ശില്‍പ്പ ഷെട്ടിയും രാജ് കുന്ദ്രയും വിവാഹമോചിതരായി. തന്റെ പുതിയ എക്‌സ് പോസ്റ്റിലാണ് തങ്ങള്‍ വേര്‍പിരിഞ്ഞുവെന്ന് രാജ് കുന്ദ്ര വ്യക്തമാക്കിയത്. ”ഞങ്ങള്‍ വേര്‍പിരിഞ്ഞു, ഈ പ്രയാസകരമായ കാലഘട്ടത്തില്‍ ഞങ്ങള്‍ സമയം നല്‍കണമെന്ന് അഭ്യര്‍ത്ഥിക്കുന്നു” എന്നാണ് രാജ് കുന്ദ്ര എക്‌സില്‍ കുറിച്ചിരിക്കുന്നത്.
എന്നാല്‍ ഇത് പുതിയ സിനിമയുടെ പ്രചാരണ തന്ത്രമാണെന്നും ഒരു വിഭാഗം അവകാശപ്പെടുന്നു. കഴിഞ്ഞ ദിവസം രാജ് കുന്ദ്ര നായകനാകുന്ന പുതിയ ചിത്രം ‘യുടി 69’ന്റെ ട്രെയ്‌ലര്‍ പുറത്തു വന്നിരുന്നു. ഈ സിനിമയുടെ പ്രമോഷന് വേണ്ടിയാണ് ഇങ്ങനൊരു പോസ്റ്റ് പങ്കുവച്ചത് എന്ന കമന്റുകളും പോസ്റ്റിന് താഴെ നിറയുന്നത്.
കുന്ദ്രയും ശില്‍പ്പയും പൊതുചടങ്ങുകളില്‍ ഒരുമിച്ചാണ് ഇപ്പോഴും പ്രത്യക്ഷപ്പെടുന്നത്. അതുകൊണ്ടു തന്നെ ഇത് പൊതുജനങ്ങളെ തെറ്റിദ്ധരിപ്പിക്കുന്നതിന് വേണ്ടിയാണെന്ന് പലരും ചൂണ്ടിക്കാട്ടുന്നു. നീലച്ചിത്ര നിര്‍മാണ കേസില്‍ അറസ്റ്റിലായതിന് ശേഷമാണ് വ്യവസായിയായ രാജ് കുന്ദ്ര വിവാദ പുരുഷനാകുന്നത്.
ലണ്ടന്‍ ആസ്ഥാനമായി പ്രവര്‍ത്തിക്കുന്ന രാജ് കുന്ദ്രയുടെ നിര്‍മാണ കമ്പനി നീലച്ചിത്രങ്ങള്‍ നിര്‍മിക്കുന്നുവെന്നും അത് ഓണ്‍ലൈനില്‍ പ്രചരിപ്പിക്കുന്നുവെന്നുമായിരുന്നു കേസ്. ഷെര്‍ലിന്‍ ചോപ്ര അടക്കമുള്ള നടിമാരുടെ പരാതിയെ തുടര്‍ന്ന് മുംബൈ പൊലീസാണ് ഇദ്ദേഹത്തെ അറസ്റ്റ് ചെയ്തത്.
63 ദിവസത്തോളം ജയിലില്‍ കഴിഞ്ഞതിന് ശേഷമാണ് കുന്ദ്രയ്ക്ക് ജാമ്യം ലഭിച്ചത്. ഇതിനിടെ ശില്‍പ്പ വിവാഹമോചിതയാകുന്നുവെന്ന വാര്‍ത്തകള്‍ എത്തിയിരുന്നു. എന്നാല്‍ കുന്ദ്രയുടെ ജയില്‍ മോചനത്തിന് ശേഷവും ഇരുവരും ഒന്നിച്ച് താമസിക്കുകയായിരുന്നു.