അച്ഛന് ഷാരൂഖ് ഖാന് ലഭിച്ച അവാര്‍ഡ് നേട്ടങ്ങളെ കുറിച്ച് ധാരണയില്ലാതെ മകള്‍ സുഹാന ഖാന്. അമിതാഭ് ബച്ചന്റെ കോന്‍ ബനേഗ ക്രോര്‍പതി ഷോയില്‍ ഷാരൂഖിനെ കുറിച്ചുള്ള ചോദ്യത്തിന് തെറ്റായ മറുപടി പറഞ്ഞ് കുഴങ്ങിയിരിക്കുകയാണ് സുഹാന ഇപ്പോള്‍.
‘ദ ആര്‍ച്ചീസ്’ അഭിനേതാക്കളായ ഖുഷി കപൂര്‍, അഗസ്ത്യ നന്ദ, യുവരാജ് മെന്‍ഡ, മിഹിര്‍ അഹൂജ, വേദാങ് റെയ്ന എന്നിവര്‍ക്കും സംവിധായിക സോയ അക്തറിനും ഒപ്പമാണ് ക്രോര്‍പതി ഷോയില്‍ സുഹാന എത്തിയത്. ഈ എപ്പിസോഡില്‍ സുഹാനയോടും വേദാംഗിനോടും സോയയോടും ഷാരൂഖിനെ കുറിച്ച് ബച്ചന്‍ ഒരു ചോദ്യം ചോദിക്കുകയായിരുന്നു.
ഈ ബഹുമതികളില്‍ ഏതാണ് ഷാരൂഖ് ഖാന് ഇതുവരെ ലഭിക്കാത്തത് എന്നായിരുന്നു ചോദ്യം. (എ) പത്മശ്രീ, (ബി) ലെജിയന്‍ ഓഫ് ഓണര്‍, (സി), എല്‍ എറ്റോയില്‍ ഡി ഓര്‍, (ഡി) വോള്‍പ്പി കപ്പ്, എന്നിവയായിരുന്നു ബച്ചന്‍ നല്‍കിയ ഓപ്ഷനുകള്‍. ‘(എ) പത്മശ്രീ’ എന്നായിരുന്നു സുഹാനയുടെ മറുപടി.
സുഹാനയുടെ മറുപടി കേട്ട് അമിതാഭും വേദാംഗും ഞെട്ടി. തന്റെ പിതാവിന് ഏത് അവാര്‍ഡാണ് ലഭിച്ചതെന്ന് മകള്‍ക്ക് അറിവില്ലേ എന്ന് അമിതാഭ് പറഞ്ഞു. ഷാരൂഖ് ഖാനെ 2005ല്‍ പത്മശ്രീ നല്‍കി ആദരിച്ചിരുന്നു. ചോദ്യത്തിനുള്ള ശരിയായ ഉത്തരം ഓപ്ഷന്‍ (ഡി) വോള്‍പ്പി കപ്പ് എന്നായിരുന്നു.
ഈ ഷോയുടെ വീഡിയോ ക്ലിപ്പ് എത്തിയതോടെ സുഹാനയെ ട്രോളി കൊണ്ടുള്ള കമന്റുകളാണ് സോഷ്യല്‍ മീഡിയയില്‍ നിറയുന്നത്. വീഡിയോയില്‍ സുഹാനയെ കളിയാക്കുന്ന ബച്ചനെയും കാണാം. ”മുന്നില്‍ ഇരിക്കുന്നയാള്‍ സിനിമയില്‍ എന്റെ അച്ഛന്റെ വേഷം ചെയ്തിട്ടുണ്ട്..”
”അത് കൊണ്ട് എളുപ്പത്തിലുള്ള ചോദ്യങ്ങള്‍ ചോദിക്കാന്‍ ആവശ്യപ്പെടണം എന്ന് പറഞ്ഞാണ് അച്ഛന് മകളെ ഇങ്ങോട്ട് പറഞ്ഞയച്ചത്, ഇപ്പോള്‍ ആ ഞാന്‍ അവളോട് എളുപ്പമുള്ള ഒരു ചോദ്യം ചോദിച്ചു, അതിന്റെ പോലും ഉത്തരം അറിയില്ല” എന്ന് പറഞ്ഞാണ് ബച്ചന്‍ സുഹാനയെ കളിയാക്കുന്നത്.