കാര്‍ത്തിക് ആര്യന്‍ ചിത്രം ‘ചന്തു ചാംപ്യന്’ മികച്ച അഭിപ്രായങ്ങളാണ് തിയേറ്ററില്‍ നിന്നും ലഭിച്ചു കൊണ്ടിരിക്കുന്നത്. ജൂണ്‍ 14ന് റിലീസ് ചെയ്ത ചിത്രം 30 കോടി രൂപയാണ് ബോക്‌സ് ഓഫീസില്‍ നിന്നും നേടിയിരിക്കുന്നത്. മുംബൈയില്‍ കുട്ടികള്‍ക്കായി ചിത്രത്തിന്റെ പ്രത്യേക പ്രദര്‍ശനം നടത്തിയിരുന്നു.
കുട്ടികള്‍ക്കൊപ്പം ചിത്രം കാണാനായി കാര്‍ത്തിക് ആര്യനും തിയേറ്ററില്‍ എത്തിയിരുന്നു. സിനിമ കണ്ട് വിതുമ്പിയ കുട്ടികളെ ആശ്വസിപ്പിക്കുന്ന വീഡിയോ സോഷ്യല്‍ മീഡിയയില്‍ ചര്‍ച്ചയായിട്ടുണ്ട്. കാര്‍ത്തിക് ആര്യനെ കണ്ടപ്പോള്‍ കരയാന്‍ തുടങ്ങിയ കുട്ടികളെ താരം തമാശകള്‍ പറഞ്ഞ് ചിരിപ്പിക്കുകയും സമാധാനിപ്പിക്കുകയും ചെയ്താണ് മടങ്ങിയത്.
കാര്‍ത്തിക്കിന്റെ ഈ വര്‍ഷത്തെ ആദ്യ ചിത്രമാണ് ചന്തു ചാംപ്യന്. പ്രമുഖ സംവിധായകന്‍ കബീര്‍ ഖാന്‍ സംവിധാനം ചെയ്ത ചിത്രം ഒളിമ്പിക് ഗെയിംസില്‍ ഇന്ത്യയെ പ്രതിനിധീകരിക്കുന്ന ഇന്ത്യയുടെ ആദ്യ പാരാലിമ്പിക് ചാമ്പ്യന്‍ മുരളികാന്ത് പേട്കറുടെ ജീവിതത്തെ ആസ്പദമാക്കിയുള്ള ജീവചരിത്ര ചിത്രമാണ്.
ഇന്ത്യയുടെ ആദ്യ പാരാലിമ്പിക്‌സ് സ്വര്‍ണ്ണ മെഡല്‍ ജേതാവ് മുരളികാന്ത് പേട്കറിന്റെ ജീവിതമാണ് കബീര്‍ ഖാന്‍ സിനിമയാക്കിയിരിക്കുന്നത്. കബീര്‍ ഖാനൊപ്പം സുമിത് അറോറയും സുദീപ്‌തൊ സര്‍ക്കാരും ചേര്‍ന്നാണ് ചിത്രത്തിന്റെ രചന നിര്‍വ്വഹിച്ചിരിക്കുന്നത്.
നദിയാദ്‌വാല ഗ്രാന്‍ഡ്‌സണ്‍ എന്റര്‍ടെയ്ന്‍മെന്റ്, കബീര്‍ ഖാന്‍ ഫിലിംസ് എന്നീ ബാനറുകളില്‍ സാജിദ് നദിയാദ്‌വാല, കബീര്‍ ഖാന്‍ എന്നിവരാണ് ചിത്രത്തിന്റെ നിര്‍മ്മാണം. വിജയ് റാസ്, ഭുവന്‍ അറോറ, യഷ്പാല്‍ ശര്‍മ്മ, രാജ്പാല്‍ യാദവ്, അനിരുദ്ധ് ദാവെ, ശ്രേയസ് തല്‍പാഡെ എന്നിവരാണ് ചിത്രത്തില്‍ മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.
