Connect with us
https://southlive.in/wp-content/uploads/2018/08/728-x-90-pix.jpg

SOCIAL STREAM

‘നിങ്ങളുടെ മകന്‍ തിരിച്ചു വന്നിരിക്കുന്നു ഉമ്മീ..അന്ന് പോയ അറുപത് കുഞ്ഞുങ്ങള്‍ ഇനി തിരിച്ച് വരില്ലല്ലോ?; കള്ളക്കേസില്‍ യോഗി സര്‍ക്കാര്‍ ജയിലിലടച്ചിരുന്ന ഡോ: കഫീല്‍ ഖാന്റെ വാക്കുകള്‍ പങ്കുവച്ച് ഡോ: ഷിംന അസീസ്

, 5:37 pm

ഗൊരഖ്പൂരിലെ കൂട്ട ശിശുമരണത്തില്‍ നിന്നും നൂറുകണക്കിന് കുരുന്നുകളെ രക്ഷിച്ചതിന് കള്ളക്കേസുകള്‍ ചുമത്തി ജയിലിലടച്ച ഡോക്ടര്‍ കഫീല്‍ ഖാന് കഴിഞ്ഞ ദിവസമാണ് ജാമ്യം ലഭിച്ചിരുന്നത്. ജാമ്യം ലഭിച്ച ശേഷം ആദ്യമായി കേരളത്തിലെത്തിയ കഫീല്‍ ഖാനുമായി പൊതുപിപാടിയില്‍ വേദി പങ്കിട്ട ഡോ: ഷിംന അസീസ് എഴുതിയ ഫെയ്‌സ്ബുക്ക് കുറിപ്പ് വൈറലായി.

ഫെയ്‌സ്ബുക്ക് പോസ്റ്റിന്റെ പൂര്‍ണരൂപം

ഡോ. കഫീല്‍ ഖാനെ ഈ ആയുസ്സില്‍ നേരില്‍ കാണാന്‍ കഴിയുമെന്ന് പ്രതീക്ഷിച്ചതല്ല. സ്വപ്നം പോലും കാണാന്‍ മറന്ന മഹാഭാഗ്യം ഇന്ന് സഫലമായി. ജീവിതത്തില്‍ ഏറ്റവും ആരാധന തോന്നിയ ഡോക്ടര്‍, അതിലുപരി ഒരു യഥാര്‍ത്ഥ മനുഷ്യനോടൊപ്പം വേദി പങ്കിട്ടു. അദ്ദേഹത്തോട് സംസാരിച്ചു, അദ്ദേഹത്തിന് വേണ്ടി സംസാരിച്ചു.

അദ്ദേഹത്തിന്റെ വെളുത്ത കുപ്പായത്തില്‍ അഴുക്ക് പുരട്ടിയ രാഷ്ട്രീയത്തെക്കുറിച്ചും മാധ്യമങ്ങളെക്കുറിച്ചും വിശദമായിത്തന്നെ ആ പച്ചമനുഷ്യന്‍ വിവരിച്ചു. അമ്മയേയും പ്രിയപ്പെട്ടവളേയും കുഞ്ഞിനേയും കാണാത്ത എട്ടു മാസങ്ങള്‍ ഇടറിയ കണ്ഠത്തോടെ ഞങ്ങളെ ഓര്‍മ്മിപ്പിച്ചു.

ജയിലില്‍ നിന്നും ഇറങ്ങിയപ്പോള്‍ പൊട്ടിക്കരഞ്ഞ് നെഞ്ചോട് ചേര്‍ത്ത അമ്മയോട് അദ്ദേഹം പറഞ്ഞത്രേ ”നിങ്ങളുടെ മകന്‍ തിരിച്ചു വന്നിരിക്കുന്നു ഉമ്മീ… അന്ന് പോയ അറുപത് കുഞ്ഞുങ്ങള്‍ ഇനി തിരിച്ച് വരില്ലല്ലോ…” തന്റെ സസ്പെന്‍ഷന്‍ തിരിച്ചെടുത്തില്ലെങ്കില്‍ ഇനിയും പിടഞ്ഞ് തീരാന്‍ സാധ്യതയുള്ള കുഞ്ഞുങ്ങള്‍ക്ക് വേണ്ടി പൂര്‍ണമായും സൗജന്യചികിത്സയുള്ള ഒരു ആശുപത്രി തുടങ്ങണമെന്ന് അദ്ദേഹം ആഗ്രഹിക്കുന്നു. അമേരിക്കയും കാനഡയും യുഎഇയുമടക്കമുള്ള രാജ്യങ്ങളില്‍ നിന്നും വിളിക്കുമ്പോഴും ഇനിയും തന്റെ ഖൊരഗ്പൂരില്‍ തുടരുമെന്ന് സധീരം അദ്ദേഹം പ്രഖ്യാപിച്ചിരിക്കുന്നു.

ഏറെ വേദികളില്‍ ഇരുന്നിട്ടുണ്ട്. ആദ്യമായാണ് ഒരു വേദിയില്‍ ഞാനറിയാതെ കണ്ണ് നിറഞ്ഞൊഴുകുന്നത്.

ഡോ. കഫീൽ ഖാനെ ഈ ആയുസ്സിൽ നേരിൽ കാണാൻ കഴിയുമെന്ന്‌ പ്രതീക്ഷിച്ചതല്ല. സ്വപ്‌നം പോലും കാണാൻ മറന്ന മഹാഭാഗ്യം ഇന്ന് സഫലമായി….

Posted by Shimna Azeez on Sunday, 13 May 2018

 

Advertisement