പഞ്ചേന്ദ്രിയങ്ങൾ ആയ രുചി, കാഴ്ച, മണം, സ്പർശനം, കേൾവി എന്നിവ മിക്കവർക്കും സുപരിചിതമാണ്. എന്നാൽ അതിനും അപ്പുറത്തേക്ക് ഉള്ളവയെ തിരിച്ചറിയാനുള്ള കഴിവിനെ സിക്സ്ത് സെൻസ് എന്നൊക്കെ ചിലപ്പോൾ പറയാറുണ്ട്. ബസിന്റെ പിന്നിലെ ഡോറിനരികില്‍ നിന്ന യാത്രക്കാരനെ കണ്ടക്ടർ അത്ഭുതകരമായി രക്ഷപ്പെടുത്തിയ വീഡിയോ ആണ് ഇപ്പോൾ വൈറലാകുന്നത്.
യാത്രയ്ക്കിടെ നിയന്ത്രണം വിട്ട് വീണ് വാതിലിന്റെ ലോക്ക് തുറന്ന് പുറത്തേയ്ക്ക് യാത്രക്കാരൻ വീഴാൻ പോവുകയായിരുന്നു. ടിക്കറ്റ് നല്‍കി ബാലന്‍സ് വാങ്ങുന്നതിനിടെയാണ് യാത്രക്കാരന് പെട്ടെന്ന് ബാലൻസ് നഷ്ടപ്പെട്ടത്. ബസിൽ നിന്ന് പുറത്തേക്ക് വീഴാൻ പോയ യാത്രക്കാരനെ മിന്നല്‍വേഗത്തിലാണ് കണ്ടക്ടർ ഒറ്റക്കൈ കൊണ്ട് പിടിച്ചു കയറ്റുന്നത്.
ചവറ-അടൂർ-പന്തളം റൂട്ടിൽ സർവീസ് നടത്തുന്ന ‘സുനിൽ’ എന്ന ബസിലായിരുന്നു സംഭവം നടന്നത്. വീഡിയോ ആളുകൾ കണ്ടതോടെ ബസ് കണ്ടക്ടർ ബിജിത്ത് ലാൽ സോഷ്യൽ മീഡിയയിലടക്കം ഇതോടെ താരമാവുകയും ചെയ്തു കഴിഞ്ഞു. ദൈവത്തിന്റെ കരങ്ങൾ, മിന്നൽ മുരളി എന്നിങ്ങനെയുള്ള നിരവധി കമന്റുകളാണ് ഇതോടെ വീഡിയോയുടെ താഴെ കമന്റുകളായി എത്തുന്നത്.