നടി തപ്‌സി പന്നു വിവാഹിതയാകുന്നു. ബാഡ്മിന്റണ്‍ പ്ലെയര്‍ ആയ മത്യാസ് ബോയ് ആണ് തപ്‌സിയുടെ വരന്‍. 10 വര്‍ഷത്തെ പ്രണയത്തിന് ശേഷമാണ് ഇരുവരും വിവാഹിതരാകാന്‍ പോകുന്നത്. സിഖ്-ക്രിസ്ത്യന്‍ ആചാരപ്രകരമായിരിക്കും രാജസ്ഥാനിലെ ഉദയ്പൂരില്‍ വിവാഹം നടക്കുക എന്നാണ് വിവരം.
എന്നാല്‍ തപ്‌സിയുടെ വിവാഹത്തിന് ബോളിവുഡില്‍ നിന്നും ആര്‍ക്കും ക്ഷണമില്ല. തപ്‌സിയുടെയും മത്യാസിന്റെയും കുടുംബാംഗങ്ങള്‍ മാത്രമാകും വിവാഹത്തില്‍ പങ്കെടുക്കുക. വിവാഹം ബോളിവുഡ് ഷോയായി മാറ്റാന്‍ താല്‍പര്യമില്ല അതുകൊണ്ടാണ് താരങ്ങളെ ഒന്നും ക്ഷണിക്കാതെ തപ്‌സി വിവാഹത്തിന് ഒരുങ്ങുന്നത്.
മാര്‍ച്ച് അവസാനമായിരിക്കും വിവാഹം നടക്കുക. തന്റെ പ്രണയത്തെ കുറിച്ച് തപ്‌സി അടുത്തിടെ തുറന്നു പറയുകയും ആര്‍ക്ക് വേണ്ടിയും ആ ബന്ധം ഉപേക്ഷിക്കാന്‍ തയാറല്ലെന്നും തുറന്നു പറഞ്ഞിരുന്നു. ബോളിവുഡിലെ ആദ്യ സിനിമ ‘ചാഷ്‌മേ ബദ്ദൂര്‍’ ചെയ്ത സമയത്താണ് താന്‍ മത്യാസിനെ കണ്ടുമുട്ടിയത് എന്നും തപ്‌സി പറഞ്ഞിരുന്നു.
”അന്നുമുതല്‍ ഞാന്‍ ഒരേ വ്യക്തിയോടൊപ്പമാണ്. അവനെ ഉപേക്ഷിക്കുന്നതിനോ മറ്റാരുടെയോ കൂടെ ആയിരിക്കുന്നതിനോ എനിക്ക് ചിന്തകളൊന്നുമില്ല, കാരണം ഈ ബന്ധത്തില്‍ ഞാന്‍ വളരെ സന്തുഷ്ടയാണ്” എന്നായിരുന്നു തപ്‌സി പറഞ്ഞത്.