Connect with us
https://southlive.in/wp-content/uploads/2018/08/728-x-90-pix.jpg

NEWS ELSEWHERE

കരഞ്ഞു കരഞ്ഞ് ആദി മുഖ്യമന്ത്രിയെ ‘കീഴടക്കി’; നന്നായി പഠിക്കണമെന്ന് ഉപദേശം

, 7:32 am

നന്നായിട്ടൊന്നു കരഞ്ഞു, ആ കരച്ചിൽ മുഖ്യമന്ത്രി കണ്ടു. ഫെയ്സ്ബുക്കിൽ ആദിയുടെ കരച്ചിൽ കണ്ട് ആശ്വസിപ്പിച്ച മുഖ്യമന്ത്രി കഴിഞ്ഞദിവസം വാക്കുപാലിച്ചു. കണ്ണൂരിലെത്തിയപ്പോൾ ആദിയെ നേരിട്ടുകണ്ട് സമ്മാനം നൽകി. മുഖ്യമന്ത്രിക്കൊപ്പം ചേർന്നിരുന്ന് സെൽഫിയെടുത്ത ആദിക്ക് ഇനി സ്കൂളിൽ ചെന്നിട്ടു വേണം ഒറ്റക്കരച്ചിൽ കൊണ്ടു മുഖ്യമന്ത്രിയെ ‘കീഴടക്കിയ’ കഥ കൂട്ടുകാരോടു പറയാൻ.

കണ്ണൂർ സ്വദേശി രഞ്ജിത്തിന്റെയും രസിനയുടെയും മകനാണു തളാപ്പ് ചിന്മയ ബാലഭവനിലെ മൂന്നാംക്ലാസുകാരൻ ആദി. പിണറായി വിജയന്റെ കടുത്ത ആരാധകൻ. മൂന്നാം ക്ലാസിൽ ‘നമ്മുടെ മുഖ്യമന്ത്രി’ എന്ന പാഠഭാഗമുണ്ടായിരുന്നു. അങ്ങനെ തുടങ്ങിയ ഇഷ്ടം ടിവി ഇന്റർവ്യൂകളിലൂടെ കടന്ന് ഗൂഗിൾ, യുട്യൂബ് വഴി പടർന്നു കയറി. അദ്ദേഹത്തെ കാണണമെന്നാവശ്യപ്പെട്ടു ശല്യപ്പെടുത്താൻ തുടങ്ങിയപ്പോൾ സിപിഎം കണ്ണൂർ ജില്ലാ സമ്മേളനത്തിനു മുഖ്യമന്ത്രി എത്തിയാൽ കാട്ടിത്തരാമെന്ന് അമ്മ വാക്കു നൽകി.

സമ്മേളനത്തിരക്കിനിടെ മുഖ്യമന്ത്രിയെ ശരിക്കൊന്നു കാണാൻ പോലും കിട്ടിയില്ല. വാശിപിടിച്ചു കരഞ്ഞാണ് അന്ന് ആദി വീട്ടിലേക്കു മടങ്ങിയത്. മാർച്ച് അവസാനത്തോടെ കുടുംബം ഖത്തറിലേക്കു താമസം മാറുകയാണ്. അതിനു മുൻപ് ഒരിക്കൽക്കൂടി പിണറായിയെ കാണാൻ അവസരം കിട്ടിയില്ലെങ്കിലോ എന്നോർത്തായിരുന്നു ആദിയുടെ വിഷമം. ഒടുവിൽ അമ്മ രസിന, ആദിയുടെ കരച്ചിൽ വിഡിയോ പകർത്തി ഫെയ്സ്ബുക്കിൽ പോസ്റ്റ് ചെയ്തു.

അടുത്ത പരിപാടി നടക്കുന്ന ഏതെങ്കിലും സ്ഥലത്തു മുഖ്യമന്ത്രിയെ കാണാൻ സൗകര്യം കിട്ടുമോ എന്നറിയാനായിരുന്നു പോസ്റ്റ്. ആ കരച്ചിൽ മുഖ്യമന്ത്രിയുടെ ശ്രദ്ധയിലും പെട്ടു. ഒട്ടേറെപ്പേർ ഷെയർ ചെയ്ത വിഡിയോ കണ്ട് ജനുവരി 30നു മുഖ്യമന്ത്രി ആദിയെ വിളിച്ച് ആശ്വസിപ്പിച്ചു. ഇനി കണ്ണൂരിലെത്തുമ്പോൾ കാണാമെന്നു വാക്കു നൽകി.

കഴിഞ്ഞദിവസം സംസ്ഥാന സഹകരണ കോൺഗ്രസ് ഉദ്ഘാടനത്തിനായി കണ്ണൂരിലെത്തിയ മുഖ്യമന്ത്രി ആദിയെ പയ്യാമ്പലം ഗസ്റ്റ് ഹൗസിലേക്കു ക്ഷണിച്ചു. ഇരുവരും തമ്മിൽകണ്ടു സംസാരിച്ചു. സ്വന്തമായി വരച്ചു സൂക്ഷിച്ച പിണറായി വിജയന്റെ ചിത്രം ആദി കൈമാറി. നന്നായി പഠിക്കണമെന്ന് ഉപദേശിച്ച് ആദിക്ക് ഒരു പേന സമ്മാനിച്ചാണു മുഖ്യമന്ത്രി പിണറായി വിജയൻ മടങ്ങിയത്. ‌ സിപിഎം ജില്ലാ സെക്രട്ടറി പി.ജയരാജൻ, കെ.കെ.രാകേഷ് എംപി എന്നിവരും മുഖ്യമന്ത്രിക്കൊപ്പം ഉണ്ടായിരുന്നു.

Advertisement