ്ടായത്. പേടകത്തിനുള്ളിലെ ശുദ്ധമായ ഓക്സിജൻ അന്തരീക്ഷം തീ അതിവേഗം പടരാൻ കാരണമായി. ഇത് കാരണം ബഹിരാകാശയാത്രികർക്ക് രക്ഷപെടാൻ സാധിച്ചില്ല. തെറ്റായ വയറിംഗും കത്തുന്ന വസ്തുക്കളും ഉൾപ്പെടെ നിരവധി ഡിസൈൻ പിഴവുകൾ അന്വേഷണത്തിൽ കണ്ടെത്തി. ഈ ദുരന്തം അപ്പോളോ പ്രോഗ്രാമിൽ കാര്യമായ രൂപകൽപ്പനയ്ക്കും സുരക്ഷാ നവീകരണങ്ങൾക്കും കാരണമായി. ഇത് നാസയുടെ ഭാവി ദൗത്യങ്ങളുടെ വിജയത്തിന് കാര്യമായ സംഭാവനകളും നൽകി.
ചലഞ്ചർ ദുരന്തം
1986 ജനുവരി 28-നായിരുന്നു ചലഞ്ചർ ദുരന്തം. സ്‌പേസ് ഷട്ടിൽ ആയ ചലഞ്ചർ 73 സെക്കൻഡുകൾക്കുള്ളിൽ വേർപിരിഞ്ഞാണ് അപകടം ഉണ്ടായത്. അധ്യാപിക ക്രിസ്റ്റ മക്അലിഫ് ഉൾപ്പെടെ ഏഴ് ക്രൂ അംഗങ്ങൾ അപകടത്തിൽ മരണപ്പെട്ടു. വലത് സോളിഡ് റോക്കറ്റ് ബൂസ്റ്ററിൽ ഒ-റിംഗ് സീൽ തകരാറിലായതാണ് ദുരന്തത്തിന് കാരണമായത്. അപകടത്തെക്കുറിച്ച് അന്വേഷിക്കാൻ രൂപീകരിച്ച റോജേഴ്‌സ് കമ്മീഷൻ നാസയുടെ മാനേജ്‌മെൻ്റിനെയും തീരുമാനമെടുക്കൽ പ്രക്രിയകളെയും വിമർശിച്ചു. ഇത് ഷട്ടിലിന്റെ രൂപകൽപ്പനയിലും പ്രവർത്തന നടപടിക്രമങ്ങളിലും കാര്യമായ മാറ്റങ്ങൾക്ക് കാരണമായി.
മാർസ് ക്ലൈമറ്റ് ഓർബിറ്റർ നഷ്ടപ്പെട്ടത്
1999 സെപ്തംബർ 23നാണ് മാർസ് ക്ലൈമറ്റ് ഓർബിറ്റർ ചുവന്ന ഗ്രഹത്തിന് സമീപമെത്തിയപ്പോൾ നാസയുമായുള്ള ബന്ധം നഷ്ടപ്പെട്ടത്. ചൊവ്വയുടെ കാലാവസ്ഥയും അന്തരീക്ഷവും പഠിക്കാനായിരുന്നു ഈ പേടകം. ലളിതവും എന്നാൽ വിനാശകരവുമായ ഒരു പിശകാണ് പരാജയത്തിന് കാരണമായത്. ഒരു ടീം മെട്രിക് യൂണിറ്റുകൾ ഉപയോഗിച്ചപ്പോൾ മറ്റൊരു ടീം ഒരു പ്രധാന ബഹിരാകാശ പേടക പ്രവർത്തനത്തിന് ഇമ്പീരിയൽ യൂണിറ്റുകൾ ഉപയോഗിച്ചു. ഈ പൊരുത്തക്കേട് ഓർബിറ്റർ ആസൂത്രണം ചെയ്തതിനേക്കാൾ താഴ്ന്ന ഉയരത്തിൽ ചൊവ്വയുടെ അന്തരീക്ഷത്തിലേക്ക് പ്രവേശിക്കാൻ കാരണമാവുകയും അതിൻ്റെ നാശത്തിലേക്ക് നയിക്കുകയും ചെയ്തു.
കൊളംബിയ ദുരന്തം
2003 ഫെബ്രുവരി 1-ന്, ബഹിരാകാശവാഹനമായ കൊളംബിയ ഭൂമിയുടെ അന്തരീക്ഷത്തിലേക്ക് വീണ്ടും പ്രവേശിക്കുമ്പോഴായിരുന്നു അതിൽ ഉണ്ടായിരുന്ന ഏഴ് ബഹിരാകാശ സഞ്ചാരികളും കൊല്ലപ്പെട്ടത്. വിക്ഷേപണത്തിനിടെ ഷട്ടിലിൻ്റെ ഇടത് ചിറകിൽ ഫോം ഇൻസുലേഷൻ്റെ ഒരു കഷണം തട്ടിയതാണ് ദുരന്തത്തിന് കാരണമായത്. ഈ ആഘാതം ഒരു ദ്വാരം സൃഷ്ടിക്കുകയും ഇത് ചൂടുള്ള അന്തരീക്ഷ വാതകം ചിറകിലേക്ക് തുളച്ചുകയറാൻ കാരണമാവുകയും ചെയ്തു. ഇത് ഷട്ടിൽ തകരുന്നതിലേക്ക് നയിച്ചു. കൊളംബിയ ആക്‌സിഡൻ്റ് ഇൻവെസ്റ്റിഗേഷൻ ബോർഡ് നാസയ്‌ക്കുള്ളിലെ പ്രശ്നങ്ങൾ തിരിച്ചറിയുകയും ഇത് ഭാവി ദൗത്യങ്ങളിൽ സുരക്ഷയും അപകടസാധ്യതയും വരാതിരിക്കാൻ ശ്രദ്ധ കൊടുക്കുയും ചെയ്തു.
