ലോക്‌സഭാ തിരഞ്ഞെടുപ്പിന്റെ അഞ്ചാം ഘട്ടത്തില്‍ വോട്ട് ചെയ്യാനെത്തി ബോളിവുഡ് താരങ്ങള്‍. ഫര്‍ഹാന്‍ അക്തര്‍, സോയ അക്തര്‍, പരേഷ് റാവല്‍, സുനില്‍ ഷെട്ടി, ധര്‍മേന്ദ്ര, വരുണ്‍ ധവാന്‍, ഹേമ മാലിനി, ഇഷ ഡിയോള്‍, ബോണി കപൂര്‍, ഖുഷി കപൂര്‍, മനോജ് ബാജ്പേയി, ഷബാന റാസ തുടങ്ങി നിരവധി താരങ്ങള്‍ വോട്ട് ചെയ്യാനെത്തി.
ദീപിക പദുക്കോണും രണ്‍വീര്‍ സിംഗും വോട്ട് ചെയ്യാനെത്തിയ വീഡിയോ ശ്രദ്ധ നേടിക്കൊണ്ടിരിക്കുകയാണ്. കാറില്‍ നിന്നിറങ്ങാന്‍ ഗര്‍ഭിണിയായ ദീപികയെ സഹായിക്കുന്ന രണ്‍വീര്‍, താരത്തെ കൈപ്പിടിച്ചു നടത്തുന്നതും വീഡിയോയില്‍ കാണാം. ഫെബ്രുവരി 29നാണ് ദീപികയും രണ്‍വീറും തങ്ങള്‍ മാതാപിതാക്കള്‍ ആകാന്‍ പോകുന്ന വിവരം പ്രഖ്യാപിച്ചത്.
View this post on Instagram
ഈ വര്‍ഷം സെപ്റ്റംബറില്‍ കുഞ്ഞ് എത്തുമെന്ന് ഇരുവരും സോഷ്യല്‍ മീഡിയയിലൂടെ ആരാധകരെ അറിയിച്ചിരുന്നു. എന്നാല്‍ ദീപികയുടെത് വാടകഗര്‍ഭധാരണമാണ് എന്ന് ആരോപിച്ച് നിരവധി വിമര്‍ശനങ്ങളും ഉയര്‍ന്നിരുന്നു. താരങ്ങള്‍ ഇരുവരും ഇത്തരം വാര്‍ത്തകളോട് പ്രതികരിച്ചിരുന്നില്ല.
വോട്ട് ചെയ്യാന്‍ നിറവയറുമായി എത്തിയ താരത്തിന്റെ വീഡിയോ വിമര്‍ശകര്‍ക്ക് മറുപടി നല്‍കിയിരിക്കുകയാണ്. 2018 നവംബര്‍ 14ന് ഇറ്റലിയിലെ ലേക്ക് കോമോയില്‍ വച്ചായിരുന്നു ദീപികയുടെയും രണ്‍വീര്‍റിന്റെയും വിവാഹം. ആറ് വര്‍ഷത്തോളം ഇരുവരും ഡേറ്റിംഗിലായിരുന്നു.
സഞ്ജയ് ലീല ബന്‍സാലിയുടെ ഗോലിയോന്‍ കി രാസ് ലീല രാം ലീലയുടെ സെറ്റില്‍ വെച്ചാണ് ഇരുവരും പ്രണയത്തിലാകുന്നത്. ഫൈന്‍ഡിംഗ് ഫാനി, പദ്മാവത്, ബാജിറാവു മസ്താനി തുടങ്ങിയ ചിത്രങ്ങളില്‍ ഇരുവരും ഒന്നിച്ച് അഭിനയിച്ചിട്ടുണ്ട്. സിങ്കം എഗെയ്ന്‍ എന്ന ചിത്രമാണ് ഇരുവരുടെതായി ഇനി റിലീസിന് ഒരുങ്ങുന്നത്.