താന്‍ സ്വവര്‍ഗാനുരാഗിയാണെന്ന് തുറന്നു പറഞ്ഞിട്ടുള്ള സംവിധായകനാണ് കരണ്‍ ജോഹര്‍. തന്റെ ആത്മകഥയിലൂടെ ഇക്കാര്യം വെളിപ്പെടുത്തിയ കരണ്‍ പിന്നീട് തന്റെ ലൈംഗികത്വത്തെ കുറിച്ച് പൊതുവിടങ്ങളില്‍ തുറന്നു പറഞ്ഞിട്ടുമുണ്ട്. വാടക ഗര്‍ഭധാരണത്തിലൂടെ ജനിച്ച രണ്ട് മക്കളും കരണിനുണ്ട്.
സിംഗിള്‍ പാരന്റ് ആയി മക്കളെ വളര്‍ത്തുന്നതിലെ ബുദ്ധിമുട്ടുകളും കരണ്‍ തുറന്നു പറഞ്ഞിട്ടുണ്ട്. തന്റെ അരക്ഷിതാവസ്ഥ മക്കളോട് കാണിക്കേണ്ടി വന്നതിനെ കുറിച്ച് സംസാരിച്ചിരിക്കുകയാണ് കരണ്‍ ഇപ്പോള്‍. ഭാരം കൂടും എന്ന പേടികൊണ്ട് താന്‍ പലതും കഴിക്കാന്‍ വിലക്കിയിരുന്നു എന്നാണ് കരണ്‍ ജോഹര്‍ പറയുന്നത്.
”എന്റെ മകന്‍ പഞ്ചസാര കഴിക്കുന്നത് കാണുമ്പോള്‍, അവന് ഭാരം കൂടിയതായി തോന്നിയാല്‍, അവന്റെ കാര്യത്തില്‍ എനിക്ക് വിഭ്രാന്തിയാണ്. യഷ്, നീ വണ്ണം വച്ചു നീ മധുരം കഴിക്കല്ലേ’ എന്നൊക്കെ പറഞ്ഞു. ഞങ്ങള്‍ ഒരു വെക്കേഷനിലായിരുന്നു.”
”ഞാന്‍ അത് പറഞ്ഞ് എന്റെ മുറിയിലേക്ക് പോയി, എന്തിനാണ് ഇങ്ങനെ പറഞ്ഞത് എന്നായി എന്റെ മനസ്. ഉടനെ ഞാന്‍ പുറത്തേക്ക് പോയി അവനെ കെട്ടിപ്പിടിച്ചു, ‘എന്നോട് ക്ഷമിക്കണം, നീ ആഗ്രഹിക്കുന്നത് കഴിക്കൂ’ എന്ന് തിരുത്തി പറഞ്ഞു. അവന് അവന്റെ ജീവിതം നയിക്കാന്‍ ആഗ്രഹിക്കുന്ന പ്രായമാണിത്.”
”അവന് സന്തോഷവാനായിരിക്കണമെന്ന് ഞാന്‍ ആഗ്രഹിക്കുന്നു, കാരണം അവന് ഒരു ഹാപ്പി കിഡ് ആണ്. ഞാന്‍ നിര്‍ബന്ധിക്കുന്ന ഒരു പാരന്റ് ആവരുത്. എന്റെ കുട്ടികള്‍ സ്വന്തം ഇഷ്ടങ്ങളും തിരഞ്ഞെടുപ്പുകളുമുള്ള ഒരു വ്യക്തിയായിരിക്കണമെന്ന് ഞാന്‍ ആഗ്രഹിക്കുന്നു” എന്നാണ് കരണ്‍ ജോഹര്‍ പറയുന്നത്.
