നടി രാഖി സാവന്ത് അറസ്റ്റില്‍. നടിയും മോഡലുമായ ഷെര്‍ലിന്‍ ചോപ്ര നല്‍കിയ പരാതിയിലാണ് ഇന്ന് രാഖിയെ അറസ്റ്റ് ചെയ്തത്. ആക്ഷേപകകരമായ ഭാഷയില്‍ തനിക്കെതിരെ ട്വീറ്റ് ചെയ്തു എന്ന ഷെര്‍ലിന്റെ പരാതിയിലാണ് രാഖിയെ കസ്റ്റഡിയില്‍ എടുത്തത്.
രാഖി നല്‍കിയ മുന്‍കൂര്‍ ജാമ്യാപേക്ഷ റദ്ദാക്കിയതിന് പിന്നാലെയാണ് നടിയെ അംബോലി പൊലീസ് കസ്റ്റഡിയില്‍ എടുത്തത്. ഇന്ന് ഉച്ചയ്ക്ക് മൂന്ന് മണിക്ക് ഭര്‍ത്താവ് ആദില്‍ ദുറാനിയുടെ പങ്കാളിത്തത്തോടെ ഡാന്‍സ് അക്കാദമി ആരംഭിക്കാനിരിക്കുകയായിരുന്നു രാഖി.
ഷെര്‍ലിന്‍ ചോപ്രയാണ് രാഖി അറസ്റ്റിലായ വിവരം ട്വിറ്ററിലൂടെ പങ്കുവച്ചത്. ഇന്നലെ രാഖി സാവന്തിന്റെ മുന്‍കൂര്‍ ജാമ്യാപേക്ഷ മുംബൈ കോടതി തള്ളി. ഇന്ന് എഫ്‌ഐആര്‍ 883/2022 പ്രകാരം രാഖി സാവന്തിനെ അംബോലി പൊലീസ് അറസ്റ്റ് ചെയ്തു എന്നാണ് ഷെര്‍ലിന്‍ ട്വീറ്റ് ചെയ്തിരിക്കുന്നത്.
അതേസമയം, തന്റെ വിവാഹവുമായി ബന്ധപ്പെട്ട് വാര്‍ത്തകളില്‍ നിറഞ്ഞു നില്‍ക്കുകയായിരുന്നു രാഖി സാവന്ത്. കഴിഞ്ഞ വര്‍ഷം ജൂലൈയിലാണ് ആദില്‍ ദുറാനിയും രാഖിയും വിവാഹിതരായത്. രജിസ്റ്റര്‍ മാര്യേജ് ചെയ്തതിന്റെ ഡോക്യമെന്റ്‌സും ചിത്രങ്ങളും രാഖി പങ്കുവച്ചിരുന്നു.