രണ്ട് ദിവസം കൊണ്ട് 100 കോടി ക്ലബ്ബില്‍ കയറി സല്‍മാന്‍ ഖാന്-കത്രീന കൈഫ് ചിത്രം ‘ടൈഗര്‍ 3’. നവംബര്‍ 14ന് റിലീസ് ചെയ്ത ചിത്രം ആഘോഷമാക്കിയാണ് പ്രേക്ഷകര്‍ സ്വീകരിച്ചിരിക്കുന്നത്. മനീഷ് ശര്‍മ്മ സംവിധാനം ചെയ്ത ചിത്രത്തില്‍ ഇമ്രാന്‍ ഹാഷ്മിയാണ് വില്ലന്‍. ചിത്രത്തിലെ ഷാരൂഖ് ഖാന്റെ കാമിയോ റോളിന് അടക്കം നിറഞ്ഞ കൈയ്യടികളാണ് ലഭിക്കുന്നത്.
ഇതിനിടെ ചിത്രത്തിലെ താരങ്ങളുടെ പ്രതിഫലത്തുകയാണ് ശ്രദ്ധ നേടിക്കൊണ്ടിരിക്കുന്നത്. ചിത്രത്തില്‍ ഏറ്റവും കൂടുതല്‍ പ്രതിഫലം വാങ്ങുന്ന താരം സല്‍മാന്‍ ഖാന് തന്നെയാണ്. നൂറ് കോടി രൂപയാണ് ചിത്രത്തിനായി സല്‍മാന്‍ വാങ്ങുന്നത്. വില്ലന്‍ കഥാപാത്രമായി എത്തിയ ഇമ്രാന്‍ ഹാഷ്മിയുടെ പ്രതിഫലം 8 കോടി രൂപയാണ്.
നായിക കത്രീന കൈഫിന്റെ പ്രതിഫലം 15 കോടിക്കും 21 കോടിക്കും ഇടയിലാകും എന്നാണ് റിപ്പോര്‍ട്ടുകള്‍. കത്രീനയുടെ പ്രതിഫലത്തുകയെ സംബന്ധിച്ച കൃത്യമായ കണക്കുകള്‍ പുറത്തെത്തിയിട്ടില്ല. ദീപിക പദുകോണ്‍, ആലിയ ഭട്ട്, കത്രീന കൈഫ് എന്നിവരാണ് ബോളിവുഡില്‍ ഏറ്റവും കൂടുതല്‍ പ്രതിഫലം വാങ്ങുന്ന നായികമാര്‍.
മൂന്ന് പേരുടേയും പ്രതിഫലം 15 കോടിക്ക് മുകളിലാണ്. അതേസമയം, ടൈഗര്‍ 3 എത്തിയ തിയേറ്ററുകളില്‍ പടക്കം പൊട്ടിച്ച് ആരാധകര്‍ ആഘോഷിച്ച സംഭവം വിവാദമായിരുന്നു. തിയേറ്ററിനകത്ത് പൂത്തിരി കത്തിച്ചും പടക്കം പൊടിച്ചുമായിരുന്നു ആരാധകരുടെ ആഘോഷം.
ഈ സംഭവത്തില്‍ പ്രതികരിച്ച് സല്‍മാന്‍ ഖാന് രംഗത്തെത്തിയിരുന്നു. ”ടൈഗര്‍ 3 പ്രദര്‍ശനത്തിനിടയില്‍ തിയേറ്ററിനകത്ത് പടക്കം പൊട്ടിച്ചതായി ഞാന്‍ കേട്ടു. ഇത് വളരെ അപകടകരമാണ്. മറ്റുള്ളവരെയും നമ്മളെതന്നെയും അപകടത്തിലാക്കാതിരിക്കാം. സുരക്ഷിതരായിരിക്കൂ” എന്നായിരുന്നു സല്‍മാന്‍ ഖാന് സോഷ്യല്‍ മീഡിയയില്‍ കുറിച്ചത്.