മാർസ് പോളാർ ലാൻഡറിൻ്റെ പരാജയം
ചൊവ്വയുടെ ഉപരിതലവും കാലാവസ്ഥയും പഠിക്കാൻ രൂപകൽപ്പന ചെയ്തതാണ് 1999 ജനുവരി 3 ന് വിക്ഷേപിച്ച മാർസ് പോളാർ ലാൻഡർ. 1999 ഡിസംബർ 3-ന് ഷെഡ്യൂൾ ചെയ്ത ലാൻഡിംഗിന് തൊട്ടുമുമ്പ് ബന്ധം നഷ്ടപ്പെടുകയായിരുന്നു. ഒരു സോഫ്‌റ്റ്‌വെയർ പിശക് കാരണം ലാൻഡറിൻ്റെ ഡിസെൻ്റ് എഞ്ചിനുകൾ ഓഫ് ആയതായും ഇത് പോളാർ ലാൻഡർ തകരാൻ ഇടയാക്കിയതായും അന്വേഷണത്തിൽ കണ്ടെത്തി.
ജെനസിസ് മിഷൻ ക്രാഷ്
സൗരവാത സാമ്പിളുകൾ ശേഖരിച്ച് ഭൂമിയിലേക്ക് തിരികെ കൊണ്ടുവരാൻ ലക്ഷ്യമിട്ടായിരുന്നു ജെനസിസ് മിഷൻ ലോഞ്ച് ചെയ്തത്. 2001 ഓഗസ്റ്റ് 8-നാൻ ഇത് ലോഞ്ച് ചെയ്തത്. 2004 സെപ്റ്റംബർ 8-ന്, പാരച്യൂട്ടുകൾ വിന്യസിക്കുന്നതിൽ പരാജയപ്പെട്ടതിനെത്തുടർന്ന് സാമ്പിൾ റിട്ടേൺ ക്യാപ്‌സ്യൂൾ യൂട്ടാ മരുഭൂമിയിൽ തകർന്നു. അപകടമുണ്ടായിട്ടും ശേഖരിച്ച ചില സാമ്പിളുകൾ ശേഖരിക്കാൻ സാധിക്കുകയും ഇവ വിശകലനം ചെയ്യുകയും ചെയ്തിരുന്നു.
ബോയിംഗ് സ്റ്റാർലൈനർ
2024 ജൂണിൽ, നാസ ബഹിരാകാശയാത്രികരായ സുനിത വില്യംസും ബുച്ച് വിൽമോറും ബോയിംഗ് സ്റ്റാർലൈനർ ബഹിരാകാശ പേടകത്തിൽ ഗുരുതരമായ ഒരു സാഹചര്യമാണ് നേരിട്ടത്. ഇൻ്റർനാഷണൽ ബഹിരാകാശ നിലയത്തിലേക്ക് ഒരാഴ്ചത്തെ ദൗത്യം എന്ന നിലയിലായിരുന്നു ആദ്യം പദ്ധതിയിട്ടിരുന്നത്. ഹീലിയം ചോർച്ചയും ത്രസ്റ്റർ തകരാറുകളും ഉൾപ്പെടെയുള്ള സാങ്കേതിക പ്രശ്നങ്ങൾ കാരണം അവരുടെ താമസം നീട്ടുകയായിരുന്നു. 2024 ജൂൺ 5 ന് വിക്ഷേപിക്കുന്നതിന് മുൻപേ ഒന്നിലധികം തവണ കാലതാമസം നേരിട്ട ബഹിരാകാശ പേടകം, ഷെഡ്യൂൾ ചെയ്തതുപോലെ ബഹിരാകാശയാത്രികരെ ഭൂമിയിലേക്ക് തിരികെ കൊണ്ടുവരുന്നതിലും പരാജയപ്പെട്ടു. സ്റ്റാർലൈനർ ഉപയോഗിച്ച് തിരിച്ചുവരാൻ ശ്രമിക്കുന്നത് വളരെ അപകടകരമാണെന്നാണ് നാസ പറയുന്നത്. ഇവരെ തിരികെ കൊണ്ടുവരാൻ ഒരു SpaceX ദൗത്യത്തിനായി കാത്തിരിക്കുകയാണ് നാസ.