വന്കുടലിലെ അണുബാധയെ തുടര്ന്ന് ബോളിവുഡ് താരം ഇര്ഫാന് ഖാന് ഗുരുതരാവസ്ഥയില്. മുംബൈ കോകിലാബെന് ധീരുഭായ് അംബാനി ആശുപത്രിയില് തീവ്ര പരിചരണ വിഭാഗത്തില് ചികിത്സയിലാണെന്ന് താരത്തിന്റെ വക്താവ് അറിയിച്ചു. ചൊവ്വാഴ്ച രാവിലെയാണ് ആരോഗ്യനില വഷളായതിനെ തുടര്ന്ന് താരത്തെ ആശുപത്രിയിലെത്തിച്ചത്.
താരം ഡോക്ടറുടെ നിരീക്ഷണത്തിലാണെന്നും വേഗം സുഖം പ്രാപിക്കുമെന്ന് പ്രതീക്ഷിക്കുന്നതായും ഇര്ഫാന് ഖാനുമായി ബന്ധപ്പെട്ട വൃത്തങ്ങള് അറിയിക്കുന്നു. രോഗത്തോട് പൊരുതുകയാണെന്നും വ്യാജ വാര്ത്തകള് പ്രചരിപ്പിക്കരുതെന്നും അദ്ദേഹത്തിന്റെ വക്താവ് വ്യക്തമാക്കി. 2018-ല് ഇര്ഫാന് ന്യൂറോ എന്ഡോക്രൈന് ട്യൂമര് കണ്ടെത്തിയിരുന്നു.
തുടര്ന്ന് വിദേശത്ത് ചികിത്സ തേടിയ താരം അടുത്തിടെയാണ് അഭിനയരംഗത്ത് വീണ്ടും സജീവമായത്. ശനിയാഴ്ച ഇര്ഫാന്റെ മാതാവ് സയീദ ബീഗം മരിച്ചിരുന്നു. എന്നാല് ലോക്ഡൗണ് കാരണം താരത്തിന് മരണാനന്തര ചടങ്ങുകളില് എത്താന് കഴിഞ്ഞിരുന്നില്ല. ഭാര്യക്കും മക്കള്ക്കുമൊപ്പം മുംബൈയിലാണ് ഇര്ഫാന് താമസിക്കുന്നത്.