400 കോടി കളക്ഷനും പിന്നിട്ട് കുതിപ്പ് തുടരുകയാണ് ‘ഗദര്‍ 2’. 2001ല്‍ പുറത്തിറക്കിയ ഗദര്‍ ആദ്യ ഭാഗത്തിന്റെ രണ്ടാം ഭാഗമാണ് ഗദര്‍ 2. ആദ്യ ഭാഗമൊരുക്കിയ അനില്‍ ശര്‍മയാണ് ചിത്രത്തിന്റെ സംവിധായകന്‍. അമീഷ പട്ടേല്‍ തന്നെയാണ് രണ്ടാം ഭാഗത്തിലും ചിത്രത്തില്‍ നായികയായത്.
ഗദര്‍ ആദ്യ ഭാഗവും സൂപ്പര്‍ ഹിറ്റ് ആയിരുന്നു. എന്നാല്‍ ആ ചിത്രത്തിന് ശേഷം സംവിധായകന്‍ സഞ്ജയ് ലീല ബന്‍സാലി തന്നോട് വിരമിക്കാന്‍ ആവശ്യപ്പെട്ടിരുന്നുവെന്ന് വെളിപ്പെടുത്തിയിരിക്കുകയാണ് അമീഷ പട്ടേല്‍ ഇപ്പോള്‍. ”അമീഷ നീ ഇപ്പോള്‍ തന്നെ അഭിനയം നിര്‍ത്തൂ. എന്തു കൊണ്ടാണെന്ന് ഞാന്‍ ചോദിച്ചു.”
”ഭൂരിഭാഗം പേരും തങ്ങളുടെ മുഴുവന്‍ കരിയറിലും നേടാന്‍ കഴിയാത്തത് രണ്ടു ചിത്രങ്ങളിലൂടെ നിങ്ങള്‍ നേടി. ജീവിതത്തില്‍ ഒരിക്കല്‍ മാത്രം ഉണ്ടാകുന്ന ചിത്രങ്ങളാണ് മുഗള്‍ ഇ-അസം, മദര്‍ ഇന്ത്യ, പക്കീസ പോലുള്ളവ. അത് നിങ്ങള്‍ രണ്ടാമത്തെ ചിത്രത്തിലൂടെ നേടി.”
”ഇനി എന്തിനാണ് അടുത്തത്? സിനിമയില്‍ ഞാന്‍ പുതുമുഖമായതിനാല്‍ എനിക്കത് അന്ന് മനസിലായില്ല” എന്നാണ് അമീഷ പറഞ്ഞത്. ഗദര്‍ 2വിന്റെ ഗംഭീര വിജയത്തിനെ കുറിച്ചും അമീഷ പറയുന്നുണ്ട്. ഇങ്ങനെയൊരു ഗംഭീര വിജയം ഉണ്ടാകുമെന്ന് താന്‍ പ്രതീക്ഷിച്ചില്ല എന്നാണ് അമീഷ പറയുന്നത്.
”ഇങ്ങനെയൊന്ന് ആരും പ്രതീക്ഷിച്ചില്ല. എന്ത് സംഭവിക്കുമെന്ന് എനിക്കറിയില്ല. ഇപ്പോള്‍, വീണ്ടും ചരിത്രം സൃഷ്ടിച്ച ഒരു സൂപ്പര്‍ വിജയചിത്രത്തിന്റെ ആനന്ദം ആസ്വദിക്കുകയാണ് എല്ലാവരും” ഗദര്‍ 2വിന്റെ വിജയത്തെ കുറിച്ച് ചോദിച്ചപ്പോള്‍ അമീഷ പറഞ്ഞു.