വിജയ്‌യെ നായകനാക്കി അറ്റ്ലീ ഒരുക്കിയ ഹിറ്റ് ചിത്രം ‘തെരി’യുടെ ഹിന്ദി റീമേക്ക് റിലീസിന് ഒരുങ്ങുന്നു. ‘ബേബി ജോണ്‍’ എന്ന പേരില്‍ എത്തുന്ന ചിത്രത്തിലൂടെ നടി കീര്‍ത്തി സുരേഷ് ബോളിവുഡിലേക്ക് അരങ്ങേറ്റം കുറിക്കുകയാണ്. വരുണ്‍ ധവാന്‍ ആണ് ചിത്രത്തില്‍ നായകനാകുന്നത്.
2019ല്‍ ജീവയെ നായകനാക്കി ‘കീ’ എന്ന ചിത്രമൊരുക്കിയ കലീസ് ആണ് ഈ ബോളിവുഡ് ചിത്രം സംവിധാനം ചെയ്യുന്നത്. ‘തെരി’ സിനിമയുടെ അതേ ഫോര്‍മാറ്റിലാണ് ഹിന്ദി റീമേക്കും ഒരുക്കിയിരിക്കുന്നതെന്ന് ടീസറില്‍ നിന്നു വ്യക്തമാണ്. ക്രിസ്മസ് റിലീസായി ചിത്രം തിയേറ്ററുകളിലെത്തും.
അതേസമയം, സാമന്തയും എമി ജാക്‌സണുമായിരുന്നു ‘തെരി’യിലെ നായികമാര്‍. ഹിന്ദിയിലെത്തുമ്പോള്‍ സാമന്ത അവതരിപ്പിച്ച വേഷമാകും കീര്‍ത്തി അവതരിപ്പിക്കുക. എമി ജാക്‌സണ്‍ അവതരിപ്പിച്ച കഥാപാത്രമായി വാമിഖ ഗബ്ബി എത്തും. ജാക്ക് ഷ്രോഫ് ആണ് വില്ലന്‍.
2016ല്‍ അറ്റ്ലീ ഒരുക്കിയ ചിത്രമാണ് തെരി. വിജയ്കുമാര്‍ എന്ന പൊലീസ് ഉദ്യോഗസ്ഥനായി വിജയ് എത്തിയ ചിത്രം ബോക്‌സ് ഓഫീസിലും വലിയ വിജയമായിരുന്നു. പ്രിയ അറ്റ്ലീ, മുറാദ് ഖേതനി, ജ്യോതി ദേശ്പാണ്ഡെ എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്.