ബോളിവുഡിലെ മൂന്ന് ഖാന്‍മാര്‍ക്കൊപ്പവും സിനിമ ചെയ്യാന്‍ താല്‍പര്യമുണ്ടെന്ന് നടിയും ബിജെപി എംപിയുമായ കങ്കണ റണാവത്ത്. ഷാരൂഖ് ഖാന്‍, ആമിര്‍ ഖാന്‍, സല്‍മാന്‍ ഖാന്‍ എന്നിവര്‍ക്കൊപ്പം സിനിമ ചെയ്യാനുള്ള ആഗ്രഹത്തെ കുറിച്ചാണ് കങ്കണ തുറന്നു പറഞ്ഞിരിക്കുന്നത്.
അവരിലെ കഴിവിനെ തുറന്നുകാണിക്കാന്‍ ആഗ്രഹമുണ്ട്. അവര്‍ നല്ല കഴിവുള്ളവരാണ്. ഇന്‍ഡസ്ട്രിയിലേക്ക് ധാരാളം വരുമാനം കൊണ്ടുവരുന്നുണ്ട്. അതിന് നാം നന്ദിയുള്ളവരായിരിക്കണം എന്നാണ് കങ്കണ പറയുന്നത്. അതേസമം, കങ്കണയുടെ ‘എമര്‍ജന്‍സി’ തിയേറ്ററുകളിലേക്ക് എത്താനിരിക്കുകയാണ്.
ചിത്രത്തിന്റെ ട്രെയ്‌ലര്‍ ലോഞ്ചില്‍ വച്ചാണ് കങ്കണ ഖാന്‍മാരൊപ്പം സിനിമ ചെയ്യനുള്ള ആഗ്രഹം തുറന്നുപറഞ്ഞത്. കങ്കണ ഇന്ദിര ഗാന്ധിയായി വേഷമിടുന്ന ചിത്രം താരം തന്നെയാണ് സംവിധാനം ചെയ്യുന്നതും നിര്‍മ്മിക്കുന്നതും. ചിത്രത്തില്‍ സഞ്ജയ് ഗാന്ധിയായി വേഷമിടുന്നത് മലയാളി താരം വൈശാഖ് നായരാണ്.
അനുപം ഖേര്‍, ശ്രേയസ് തല്‍പഡെ, മഹിമ ചൗധരി, മിലിന്ദ് സോമന്‍, സതീഷ് കൗശിക് എന്നിവരാണ് ചിത്രത്തിലെ മറ്റ് പ്രധാന അഭിനേതാക്കള്‍. കങ്കണയുടെ രണ്ടാമത് സംവിധാനമാണിത്. 2019ല്‍ പുറത്തെത്തിയ ‘മണികര്‍ണിക: ദ് ക്വീന്‍ ഓഫ് ഝാന്‍സി’ ആയിരുന്നു നടി സംവിധാനം ചെയ്ത ആദ്യ ചിത്രം.
