‘ജവാന്‍’ ചിത്രത്തില്‍ വിവിധ ഗെറ്റപ്പുകളിലാണ് ഷാരൂഖ് ഖാന്‍ പ്രത്യക്ഷപ്പെടുന്നത്. താരം ആദ്യമായി മൊട്ട ലുക്കില്‍ എത്തുന്ന ചിത്രം കൂടിയാണിത്. ചിത്രത്തിന്റെ ട്രെയ്‌ലര്‍ എത്തിയപ്പോള്‍ ഈ മൊട്ട ലുക്ക് ഏറെ ശ്രദ്ധിക്കപ്പെടുകയും ട്രോള്‍ ചെയ്യപ്പെടുകയും ചെയ്തിരുന്നു.
ഈ ലുക്ക് ഇപ്പോള്‍ ഒരു പ്രചാരണതന്ത്രമാക്കി മാറ്റിയിരിക്കുകയാണ് ഷാരൂഖ് ഖാന്‍. തന്നെ മൊട്ട ലുക്കില്‍ ആദ്യമായും അവസാനമായും കാണണമെങ്കില്‍ ജവാന്‍ കാണാന്‍ വരണം എന്നാണ് ഷാരൂഖ് പറയുന്നത്. ചിത്രത്തിന്റെ പ്രമോഷന്റെ ഭാഗമായായി ദുബായിലെത്തിയപ്പോഴാണ് താരം സംസാരിച്ചത്.
”സിനിമയില്‍ എനിക്ക് മൊട്ടത്തലയുണ്ട്. അത് ആദ്യത്തേതും അവസാനത്തേതും ആണ്. നിങ്ങള്‍ക്ക് വേണ്ടി ഞാന്‍ മൊട്ടയടിക്കുക പോലും ചെയ്തു. കുറഞ്ഞപക്ഷം, അത് മാനിച്ച് സിനിമ കാണുക. ഈ രൂപത്തില്‍ ഇനി എന്നെ കാണാന്‍ സാധിക്കില്ല” എന്നാണ് ഷാരൂഖ് പറഞ്ഞത്.
അതേസമയം, ജവാന്റെ ട്രെയ്‌ലര്‍ ദുബായിലെ ബുര്‍ജ് ഖലീഫയില്‍ പ്രദര്‍ശിപ്പിച്ചിരുന്നു. സെപ്റ്റംബര്‍ 7ന് ആണ് ചിത്രം റിലീസ് ചെയ്യുന്നത്. നയന്‍താരയാണ് ചിത്രത്തില്‍ നായിക. നയന്‍താരയുടെ ബോളിവുഡ് അരങ്ങേറ്റ ചിത്രമാണിത്. സംവിധായകന്‍ അറ്റ്ലിയുടെയും ബോളിവുഡ് അരങ്ങേറ്റ ചിത്രമാണ് ജവാന്‍.
പ്രിയാമണി, സന്യ മല്‍ഹോത്ര, സഞ്ജീത ഭട്ടാചാര്യ, സുനില്‍ ഗ്രോവര്‍, റിദ്ധി ദോഗ്ര, അമൃത അയ്യര്‍ എന്നിവരാണ് ജവാനിലെ മറ്റ് പ്രധാന അഭിനേതാക്കള്‍. ദീപിക പദുക്കോണ്‍ ചിത്രത്തില്‍ കാമിയോ റോളില്‍ എത്തുന്നുണ്ട്. ദീപികയുടെ ആക്ഷന്‍ സീന്‍ ട്രെയ്ലറില്‍ ശ്രദ്ധ നേടിയിരുന്നു.