കങ്കണ റണാവത്ത് ഒരു അസാധ്യ സംവിധായികയാണെന്ന് നടന്‍ അനുപം ഖേര്‍. മുന്‍ പ്രധാനമന്ത്രി ഇന്ദിരാ ഗാന്ധിയായി കങ്കണ വേഷമിടുന്ന എമര്‍ജന്‍സി ചിത്രം സംവിധാനം ചെയ്യുന്നതും നിര്‍മ്മിക്കുന്നതും കങ്കണ തന്നെയാണ്. ചിത്രത്തില്‍ അഭിനയിച്ചപ്പോഴുണ്ടായ അനുഭവങ്ങളാണ് അനുപം ഖേര്‍ പങ്കുവച്ചിരിക്കുന്നത്.
”ഞാന്‍ അടുത്തിടെ കങ്കണയുടെ ഒരു ചിത്രത്തില്‍ പ്രവര്‍ത്തിച്ചു. അവര്‍ മികച്ചൊരു സംവിധായികയാണ്. ഇടക്കിടെ എന്റെ ചെവിയില്‍ കങ്കണ ചില നിര്‍ദേശങ്ങള്‍ മന്ത്രിക്കും, അത് എന്നെ അത്ഭുതപ്പെടുത്തും” എന്നാണ് അനുപം ഖേര്‍ പറഞ്ഞത്. ”എപ്പോഴും ദയയും കൃപയുമുള്ളയാള്‍” എന്നാണ് അനുപം ഖേറിന്റെ വാക്കുകളോട് കങ്കണയുടെ പ്രതികരണം.
സിനിമയ്ക്കായി ഇന്ദിരാ ഗാന്ധിയുടെ മേക്കോവറില്‍ എത്തിയ കങ്കണയുടെ ഫസ്റ്റ്‌ലുക്ക് പോസ്റ്റര്‍ ഏറെ ശ്രദ്ധ നേടിയിരുന്നു. ഇത് രണ്ടാം തവണയാണ് കങ്കണ സംവിധായികയുടെ തൊപ്പി അണിയുന്നത്. 2019 ല്‍ റാണി ലക്ഷ്മി ഭായിയുടെ ജീവിതം പ്രമേയമാക്കി ഒരുങ്ങിയ ‘മണികര്‍ണിക’യാണ് കങ്കണ മുന്‍പ് സംവിധാനം ചെയ്ത ചിത്രം.
‘എമര്‍ജന്‍സി’ ഒരു ജീവചരിത്ര സിനിമയല്ലെന്നും പൊളിറ്റിക്കല്‍ ഡ്രാമയാണെന്നും കങ്കണ ഒരു അഭിമുഖത്തതില്‍ പറഞ്ഞിരുന്നു. റിതേഷ് ഷായുടേതാണ് തിരക്കഥ. ഓസ്‌കാര്‍, ബാഫ്റ്റ അവാര്‍ഡ് നേടിയ മേക്കപ്പ് ആര്‍ട്ടിസ്റ്റ് ഡേവിഡ് മാലിനോവ്സ്‌ക് ആണ് ‘എമര്‍ജന്‍സി’യ്ക്കായി മേക്കപ്പ് ഒരുക്കുന്നത്. മണികര്‍ണിക ഫിലിംസിന്റെ ബാനറില്‍ കങ്കണയും രേണു പിറ്റിയും ചേര്‍ന്നാണ് ചിത്രം നിര്‍മ്മിക്കുന്നത്.
