എന്തുകൊണ്ടാണ് ഷാരൂഖ് ഖാനൊപ്പം സിനിമ ചെയ്യാത്തതെന്ന് തുറന്നു പറഞ്ഞ് സംവിധായകന്‍ അനുരാഗ് കശ്യപ്. ആരാധകര്‍ക്ക് വേണ്ട രീതിയില്‍ ഷാരൂഖ് ഖാനെ അവതരിപ്പിക്കാനുള്ള കപ്പാസിറ്റി തനിക്ക് ഇല്ല എന്നാണ് പരിഹാസത്തോടെ അനുരാഗ് കശ്യപ് പറയുന്നത്. ഹ്യൂമന്‍സ് ഓഫ് സിനിമയ്ക്ക് നല്‍കിയ അഭിമുഖത്തിലാണ് അനുരാഗ് കശ്യപ് സംസാരിച്ചത്.
”സോഷ്യല്‍ മീഡിയ ഭരിക്കുന്ന ഈ കാലത്ത് ഒരുപാട് ആരാധകരുള്ള വലിയ താരങ്ങളെ എനിക്ക് പേടിയാണ്. ആരാധകര്‍ കാരണം താരങ്ങള്‍ ടൈപ്കാസ്റ്റ് ചെയ്യപ്പെട്ടു പോവുകയാണ്, കാരണം ആരാധകര്‍ക്ക് എന്നും ഒരുപോലത്തെ കഥാപാത്രങ്ങളാണ് അവരില്‍ നിന്നും വേണ്ടത്. അങ്ങനെല്ല സംഭവിക്കുന്നതെങ്കില്‍ ഫാന്‍സ് അത് നിരസിക്കും.”
”അതുകൊണ്ട് താരങ്ങള്‍ വ്യത്യസ്തമായ കഥാപാത്രങ്ങള്‍ ചെയ്യാന്‍ പേടിക്കും. അതുകൊണ്ട് ഷാരൂഖ് ഖാന്റെ പ്രഭാവലയമോ പ്രഹേളികയോ ചിത്രീകരിക്കാനുള്ള കഴിവ് എനിക്ക് ഇല്ല. അദ്ദേഹത്തിന്റെ ഫാന്‍ എന്ന സിനിമ വിജയിച്ചിരുന്നുവെങ്കില്‍ ഞാന്‍ ധൈര്യത്തോടെ അദ്ദേഹത്തിനൊപ്പം പ്രവര്‍ത്തിച്ചേനെ.”
”താരങ്ങളെ ആരാധിക്കുന്നവരുടെ നാടാണ് നമ്മുടേത്. അതുകൊണ്ട് തന്നെ നമുക്ക് ആത്മവിശ്വാസവും ആത്മാഭിമാനവും ഒക്കെ കുറവാണ്. നമുക്ക് നായകന്മാരെ വേണം. സൂപ്പര്‍ ഹീറോകള്‍ ആയി അഭിനയിക്കുമ്പോള്‍ മുഖം മറച്ച് വയക്കാത്ത അഭിനേതാക്കളുള്ള ഒരേയൊരു രാജ്യം നമ്മുടേതാണ്.”
”മാസ്‌ക് ഉണ്ടെങ്കിലും അത് ചെറുതായിരിക്കും, കാരണം താരങ്ങളുടെ മുഖത്തിനാണ് പ്രധാന്യം” എന്നാണ് അനുരാഗ് കശ്യപ് പറയുന്നത്. അതേസമയം, കാന്‍ ഫിലിം ഫെസ്റ്റിവലില്‍ പ്രദര്‍ശിപ്പിച്ച ‘കെന്നഡി’ ആണ് അനുരാഗിന്റെ സംവിധാനത്തില്‍ എത്തിയ അവസാന ചിത്രം. പുതിയൊരു ചിത്രത്തിന്റെ തിരക്കിലാണ് സംവിധായകന്‍ ഇപ്പോള്‍. ചിത്രത്തിന്റെ പേര് ഇതുവരെ പുറത്തുവിട്ടിട്ടില്ല.