അര്‍ബാസ് ഖാനുമായുള്ള ചാറ്റ് ഷോയില്‍ വിതുമ്പലടക്കാനാവാതെ ബോളിവുഡ് നടി സണ്ണി ലിയോണ്‍. വൃക്കസംബന്ധമായ രോഗത്തെ തുടര്‍ന്ന് മരിച്ച സഹപ്രവര്‍ത്തകന്‍ പ്രഭാകറിനെ പറ്റി ചോദിച്ചപ്പോഴാണ് സണ്ണി ലിയോണ്‍ പൊട്ടിക്കരഞ്ഞത്. നേരത്തെ പ്രഭാകറിന്റെ ചികിത്സാ ആവശ്യത്തിനായി സണ്ണി ലിയോണ്‍ സോഷ്യല്‍ മീഡിയയിലൂടെ സഹായം അഭ്യര്‍ത്ഥിച്ചിരുന്നു. ഈ സംഭവം ഒരുപാട് വിമര്‍ശനങ്ങള്‍ക്ക് വഴിവെച്ചിരുന്നു. കോടികള്‍ സമ്പാദിക്കുന്ന നടിയ്ക്ക് സഹായിച്ചു കൂടെ എന്നായിരുന്നു ആക്ഷേപം.
“ഞാനും ഡാനിയല്‍ വെബറും കൂടിയായിരുന്നു അദ്ദേഹത്തിന്റെ ചികിത്സാ ചെലവുകള്‍ നോക്കിയിരുന്നത് .ആശുപത്രി ചെലവിനും ഡയാലിസിസ് ചെയ്യുന്നതിനും അടക്കം ധാരാളം പണം ആവശ്യമായിരുന്നു. വളരെ കാലമായി പരിചയമുള്ള സുഹൃത്തുക്കളോ അല്ലെങ്കില്‍ സഹപ്രവര്‍ത്തകനോ മരണത്തിലേക്ക് നീങ്ങുകയാണ് എന്നറിയുമ്പോള്‍ നമ്മള്‍ സ്വാഭാവികമായും പരിഭ്രാന്തരാകും. പ്രഭാകര്‍ വര്‍ഷങ്ങളായി സിനിമയില്‍ പ്രവര്‍ത്തിക്കുന്ന ഒരാളായിരുന്നു. ആളുകള്‍ക്ക് അയാളെ വലിയ ഇഷ്ടവുമായിരുന്നു.” സണ്ണി ലിയോണ്‍ പറഞ്ഞു.
ഇന്‍ഡസ്ട്രിയില്‍ അദ്ദേഹത്തെ സഹായിക്കാന്‍ ആര്‍ക്കെങ്കിലും താത്പര്യം ഉണ്ടെങ്കില്‍ അത് ചെറിയ തുകയാണെങ്കില്‍ പോലും അദ്ദേഹത്തിനും കുടുംബത്തിനും ഉപകാരപ്പെടട്ടെ എന്ന് ചിന്തിച്ചാണ് സോഷ്യല്‍ മീഡിയയിലൂടെ സഹായം അഭ്യര്‍ത്ഥിച്ചതെന്നും സണ്ണി പറഞ്ഞു. താനും ഡാനിയും അദ്ദേഹത്തെ ജീവിതത്തിലേക്ക് കൊണ്ടുവരാന്‍ പരമാവധി ശ്രമിച്ചെന്നും പക്ഷേ തങ്ങള്‍ തോറ്റു പോയെന്നും സണ്ണി ലിയോണ്‍ പറഞ്ഞു.