95-ാമത് ഓസ്‌കര്‍ വേദിയില്‍ അവതാരകയായി എത്തിയ ദീപിക പദുക്കോണ്‍ ഇന്ത്യയ്ക്ക് അഭിമാനമായി മാറിയിരുന്നു. ആര്‍ആര്‍ആര്‍ സിനിമയെ കുറിച്ചും ‘നാട്ടു നാട്ടു’ എന്ന ഗാനത്തെ പറ്റിയും സംസാരിച്ച ദീപിക ഇത്തവണത്തെ ഓസ്‌കര്‍ വേദിയിലെ ഇന്ത്യന്‍ സാന്നിധ്യത്തിന് മാറ്റ് കൂട്ടി.
മനോഹരമായ ബ്ലാക്ക് ഗൗണില്‍ അതിസുന്ദരിയായാണ് ദീപിക വേദിയിലെത്തിയത്. വെല്‍വറ്റ് കയ്യുറകളും ഡയമണ്ട് നെക്ലേസും ദീപികയുടെ ലുക്കിന് മിഴിവേകിയിരുന്നു. തന്റെ സ്‌റ്റൈലിഷ് ലുക്കിലുള്ള ചിത്രങ്ങള്‍ ദീപിക സോഷ്യല്‍ മീഡിയയിലും ഷെയര്‍ ചെയ്തിരുന്നു.
ദീപികയുടെ പുതിയ ടാറ്റൂവും ചിത്രങ്ങളില്‍ തെളിഞ്ഞു കാണാമായിരുന്നു. ചെവിക്ക് തൊട്ട് താഴെ, കഴുത്തിലായി ’82°E’ എന്നെഴുതിയ ടാറ്റൂവാണ് ശ്രദ്ധ നേടുന്നത്. ഇതോടെ എന്താണ് ഈ 82°E? എന്നാണ് ആരാധകര്‍ ഗൂഗിളില്‍ തിരഞ്ഞത്. ദീപികയുടെ പുതിയ ബ്രാന്‍ഡാണിത്.
ദീപിക പദുകോണും ജിഗര്‍ ഷായും ചേര്‍ന്നാണ് ഈ സ്‌കിന്‍കെയര്‍ ബ്രാന്‍ഡ് സ്ഥാപിച്ചത്. കഴിഞ്ഞ നവംബറില്‍ ഈ ബ്രാന്‍ഡില്‍ നിന്നുള്ള സ്‌കിന്‍ കെയര്‍ ഉല്‍പ്പന്നങ്ങള്‍ വിപണിയിലെത്തി തുടങ്ങിയിരുന്നു. ടാറ്റൂവില്‍ വരെ തന്റെ ബ്രാന്‍ഡിനെ രേഖപ്പെടുത്തിയ താരത്തിന്റെ പ്രതിബദ്ധതയെ ആഘോഷമാക്കുകയാണ് ആരാധകര്‍.
എന്നാല്‍ ഈ ടാറ്റൂ പെര്‍മനെന്റ് ആണോ പെട്ടെന്ന് മാഞ്ഞു പോകുന്ന തരത്തിലാണോ എന്നതില്‍ വ്യക്തതയില്ല. അതേസമയം, ദീപിക പദുക്കോണിന്റെ ആദ്യ ഓസ്‌കര്‍ അവതരണമാണ് ഇതെങ്കിലും, ആദ്യ ഇന്ത്യക്കാരി എന്ന നേട്ടം മറ്റൊരാള്‍ക്കാണ്. 1980ല്‍ മോഡല്‍ പെര്‍സിസ് ഖംബട്ടയാണ് ഓസ്‌കാര്‍ അവാര്‍ഡ് അവതരിപ്പിച്ച ആദ്യ ഇന്ത്യക്കാരി.