നടന്‍ അര്‍ജുന്‍ കപൂറുമായി വര്‍ഷങ്ങളായി ഡേറ്റിംഗിലാണ് മലൈക അറോറ. ഇരുവരുടെയും പ്രായ വ്യത്യാസം എന്നും ചര്‍ച്ചകളില്‍ നിറയാറുണ്ട്. ഇരുവരും വേര്‍പിരിഞ്ഞുവെന്ന വാര്‍ത്തകള്‍ പലപ്പോഴും എത്താറുണ്ടെങ്കിലും അതൊന്നും സത്യമല്ലെന്ന് അര്‍ജുനും മലൈകയും വ്യക്തമാക്കാറുമുണ്ട്. ഈയടുത്ത ദിവസമായിരുന്നു മലൈകയുടെ മുന്‍ ഭര്‍ത്താവും നടനുമായ അര്‍ബാസ് ഖാന്‍ വിവാഹിതനായത്.
ഇതിന് പിന്നാലെ മലൈക എന്ന് വീണ്ടും വിവാഹിതയാകും എന്ന ചോദ്യങ്ങളാണ് ഉയര്‍ന്നു കൊണ്ടിരിക്കുന്നത്. ഹിന്ദി റിയാലിറ്റി ഷോയായ ജലക് ദിഖ്ല ആജായില്‍ സംവിധായിക ഫറാ ഖാന്‍ മലൈകയോട് വിവാഹ കാര്യത്തെ കുറിച്ച് നേരിട്ട് ചോദിക്കുകയും ചെയ്തു. ഷോയുടെ പ്രമോയിലാണ് ഇത് എത്തിയിരിക്കുന്നത്.
‘2024ല്‍ നിങ്ങള്‍ സിംഗിള്‍ പാരന്റും നടിയും എന്നതില്‍ നിന്ന് ഡബിള്‍ പാരന്റും നടിയുമായി മാറുമോ?’ എന്നായിരുന്നു ഫറാ ഫാന്റെ ചോദ്യം. ‘ഞാന്‍ വീണ്ടും ഒരാളെ മടിയില്‍ ഇരുത്തണോ’ എന്നാണ് താരം മറുപടി പറഞ്ഞത്. ഇത് കേട്ടപ്പോള്‍ അവതാരകനായ ഗൗഹര്‍ ഖാന്‍, ‘ഇതിനര്‍ത്ഥം, നിങ്ങള്‍ വിവാഹം കഴിക്കാന്‍ പോകുകയാണോ’ എന്ന് ചോദിച്ചു.
‘ആരെങ്കിലും ഉണ്ടെങ്കില്‍ വിവാഹം കഴിക്കാന്‍ ഞാന്‍ 100 ശതമാനം തയ്യാറാണ്’ എന്നാണ് മലൈക അവതാരകനോട് മറുപടി പറഞ്ഞത്. കൂടാതെ ഒരിക്കല്‍ ചെയ്ത കാര്യം വീണ്ടും ചെയ്യാന്‍ ഒന്നു മടിക്കും എന്നും താരം പറഞ്ഞു. അതേസമയം, 1998ല്‍ ആണ് മലൈകയും അര്‍ബ്ബാസും വിവാഹിതരായത്.
ഈ ബന്ധത്തില്‍ മലൈകയ്ക്ക് അര്‍ഹാന്‍ എന്നൊരു മകനുണ്ട്. 2017ല്‍ അര്‍ബാസ് ഖാനും മലൈകയും വിവാഹമോചനം നേടി. ഇതിന് ശേഷമാണ് അര്‍ജുനും മലൈകയും പ്രണയത്തിലാവുന്നത്. എന്നാല്‍ താരങ്ങള്‍ അടുത്തൊന്നും വിവാഹിരാവില്ല എന്നാണ് മലൈക ഇപ്പോള്‍ പറഞ്ഞ മറുപടിയുടെ അര്‍ത്ഥം എന്നാണ് സോഷ്യല്‍ മീഡിയയുടെ കണ്ടെത്തല്‍.
2018ല്‍ ആയിരുന്നു മലൈകയും അര്‍ജുനും ഡേറ്റിംഗ് തുടങ്ങിയത്. 2019ല്‍ ഇക്കാര്യം പരസ്യമാക്കുകയും ചെയ്തു. 49കാരിയായ മലൈക അറോറയും 37കാരനായ അര്‍ജുന്‍ കപൂറും തമ്മിലുള്ള പ്രണയം ബോളിവുഡിലും ഇരുവരുടെയും കുടുംബങ്ങളിലും ആദ്യം പ്രശ്‌നങ്ങള്‍ സൃഷ്ടിച്ചിരുന്നു.