‘എമര്‍ജന്‍സി’ എന്ന സിനിമയ്ക്ക് ശേഷം വീണ്ടുമൊരു ബയോപിക്കുമായി നടി കങ്കണ റണാവത്ത് എത്തുന്നുവെന്ന് റിപ്പോര്‍ട്ടുകള്‍. കങ്കണ പങ്കുവച്ചിരിക്കുന്ന ഇന്‍സ്റ്റഗ്രാം പോസ്റ്റ് ആണ് ഈ ആരോപണങ്ങള്‍ക്ക് പിന്നില്‍. മധുബാലയുടെ ചിത്രങ്ങളാണ് കങ്കണ ഇന്‍സ്റ്റഗ്രാമില്‍ പങ്കുവച്ചിരിക്കുന്നത്.
താന്‍ ചെറുപ്പക്കാലത്ത് മധുബാലയുടെ തനിപ്പകര്‍പ്പായിരുന്നു എന്നാണ് ചിത്രങ്ങള്‍ പങ്കുവച്ച് കങ്കണ കുറിക്കുന്നത്. മധുബാലയുടെയും തന്റെയും ഏതാനും ചിത്രങ്ങളും കങ്കണ ഷെയര്‍ ചെയ്തിട്ടുണ്ട്. മധുബാലയെ താന്‍ സ്‌ക്രീനില്‍ അവതരിപ്പിക്കണമെന്ന് ആളുകള്‍ ആഗ്രഹിക്കുന്നുണ്ടെന്നും കങ്കണ പറയുന്നുണ്ട്.
”ആളുകള്‍ സ്‌ക്രീനില്‍ ഞാന്‍ സിനിമാ ദേവതയായ മധുബാലയെ അവതരിപ്പിക്കണമെന്ന് ആഗ്രഹിക്കുന്നു. എന്റെ തുടക്കക്കാലത്ത് ഞാന്‍ മധുബാലയുടെ തനിപ്പകര്‍പ്പായിരുന്നു, ഇപ്പോള്‍ ആ ഛായയുണ്ടോ എന്നറിയില്ല” എന്നാണ് കങ്കണ കുറിച്ചിരിക്കുന്നത്.
ഇതോടെയാണ് കങ്കണ വീണ്ടുമൊരു ബയോപിക്കിനായി ഒരുങ്ങുകയാണെന്ന വാര്‍ത്തകള്‍ എത്താന്‍ ആരംഭിച്ചത്. ‘എമര്‍ജന്‍സി’ ആണ് താരത്തിന്റെതായി റിലീസിന് ഒരുങ്ങുന്നത്. ചിത്രത്തില്‍ ഇന്ദിരാ ഗാന്ധി ആയാണ് കങ്കണ വേഷമിടുന്നത്. ചിത്രത്തിന്റെ സംവിധാനവും നിര്‍മ്മാണവും കങ്കണ തന്നെയാണ്.