‘പത്താന്‍’ ചിത്രത്തിന്റെ റിലീസിനായി ഏറെ പ്രതീക്ഷയോടെയാണ് ആരാധകര്‍ കാത്തിരിക്കുന്നത്. വര്‍ഷങ്ങള്‍ക്ക് ശേഷം എത്തുന്ന ഷാരൂഖ് ചിത്രമായതു കൊണ്ട് തന്നെ മികച്ച പ്രീ ബുക്കിംഗ് ആണ് സിനിമയ്ക്ക് ലഭിക്കുന്നത്. ജനുവരി 25ന് ആണ് ചിത്രം തിയേറ്ററുകളിലെത്തുന്നത്.
സിനിമയില്‍ ഹൃത്വിക് റോഷനും ഉണ്ടാവുമെന്ന വാര്‍ത്തകളാണ് ഇപ്പോള്‍ എത്തുന്നത്. യഷ് രാജ് ഫിലിംസിന്റെ സ്പൈ യൂണിവേഴ്സിന്റെ ഭാഗമായി ‘ഏക് ഥാ ടൈഗര്‍’ സിനിമാ സീരിസിലെ സല്‍മാന്‍ ഖാനും ‘വാര്‍’ സിനിമയിലെ ഹൃത്വിക് റോഷനും പത്താനില്‍ എത്തുമെന്നായിരുന്നു അഭ്യൂഹങ്ങള്‍.
ടൈഗര്‍ എന്ന കഥാപാത്രമായി സല്‍മാന്‍ ഖാന്‍ ചിത്രത്തില്‍ കാമിയോ റോളില്‍ എത്തുന്നുണ്ട്. എന്നാല്‍ സല്‍മാനൊപ്പം ഹൃത്വിക് റോഷന്‍ എത്തില്ല എന്ന വാര്‍ത്തകളും വരുന്നുണ്ട്. സ്പൈ യൂണിവേഴ്സിന്റെ ഭാഗമായി ആദ്യ ചിത്രത്തില്‍ തന്നെ മൂവരേയും ഒരുമിച്ച് കൊണ്ടുവരുന്നതില്‍ കാര്യമില്ല.
അവസാന ചിത്രത്തില്‍ മൂവരും ഒരുമിച്ചാലേ രസമുള്ളു എന്നും സിനിമയുമായി ബന്ധപ്പെട്ട വൃത്തങ്ങള്‍ പറഞ്ഞതായി റിപ്പോര്‍ട്ടുകളുണ്ട്. അതുകൊണ്ട് തന്നെ ടൈഗര്‍, വാര്‍, പത്താന്‍ സിനിമാ സീരിസുകളില്‍ ഏതെങ്കിലും ഒരു ചിത്രത്തില്‍ മൂവരും ഒരുമിച്ച് എത്താനുള്ള സാധ്യത ഇതോടെ ശക്തമായിട്ടുണ്ട്.
അതേസമയം, ദീപിക പദുകോണ്‍, ജോണ്‍ എബ്രഹാം എന്നിവരും പത്താനിലുണ്ട്. സിദ്ധാര്‍ഥ് ആനന്ദ് സംവിധാനം ചെയ്യുന്ന ചിത്രമാണ് പത്താന്‍. ചിത്രത്തിന്റെ ഡിജിറ്റല്‍ റൈറ്റ്സ് ആമസോണ്‍ പ്രൈം വീഡിയോയാണ് സ്വന്തമാക്കിയിരിക്കുന്നത്.