കോവിഡ് രാജ്യത്തെയാകെ പിടിമുറുക്കിയിരിക്കുകയാണ്. രോഗികളുടെ എണ്ണം ക്രമാതീതമായി വര്‍ദ്ധിച്ചു കൊണ്ടിരിക്കുകയാണ്. കോവിഡ് കേസുകള്‍ വര്‍ദ്ധിക്കുന്ന ഈ സാഹചര്യത്തില്‍ ഹോം ക്വാറന്റൈനില്‍ തുടര്‍ന്ന് കോവിഡ് പ്രതിരോധത്തിനായുള്ള പുതിയ മാര്‍ഗനിര്‍ദേശങ്ങള്‍ പുറത്തിറക്കി എയിംസ്.
*മിതമായ രോഗലക്ഷണങ്ങള്‍ ഉള്ള രോഗികള്‍ മാത്രമേ വീട്ടില്‍ ക്വാറന്റൈനില്‍ ഇരിക്കാന്‍ പാടുള്ളു. രോഗിയുടെ അവസ്ഥ നിരീക്ഷിച്ച് ഡോക്ടര്‍ ആണ് ഇക്കാര്യത്തില്‍ തീരുമാനം എടുക്കേണ്ടത്.
*അറ്റാച്ച്ഡ് ബാത്ത്‌റൂം ഉള്ള മുറിയില്‍ വേണം ക്വാറന്റൈനില്‍ ഇരിക്കാന്‍.
*എച്ച്‌ഐവി പോലുള്ള രോഗപ്രതിരോധ ശേഷിയില്ലാത്ത രോഗികള്‍ ഹോം ക്വാറന്റൈനില്‍ ഇരിക്കാന്‍ പാടില്ല.
*ഹോം ക്വാറന്റൈനില്‍ ഇരിക്കുന്ന രോഗികള്‍ക്ക് ആശുപത്രിയുമായി ബന്ധമുണ്ടായിരിക്കണം, കൂടാതെ രോഗലക്ഷണങ്ങള്‍ വഷളാവുകയാണെങ്കില്‍ ചികിത്സിക്കുന്ന ഡോക്ടറെ വിവരം അറിയിക്കണം.
*മറ്റ് രോഗത്തിന് മരുന്ന് കഴിക്കുന്നവര്‍ അത് മുടക്കാന്‍ പാടില്ല.
*നന്നായി വെള്ളം കുടിക്കുകയും വിശ്രമിക്കുകയും രോഗപ്രതിരോധ ശേഷി പ്രദാനം ചെയ്യുന്ന ഭക്ഷണവും കഴിക്കണം.
*രോഗികള്‍ ഒരു പള്‍സ് ഓക്‌സിമീറ്റര്‍ ഉപയോഗിക്കുകയും രോഗലക്ഷണങ്ങളുടെ മാറ്റങ്ങള്‍ റിപ്പോര്‍ട്ട് ചെയ്യുകയും വേണം.
*രോഗം ബാധിച്ചവര്‍ മറ്റ് കുടുംബാംഗങ്ങളില്‍ നിന്നും അകന്ന് നില്‍ക്കണം, വീട്ടില്‍ മറ്റുള്ളവര്‍ ഉപയോഗിക്കുന്ന വസ്തുക്കളൊന്നും തൊടാനോ ഉപയോഗിക്കാനോ പാടില്ല.
*രോഗികള്‍ എപ്പോഴും ട്രിപ്പിള്‍ ലെയര്‍ മെഡിക്കല്‍ മാസ്‌ക്കുകള്‍ ഉപയോഗിക്കാന്‍ ശ്രദ്ധിക്കണം. 8 മണിക്കൂറിന് ശേഷം ഇത് മാറ്റി ഉപയോഗിക്കണം. കളയുന്നതിന് മുമ്പ് മാസ്‌ക് സോഡിയം ഹൈപ്പോക്ലോറൈറ്റ് ഉപയോഗിച്ച് അണുവിമുക്തമാക്കണം.
*ശാരീരിക അകലം, മാസ്‌ക് ഉപയോഗം, കൈ ശുചിത്വം, സ്വയം നിരീക്ഷണം, ഡോക്ടറുമായി നിരന്തരം സമ്പര്‍ക്കം എന്നിവ സംബന്ധിച്ച നിര്‍ദ്ദേശങ്ങള്‍ രോഗികള്‍ പാലിക്കണം.