താന്‍ നവംബര്‍ ചാലഞ്ച് ഫോളോ ചെയ്യുകയാണെന്ന് നടി മലൈക അറോറ. ഇന്‍സ്റ്റഗ്രാം സ്‌റ്റോറിയിലൂടെയാണ് താന്‍ നവംബര്‍ മാസം പിന്തുടരുന്ന 9 കാര്യങ്ങളെ കുറിച്ച് മലൈക പറഞ്ഞിരിക്കുന്നത്. മദ്യം മുതല്‍ ടോക്‌സിക് ആയ മനുഷ്യരെ വരെ ഒഴിവാക്കും എന്നാണ് മലൈക പറയുന്നത്.
”മദ്യം കഴിക്കില്ല, എട്ട് മണിക്കൂര്‍ ഉറങ്ങും, ഒരു മെന്ററെ കണ്ടെത്തും, എല്ലാ ദിവസവും വ്യായാമം ചെയ്യും, ദിവസം 10000 സ്റ്റെപ്പ് നടക്കും, പ്രോസസ്ഡ് ഭക്ഷണങ്ങള്‍ കഴിക്കില്ല, എട്ട് മണിക്ക് ശേഷം ഭക്ഷണം കഴിക്കില്ല, രാവിലെ 10 മണിയാവും വരെ ഫാസ്റ്റ് ചെയ്യും, ടോക്‌സിക് മനുഷ്യരെ ഒഴിവാക്കും” എന്നിങ്ങനെയാണ് മലൈകയുടെ നവംബര്‍ ചലഞ്ച്.
പ്രായം 51 ആയെങ്കിലും ഇന്നും ബോളിവുഡിലെ ഫിറ്റ് താരങ്ങളിലൊരാളാണ് മലൈക. യോഗയും വ്യായാമവും കൃത്യമായ ഡയറ്റുമെല്ലാം കൃത്യമായി തന്നെ മലൈക പിന്തുടരുന്നുണ്ട്. എന്നും ജിമ്മില്‍ നിന്നും വരുന്ന മലൈകയുടെ വീഡിയോകള്‍ സോഷ്യല്‍ മീഡിയയില്‍ വൈറലാകാറുമുണ്ട്.
അതേസമയം, മലൈകയും അര്‍ജുന്‍ കപൂറും വേര്‍പിരിഞ്ഞതും കഴിഞ്ഞ കുറച്ച് ദിവസങ്ങളായി വാര്‍ത്തകളില്‍ നിറഞ്ഞു നില്‍ക്കുന്നുണ്ട്. അഞ്ച് വര്‍ഷത്തെ പ്രണയത്തിനൊടുവിലാണ് ഇരുവരും വേര്‍പിരിഞ്ഞത്. അര്‍ജുനേക്കാള്‍ 12 വയസ് കൂടുതലാണ് മലൈകയ്ക്ക്. ഇതിന്റെ പേരില്‍ ഇരുവര്‍ക്കുമെതിരെ കടുത്ത വിമര്‍ശനങ്ങള്‍ ഉയര്‍ന്നിരുന്നു.
