ആമിര്‍ ഖാന്റെ കരിയറിലെ ഹിറ്റ് ചിത്രങ്ങളില്‍ ഒന്നാണ് 2014ല്‍ എത്തിയ ‘പികെ’. അന്ധവിശ്വാസങ്ങളെയും വിശ്വാസങ്ങളുടെ പേരില്‍ മനുഷ്യരെ ചൂഷണം ചെയ്യുന്ന ആള്‍ദൈവങ്ങളെയും ചോദ്യം ചെയ്തു കൊണ്ടെത്തിയ സിനിമ വന്‍ ഹിറ്റ് ആയിരുന്നു. ചിത്രത്തില്‍ അന്യഗ്രഹജീവി ആയാണ് ആമിര്‍ ഖാന്‍ വേഷമിട്ടത്. സിനിമയില്‍ പൂര്‍ണനഗ്നനായി അഭിനയിച്ചതിനെ കുറിച്ച് ആമിര്‍ പറഞ്ഞ വാക്കുകളാണ് ഇപ്പോള്‍ ശ്രദ്ധ നേടുന്നത്.
ചിത്രത്തിന്റെ ഓപ്പണിംഗ് സീനില്‍ ആമിര്‍ ഖാന്‍ നഗ്നനായാണ് എത്തുന്നത്. ഈ സീനില്‍ താന്‍ പൂര്‍ണ്ണ നഗ്നനായാണ് അഭിനയിച്ചത് എന്നാണ് ആമിര്‍ ഇപ്പോള്‍ തുറന്നു പറഞ്ഞിരിക്കുന്നത്. ആദ്യം ഷോര്‍ട്‌സ് ധരിച്ചിരുന്നുവെങ്കിലും അത് മാറ്റാന്‍ കാരണമുണ്ടായി എന്നും ആമിര്‍ പറയുന്നുണ്ട്. ദ കപില്‍ ശര്‍മ്മ ഷോയിലാണ് താരം സംസാരിച്ചത്.
”ഞാനൊരു ഷോര്‍ട്‌സ് ധരിച്ച് റേഡിയോയുമായി പുറത്തിറങ്ങി. സംവിധായകന്‍ രാജ്കുമാര്‍ ഹിരാനി സെറ്റില്‍ ഒരു ഫോണും ഇല്ലെന്ന് പറഞ്ഞിരുന്നു. ദൃശ്യങ്ങള്‍ പുറത്തു പോകാതിരിക്കാന്‍ വേണ്ടി എല്ലാവരുടെയും ഫോണ്‍ അദ്ദേഹം ഒളിപ്പിച്ചു വച്ചിരുന്നു. ആ സീനില്‍ എനിക്ക് ഓടേണ്ടി വന്നു. നടക്കുന്ന സമയത്ത് കുഴപ്പമില്ലായിരുന്നു, പക്ഷെ ഓടേണ്ടി വന്നപ്പോള്‍ ഷോര്‍ട്‌സ് താഴേക്ക് പോയി.”
”കാരണം അത് ടേപ്പ് വച്ച് ഒട്ടിച്ച് വച്ചതായിരുന്നു. ആ സീനില്‍ ഞാന്‍ ഒരുപാട് ബുദ്ധിമുട്ട് നേരിടേണ്ടി വന്നു. എനിക്ക് വേഗത്തില്‍ ഓടണമായിരുന്നു, എന്നാല്‍ എനിക്കത് സാധിച്ചില്ല. ഒന്ന്-രണ്ട് തവണ ശ്രമിച്ച ശേഷം ഞാന്‍ രാജുവിനോട് ഷോര്‍ട്‌സ് ഊരിമാറ്റാം എന്ന് പറഞ്ഞു. എല്ലാവരോടും ക്യാമറയ്ക്ക് പിന്നിലേക്ക് പോകാന്‍ പറഞ്ഞു. എന്നിട്ട് ഞാന്‍ ഓടി.”
”സെറ്റില്‍ നഗ്നനായി നടക്കുന്നത് ശരിക്കും വിചിത്രമായിരിക്കുമെന്ന് ഞാന്‍ കരുതിയിരുന്നു. കാരണം നമ്മള്‍ ഇതുവരെ അങ്ങനെ ശീലിച്ചിട്ടില്ല. അത് ഞാന്‍ എങ്ങനെ ചെയ്യും എന്നതിനെ കുറിച്ച് എനിക്ക് ആശങ്കയുണ്ടായിരുന്നു. എല്ലാവരും കാണില്ലേ, എനിക്ക് വളരെ ലജ്ജ തോന്നിയിരുന്നു. എന്നാല്‍ സെറ്റില്‍ എത്തിയപ്പോള്‍ ആ സീന്‍ ചെയ്യണമെന്ന് എനിക്ക് തോന്നി.”
”അതുകൊണ്ട് ഞാന്‍ രാജുവിനോട് പറഞ്ഞു, ഇത് പ്രധാനമായ ഷോട്ട് ആണ്, നിങ്ങള്‍ എന്നെ നഗ്നനായി കണ്ടാല്‍ എന്താണ് വലിയ കാര്യം? ആ ഷോട്ട് എടുക്കണം എന്ന് പറഞ്ഞു. ആ സമയത്ത് എനിക്ക് നാണക്കേട് തോന്നിയില്ല. ഞാന്‍ അത് ചെയ്തു എന്നതില്‍ ഞാനും ഞെട്ടിയിരുന്നു” എന്നാണ് ആമിര്‍ ഖാന്‍ പറയുന്നത്.