ബോളിവുഡ് നടന്‍ സുശാന്ത് സിംഗ് രാജ്പുത്തിന് ലഹരിമരുന്ന് വാങ്ങിനല്‍കിയതിന് നടിയും കാമുകിയുമായ റിയ ചക്രബര്‍ത്തിക്കെതിരെ കേസെടുത്ത് നാര്‍കോട്ടിക്സ് കണ്‍ട്രോള്‍ ബ്യൂറോ (എന്‍സിബി). നടന്റെ മരണത്തില്‍ റിയയ്ക്കും സഹോദരന്‍ ഷോവിക് ചക്രബര്‍ത്തിയ്ക്കും പുറമേ 34 പേരെ കേസില്‍ പ്രതി ചേര്‍ത്തിട്ടുണ്ട്.
സുശാന്ത് സിംഗിനുവേണ്ടി കഞ്ചാവ് വാങ്ങിയതിനും പണം നല്‍കിയതിനുമാണ് റിയയ്‌ക്കെതിരെ എന്‍സിബി കേസെടുത്തിരിക്കുന്നത്. കുറ്റം തെളിഞ്ഞാല്‍ പത്ത് വര്‍ഷം വരെ ജയില്‍ ശിക്ഷ അനുഭവിക്കേണ്ടി വരും. സമാനകേസില്‍ 2020ലും റിയ അറസ്റ്റ് ചെയ്യപ്പെട്ടിരുന്നു.
അറസ്റ്റിന് ഒരു മാസത്തിന് ശേഷം മുംബയ് ഹൈക്കോടതി ജാമ്യം അനുവദിക്കുകയും ചെയ്തു. 2020 ജൂണ്‍ 14നാണ് ബാന്ദ്രയിലെ അപ്പാര്‍ട്ട്മെന്റില്‍ സുശാന്തിനെ മരിച്ച നിലയില്‍ കണ്ടെത്തിയത്.
സംഭവത്തിന് പിന്നാലെ ബോളിവുഡിലും ടെലിവിഷന്‍ രംഗത്തും മയക്കുമരുന്ന് ഉപയോഗം സംബന്ധിച്ച് എന്‍സിബി വ്യാപക അന്വേഷണം ആരംഭിച്ചിരുന്നു. സുശാന്തിന്റെ മരണം സംബന്ധിച്ചും അന്വേഷണം പുരോഗമിക്കുകയാണ്.