‘തലൈവി’ക്ക് ശേഷം കങ്കണ റണാവത്ത് വീണ്ടും തമിഴിലേക്ക്. മലയാളത്തിലെ സൂപ്പര്‍ ഹിറ്റ് ചിത്രം ‘മണിച്ചിത്രത്താഴി’ന്റെ തമിഴ് റീമേക്കായ ‘ചന്ദ്രമുഖി’ സിനിമയുടെ രണ്ടാം ഭാഗത്തില്‍ കങ്കണ നായികയാകും. ചന്ദ്രമുഖി ഒരുക്കിയ സംവിധായകന്‍ പി. വാസു തന്നെയാണ് ചിത്രത്തിന്റെ രണ്ടാം ഭാഗവും ഒരുക്കുന്നത്.
പി. വാസുവിന്റെ സംവിധാനത്തില്‍ മറ്റൊരു തമിഴ് ചിത്രത്തില്‍ അവസരം ലഭിച്ചതിനെ ഏറെ ആവേശത്തോടെയാണ് നോക്കിക്കാണുന്നതെന്ന് കങ്കണ ഇന്‍സ്റ്റഗ്രാമില്‍ കുറിച്ചു. ചന്ദ്രമുഖി 2 ഒരുക്കുന്ന വിവരം നടനും സംവിധായകനുമായ രാഘവ ലോറന്‍സ് നേരത്തെ പ്രഖ്യാപിച്ചിരുന്നു.
കങ്കണയുടെ നായകനായി രാഘവ ചിത്രത്തിലെത്തും. ജ്യോതിക ആയിരുന്നു ചിത്രത്തിന്റെ ആദ്യ ഭാഗത്തില്‍ നായിക. 2005ല്‍ പുറത്തിറങ്ങിയ ചിത്രം വന്‍ ജനപ്രീതി നേടിയിരുന്നു. രജനികാന്ത്, പ്രഭു എന്നിവര്‍ ആയിരുന്നു ചിത്രത്തില്‍ നായകന്‍മാരായി എത്തിയത്. നയന്‍താരയും ചിത്രത്തില്‍ പ്രധാന കഥാപാത്രമായിരുന്നു.
സിനിമയുടെ സീക്വല്‍ ആയി തെലുങ്കില്‍ അനുഷ്‌ക്ക ഷെട്ടിയെ നായികയാക്കി ‘നാഗവല്ലി’ എന്ന സിനിമയും വാസു ഒരുക്കിയിരുന്നു. മണിച്ചിത്രത്താഴിന്റെ ഹിന്ദി റീമേക്ക് ‘ഭൂല്‍ ഭുലയ്യ’ ആണ്. സിനിമയുടെ രണ്ടാം ഭാഗമായി ‘ഭൂല്‍ ഭുലയ്യ 2’ ഈ വര്‍ഷം എത്തിയിരുന്നു.
മെയ് 20ന് തിയേറ്ററിലെത്തിയ ചിത്രത്തില്‍ കാര്‍ത്തിക് ആര്യന്‍ ആയിരുന്നു നായകന്‍. തബു, കിയാര അദ്വാനി എന്നിവരും കേന്ദ്ര കഥാപാത്രങ്ങളായിരുന്നു. സിനിമ തിയേറ്ററില്‍ നേട്ടം കൊയ്യുകയും ചെയ്തിരുന്നു. ഈ സിനിമകളില്‍ നിന്നെല്ലാം വ്യത്യസ്തമാകും ചന്ദ്രമുഖി 2 എന്നാണ് റിപ്പോര്‍ട്ടുകള്‍.