Connect with us
https://southlive.in/wp-content/uploads/2018/08/728-x-90-pix.jpg

NEWS ELSEWHERE

ബോംബ്, ബൈക്ക്, കാട്… സിമി ക്യാമ്പില്‍ കഠിന പരിശീലനം

, 7:59 am

ഇന്ത്യന്‍ മുജാഹിദീനെ ശക്തിപ്പെടുത്തുകയെന്ന ലക്ഷ്യത്തോടെ ആസൂത്രണം ചെയ്ത വാഗമണ്‍ സിമി ക്യാമ്പിലെ പരിശീലന മുറകളെല്ലാം അതികഠിനം. ബോംബ് നിര്‍മാണം മുതല്‍ ഹൈടെക് സംവിധാനങ്ങളുടെ ക്രമീകരണം വരെയുള്ള പദ്ധതികളാണ് ക്യാമ്പില്‍ ആസൂത്രണം ചെയ്തതെന്നാണ് എന്‍.ഐ.എ. കണ്ടെത്തല്‍. ബോംബ് നിര്‍മാണ പരിശീലനത്തിനൊപ്പം അതിവേഗ ബൈക്ക് ഓട്ടം, കാടും മലയും താണ്ടി കിലോമീറ്ററുകളോളം സഞ്ചരിക്കല്‍ തുടങ്ങിയവയിലും പരിശീലനം നല്‍കിയിരുന്നു.

അഹമ്മദാബാദ്, വാരാണസി, ബെംഗളൂരു, സൂറത്ത് എന്നിവിടങ്ങളില്‍ നടന്ന സ്‌ഫോടനങ്ങളില്‍ വാഗമണ്‍ സിമി ക്യാമ്പ് പ്രതികള്‍ക്ക് ബന്ധമുണ്ടായിരുന്നു. കേരളത്തില്‍ ഇവര്‍ ആസൂത്രിതമായ ക്യാമ്പ് നടത്തിയിട്ടും ഇന്റലിജന്‍സ് ഏജന്‍സികള്‍ക്ക് കണ്ടെത്താനായില്ല. ക്യാമ്പ് അംഗങ്ങളുടെ സമര്‍ഥമായ നീക്കങ്ങളും ആസൂത്രിതമായ പദ്ധതികളുമായിരുന്നു ഇന്റലിജന്‍സിനെ കബളിപ്പിച്ചതെന്ന് എന്‍.ഐ.എ. കണ്ടെത്തി.

വാഗമണില്‍ സിമി ആയുധ ക്യാമ്പ് സംഘടിപ്പിച്ച വിവരം ആദ്യം കണ്ടെത്തി റിപ്പോര്‍ട്ട് ചെയ്തത് കേരള പോലീസിന്റെ ആഭ്യന്തര സുരക്ഷാ വിഭാഗമായിരുന്നു. ബോംബും കാടും പ്രധാന പരിശീലന പദ്ധതികളായതിനാല്‍ അതിനുപറ്റിയ ആളുകളായിരിക്കണം ക്യാമ്പംഗങ്ങളെന്ന് ഉന്നത സമിതിയില്‍നിന്ന് നിര്‍ദേശമുണ്ടായിരുന്നു. അതനുസരിച്ച് ആറു എന്‍ജിനീയര്‍മാരും മൂന്ന് ഡോക്ടര്‍മാരും ക്യാമ്പിലെത്തി.

കൊച്ചിയിലെ ആയുധ വില്‍പ്പനശാലയില്‍ നിന്നാണ് പരിശീലനത്തിന് തോക്കുകള്‍ വാങ്ങിയത്. ഗുജറാത്തില്‍ നിന്നെത്തിയ അമീന്‍ പര്‍വേശ് ആയിരുന്നു ബോംബ് നിര്‍മാണ പരിശീലകന്‍.

കേസ് ഇങ്ങനെ

2007 ഡിസംബര്‍ 10 മുതല്‍ 12 വരെയാണ് സ്റ്റുഡന്റ്‌സ് ഇസ്ലാമിക് മൂവ്‌മെന്റ് ഓഫ് ഇന്ത്യ (സിമി) വാഗമണിലെ തങ്ങള്‍പാറയില്‍ ആയുധ പരിശീലന ക്യാമ്പ് നടത്തിയത്. തങ്ങള്‍പാറയില്‍നിന്ന് പരിശീലനത്തിനുപയോഗിച്ച ഉപകരണങ്ങളും വെടിക്കോപ്പുകളും കണ്ടെത്തിയിരുന്നു.

കേരള പൊലീസിന്റെ ഭീകരവിരുദ്ധ സ്‌ക്വാഡ് അന്വേഷിച്ച കേസ് പിന്നീട് എന്‍.ഐ.എ. ഏറ്റെടുത്തു. മധ്യപ്രദേശിലെ ഇന്ദോറിലാണ് വാഗമണ്‍ ക്യാമ്പിനുള്ള ഗൂഢാലോചനയും തയ്യാറെടുപ്പും നടത്തിയത്. ക്യാമ്പിന്റെ ചുമതല കോട്ടയം സ്വദേശി പി.എ. ശാദുലിക്കായിരുന്നു. ബെംഗളൂരു, അഹമ്മദാബാദ് സ്‌ഫോടനക്കേസുകളിലെ പ്രധാന പ്രതികളിലൊരാളാണ് ഇയാള്‍.

കുറ്റക്കാര്‍ ഇവര്‍

കോട്ടയം സ്വദേശികളായ പി. ഷാദുലിയാണ് ഒന്നാം പ്രതി. പി.എ. ഷിബിലി നാലാംപ്രതിയും. ആലുവ കുഞ്ഞുണ്ണിക്കര സ്വദേശികളായ പി.എ. മുഹമ്മദ് അന്‍സാര്‍, അബ്ദുള്‍ സത്താര്‍ എന്നിവര്‍ അഞ്ചും ആറും പ്രതികളും.

ഹഫീസ് ഹുസൈന്‍ (രണ്ടാം പ്രതി), സഫ്ദര്‍ നഗോറി (മൂന്ന്), ആമില്‍ പര്‍വാസ് (ഏഴ്), മുഹമ്മദ് സമി (11), നദീം സയീദ് (14), മുഫ്തി അബുള്‍ ബാഷര്‍ (15), ഡോ. എച്ച്.എ. ആസാദുള്ള (24), കമറുദ്ദീന്‍ നഗോറി (26), ഷക്കീല്‍ അഹമ്മദ് (29), ഡോ. മിര്‍സ അഹമ്മദ് (30), ദാനിഷ് സയിദ് (33), മന്‍സാര്‍ ഇമാം (34), മുഹമ്മദ് അബു ഫൈസല്‍ (36), ആലം ജെബ് അഫ്രിദി (38-ാം പ്രതി) എന്നിങ്ങനെയാണ് മറ്റുള്ളവര്‍.

വാഗമണ്‍ കേസിലെ പ്രതിപ്പട്ടികയിലുള്ളവരില്‍ പലരും മറ്റ് തീവ്രവാദകേസുകളിലും പ്രതികളാണ്.

Advertisement