ബോളിവുഡിനെ കൈപ്പിടിച്ച് ഉയര്‍ത്തിയിരിക്കുകയാണ് ഷാരൂഖ് ഖാന്‍. ‘പഠാന്‍’ സിനിമ റിലീസ് ചെയ്ത് 16 ദിവസങ്ങള്‍ക്കുള്ളില്‍ 887 കോടി കളക്ഷന്‍ ആണ് നേടിയിരിക്കുന്നത്. ചിത്രത്തിലെ ആക്ഷന്‍ രംഗങ്ങള്‍ എല്ലാം ഗംഭീരമായിരുന്നു. പഠാന്റെ മേക്കിംഗ് വീഡിയോയാണ് ഇപ്പോള്‍ ശ്രദ്ധ നേടുന്നത്.
ചിത്രത്തിലെ പ്രധാനപ്പെട്ട ആക്ഷന്‍ സ്വീക്വന്‍സുകളില്‍ ഒന്നായ ഷാരൂഖ് ഖാന്‍-ജോണ്‍ എബ്രഹാം ഫൈറ്റിന്റെ മേക്കിംഗ് ആണ് പുറത്തുവിട്ടിരിക്കുന്നത്. ദുബായിലെ ബുര്‍ജ് ഖലീഫയ്ക്കു മുന്നിലുള്ള ബൊളിവാഡയിലാണ് ചിത്രീകരണം നടന്നത്.
ഒരു ഭാഗത്തെ റോഡ് മുഴുവന്‍ ബ്ലോക്ക് ചെയ്തു കൊണ്ടാണ് ഷൂട്ടിംഗ് നടത്തിയത്. ദുബായ് പൊലീസിന്റെയും അധികൃതരുടെയും സഹായത്തോടെയാണ് ഷൂട്ടിംഗ് ചെയ്യാന്‍ സാധിച്ചതെന്ന് സംവിധായകന്‍ സിദ്ധാര്‍ഥ് ആനന്ദ് പറയുന്നുണ്ട്.
ഇതാദ്യമായാണ് ഒരു സിനിമയുടെ ഷൂട്ടിംഗിന് വേണ്ടി ബൊളിവാഡ് റോഡ് പൊലീസ് ബ്ലോക്ക് ചെയ്യുന്നത്. നാല് വര്‍ഷത്തെ ഇടവേളയ്ക്ക് ശേഷം റിലീസ് ചെയ്യുന്ന ഷാരൂഖ് ഖാന്‍ ചിത്രമെന്ന നിലയില്‍ പഠാന്‍ പ്രഖ്യാപന സമയം മുതല്‍ ശ്രദ്ധനേടിയിരുന്നു.
ദീപിക പദുക്കോണ്‍ നായികയായ ചിത്രത്തില്‍ ജോണ്‍ എബ്രഹാം പ്രതിനായക വേഷത്തില്‍ എത്തിയിരുന്നു. സല്‍മാന്‍ ഖാനും ചിത്രത്തില്‍ അതിഥി വേഷത്തില്‍ എത്തിയിരുന്നു. യഷ് രാജ് ഫിലിംസിന്റെ സ്‌പൈ യൂണിവേഴ്‌സ് അടിസ്ഥാനമാക്കിയാണ് ‘ടൈഗര്‍’ സിനിമാ സീരിസിലെ അതേ കഥാപാത്രമായി സല്‍മാന്‍ പഠാനില്‍ വേഷമിട്ടത്.