അശ്ലീല വീഡിയോ നിര്‍മ്മാണം, കള്ളപ്പണം വെളുപ്പിക്കല്‍ കേസില്‍ ആരോപണവിധേയനായ നടി ശില്‍പ്പ ഷെട്ടിയുടെ ഭര്‍ത്താവ് രാജ് കുന്ദ്രയുമായി നേരിട്ട് ബന്ധമില്ലെന്ന് നടി ഗഹന വസിഷ്ഠ്. രാജ് കുന്ദ്രയെ കണ്ടിട്ടില്ലെങ്കിലും ചിത്രീകരണ സ്ഥലത്ത് അവരുടെ കുടുംബ ചിത്രം ഉണ്ടായിരുന്നുവെന്ന് ഗഹന ഇഡിക്ക് മൊഴി നല്‍കി.
അഡല്‍റ്റ്‌സ് ഒണ്‍ലി ചിത്രങ്ങളില്‍ സജീവമായ ഇവരെ 6 മണിക്കൂറിലധികം ഇഡി ചോദ്യം ചെയ്തിരുന്നു. രാജ് കുന്ദ്രയുമായി നേരിട്ട് ബന്ധമില്ല. സഹായി ഉമേഷ് കാമത്തുമായി ഇടപാടുകള്‍ ഉണ്ടായിരുന്നു. കാമത്താണ് തനിക്ക് പണം നല്‍കിയത്. പൗണ്ടിലാണ് ഓരോ സിനിമയ്ക്കും പ്രതിഫലം നല്‍കാറുള്ളത്.
രാജ് കുന്ദ്രയ്ക്ക് വേണ്ടി ജോലി ചെയ്തിട്ടില്ല. എന്നിട്ടും തന്റെ ബാങ്ക് അക്കൗണ്ടുകളും മറ്റും ഇഡി മരവിപ്പിച്ചിരിക്കുകയാണ്. കുന്ദ്രയെ പറ്റിയും വിദേശ പണമിടപാടുകളെ പറ്റിയുമാണ് തന്നോട് ഇഡി കൂടുതല്‍ ചോദിച്ചത്. ചിത്രീകരണം നടന്ന ഇടങ്ങളില്‍ രാജ് കുന്ദ്രയെ കണ്ടിട്ടില്ല.
എന്നാല്‍ അദ്ദേഹത്തിന്റെയും കുടുംബത്തിന്റെയും ചിത്രം ഷൂട്ട് നടന്ന കെട്ടിടത്തില്‍ ഉണ്ടായിരുന്നു. അതിനാല്‍ അവര്‍ക്ക് ബന്ധമുണ്ടാകും എന്നാണ് കരുതുന്നത്. രാജ് കുന്ദ്രയ്ക്ക് ബന്ധമുള്ള കമ്പനി ആരംഭിച്ച ഹോട്ട് ഷോട്‌സ് എന്ന മൊബൈല്‍ ആപ്പിന് വേണ്ടി 11 സിനിമകള്‍ ചെയ്തു. പ്രതിഫലമായി 33 ലക്ഷം രൂപയാണ് ലഭിച്ചത്.
ഒരു സിനിമയ്ക്ക് മൂന്ന് ലക്ഷം രൂപയായിരുന്നു നിരക്ക് എന്ന് മൊഴി നല്‍കിയതായി ഗഹന മാധ്യമങ്ങളോട് പറഞ്ഞു. അതേസമയം, അശ്ലീല ചിത്ര നിര്‍മ്മാണത്തിന് നേതൃത്വം നല്‍കിയെന്ന് ആരോപിച്ച് 2021 ജൂലൈയില്‍ ഗഹനയെ പൊലീസ് അറസ്റ്റ് ചെയ്തിരുന്നു. പിന്നാലെയാണ് ഉമേഷ് കാമത്തിനെയും രാജ് കുന്ദ്രയെയും കേസുമായി ബന്ധപ്പെട്ട് അറസ്റ്റ് ചെയ്യുന്നത്.