മുന്‍ ഇന്ത്യന്‍ വനിതാ ക്രിക്കറ്റ് ടീം ക്യാപ്റ്റന്‍ ജുലന്‍ ഗോസ്വാമിയുടെ ജീവിതം സിനിമയാകുന്നു. ഛക്ദ എക്സ്പ്രസ് എന്ന് പേരിട്ടിരിക്കുന്ന ചിത്രത്തില്‍ അനുഷ്‌ക ശര്‍മ്മ ആണ് നായികയാവുന്നത്. വനിതാ ക്രിക്കറ്റിലെ മികച്ച പേസ് ബോളര്‍മാരില്‍ ഒരാളായിരുന്നു ജുലന്‍ ഗോസ്വാമി. ഒരിടവേളയ്ക്ക് ശേഷം അനുഷ്‌ക വീണ്ടും സിനിമയിലേക്ക് എത്തുന്ന ചിത്രമാണിത്.
ഇത് വളരെ സവിശേഷമായ ഒരു സിനിമയാണ്, കാരണം ഇത് ഒരു വലിയ ത്യാഗത്തിന്റെ കഥയാണ് എന്നാണ് അനുഷ്‌ക സോഷ്യല്‍ മീഡിയയില്‍ കുറിച്ചിരിക്കുന്നത്. മുന്‍ ഇന്ത്യന്‍ ക്യാപ്റ്റന്‍ ജുലന്‍ ഗോസ്വാമിയുടെ ജീവിതത്തില്‍ നിന്ന് പ്രചോദനം ഉള്‍ക്കൊണ്ട് ഒരുക്കുന്ന ചക്ദ എക്സ്പ്രസ്, വനിതാ ക്രിക്കറ്റിന്റെ ലോകത്തേക്ക് കണ്ണു തുറക്കുന്ന ചിത്രമാണ്.
ഒരു ക്രിക്കറ്റ് താരമാകാനും ആഗോളവേദിയില്‍ തന്റെ രാജ്യത്തിന് അഭിമാനം നല്‍കാനും ജുലന്‍ തീരുമാനിച്ച സമയം കായികരംഗത്തെ കുറിച്ച് ചിന്തിക്കാന്‍ പോലും സ്ത്രീകള്‍ക്ക് സാധിക്കാതിരുന്ന സമയമായിരുന്നു. ഈ സിനിമ അവരുടെ ജീവിതത്തെയും വനിതാ ക്രിക്കറ്റിനെയും രൂപപ്പെടുത്തിയ നിരവധി സംഭവങ്ങളുടെ നാടകീയമായ പുനരാഖ്യാനമാണ് എന്നാണ് അനുഷ്‌ക കുറിച്ചിരിക്കുന്നത്.
2021ല്‍ മകള്‍ വാമിക പിറന്നതിനു ശേഷം അനുഷ്‌കയുടെ ആദ്യ ചിത്രമാണ് ചക്ദാ എക്സ്പ്രസ്. 2018ല്‍ പുറത്തിറങ്ങിയ സീറോ ആയിരുന്നു അനുഷ്‌കയുടെ അവസാന ചിത്രം. 2017ല്‍ ആണ് അനുഷ്‌ക ഇന്ത്യന്‍ ക്രിക്കറ്റ് താരം വിരാട് കോഹ്‌ലിയെ വിവാഹം ചെയ്തത്.