ഹൃത്വിക് റോഷന്‍-ദീപിക പദുക്കോണ്‍ ചിത്രം ‘ഫൈറ്റര്‍’ ചുംബന വിവാദത്തില്‍. സിദ്ധാര്‍ത്ഥ് ആനന്ദിന്റെ സംവിധാനത്തില്‍ എത്തിയ ചിത്രത്തിനെതിരെ വക്കീല്‍ നോട്ടീസ് എത്തിയിരിക്കുകയാണ്. ഹൃത്വിക്കിന്റെയും ദീപികയുടെയും കഥാപാത്രങ്ങള്‍ ആര്‍മി യൂണിഫോമില്‍ ചുംബിക്കുന്ന രംഗത്തിനെതിരെയാണ് നോട്ടീസ് അയച്ചിരിക്കുന്നത്.
അസം സ്വദേശിയും വ്യോമസേനാ വിംഗ് കമാന്ററുമായ സൗമ്യ ദീപ് ദാസ് ആണ് സിനിമക്കെതിരെ പരാതി നല്‍കിയിരിക്കുന്നത്. യൂണിഫോം ധരിച്ച് ചുംബിക്കുന്ന രംഗത്തിലൂടെ വ്യോമസേനയെ അപമാനിക്കുന്നു എന്നാണ് ആരോപണം. ദേശത്തെ സ്നേഹിക്കുന്ന തങ്ങളുടെ അഭിമാനത്തെ ഇത് ചോദ്യം ചെയ്യുന്നു.
യൂണിഫോം ധരിച്ചുകൊണ്ട് നടത്തുന്ന ഇത്തരം ചെയ്തികള്‍ മൂല്യത്തിന് നിരക്കാത്തതാണ് എന്നും നോട്ടീസില്‍ പറയുന്നുണ്ട്. അതേസമയം, വ്യോമസേനാ സംഘം ഭീകരാക്രമണത്തെ നേരിടുന്നതാണ് ഫൈറ്റര്‍ സിനിമയുടെ പ്രമേയം.
യുദ്ധ വിമാനത്തിന്റെ പൈലറ്റുമാരായ ഷംഷേര്‍ പത്താനിയ, മിനാല്‍ റാത്തോഡ് എന്നീ കഥാപാത്രങ്ങളെയാണ് ഹൃത്വിക്കും ദീപികയും അവതരിപ്പിച്ചത്. ചിത്രത്തിന്റെ ടീസര്‍ എത്തിയപ്പോഴെ മോണോക്കിനിയില്‍ പ്രത്യക്ഷപ്പെട്ട ദീപികയ്‌ക്കെതിരെ വിമര്‍ശനങ്ങള്‍ ഉയര്‍ന്നിരുന്നു. ദീപികയുടെയും ഹൃത്വിക്കിന്റെയും ഇന്റിമേറ്റ് സീനുകളും വിവാദമായിരുന്നു.
ജനുവരി 25ന് റിലീസ് ചെയ്ത ചിത്രം ബോക്സ് ഓഫീസില്‍ 300 കോടി പിന്നിട്ടു കഴിഞ്ഞു. ‘പഠാന്’ ശേഷം ഏറെ പ്രതീക്ഷയോടെയാണ് സിദ്ധാര്‍ത്ഥ് ആനന്ദ് ഫൈറ്റര്‍ ഒരുക്കിയതെങ്കിലും ഷാരൂഖ് ചിത്രത്തിന്റെയത്ര കളക്ഷന്‍ നേടാന്‍ ഫൈറ്ററിന് സാധിച്ചിട്ടില്ല.