ഷാരൂഖ് ഖാന്‍ തന്റെ ആഡംബര വസതിയായ മന്നത്ത് ഉപേക്ഷിക്കുന്നു. താരവും കുടുംബവും മറ്റൊരു ഫ്‌ളാറ്റിലേക്ക് മാറി താമസിക്കാനൊരുങ്ങുകയാണ്. പ്രതിമാസം 24 ലക്ഷം രൂപ വാടക നല്‍കേണ്ടി വരുന്ന ഫ്‌ളാറ്റിലേക്കാണ് ഷാരൂഖ് ഖാനും കുടുംബവും മാറി താമസിക്കാന്‍ ഒരുങ്ങുന്നത്. മുംബൈയിലെ പാലി ഹില്‍ ഏരിയയില്‍ ആണ് ഈ അപ്പാര്‍ട്ട്‌മെന്റ്.
എന്നാല്‍ ഷാരൂഖ് മന്നത്ത് ഉപേക്ഷിക്കുന്നതല്ല, മന്നത്ത് കൂടുതല്‍ നവീകരിക്കുന്നതിന്റെ ഭാഗമായാണ് താരവും കുടുംബവും മാറി താമസിക്കുന്നത്. ആഡംബര അപ്പാര്‍ട്ട്മെന്റിന്റെ നാല് നിലകള്‍ ഷാരൂഖ് വാടകയ്ക്കെടുത്തതായാണ് റിപ്പോര്‍ട്ട്. നിര്‍മ്മാതാവ് വഷു ഭഗ്‌നാനിയുടെ മകന്‍ ജാക്കി ഭഗ്‌നാനിയുമായും മകള്‍ ദീപ്ശിഖ ദേശ്മുഖുമായും ഷാരൂഖിന്റെ നിര്‍മ്മാണ കമ്പനിയായ റെഡ് ചില്ലീസ് എന്റര്‍ടെയ്ന്‍മെന്റ്സ് കരാറില്‍ എത്തിയതായാണ് റിപ്പോര്‍ട്ട്.
ഷാരൂഖിന്റെ സെക്യൂരിറ്റി സ്റ്റാഫുകള്‍ക്കും ഈ ഫ്‌ളാറ്റില്‍ താമസ സൗകര്യം ഒരുക്കും. അതേസമയം, ഷാരൂഖിനെ കാണാന്‍ ആരാധകര്‍ തടിച്ചുകൂടുന്ന ഇടമാണ് മന്നത്ത്. തന്റെ പിറന്നാള്‍ ദിവസം മന്നതിന്റെ മുകളില്‍ നിന്നും ഷാരൂഖ് ആരാധകരെ അഭിവാദ്യം ചെയ്യാറുണ്ട്. ബാന്ദ്രയിലാണ് മന്നത്ത് സ്ഥിതി ചെയ്യുന്നത്.
2001ല്‍ 13 കോടി രൂപയ്ക്കാണ് ഷാരൂഖ് ഖാന്‍ മന്നത്ത് സ്വന്തമാക്കിയത്. ഇന്ന് 200 കോടി രൂപയോളം വിലമതിക്കുന്ന ആഡംബര വസതിയാണിത്. 27000 സ്‌ക്വയര്‍ ഫീറ്റുള്ള ബംഗ്ലാവില്‍ 6 നിലകളാണുള്ളത്. വിശാലമായ ലൈബ്രറി, തിയേറ്റര്‍, ജിം എന്നിവയും മന്നത്തിലുണ്ട്. ഷാരൂഖിന്റെ ഭാര്യ ഗൗരി ഖാന്‍ ആണ് മന്നത്തിന്റെ ഇന്റീരിയര്‍ ഡിസൈനര്‍.
Read more
