ബോളിവുഡില്‍ ഏറെ ചര്‍ച്ചയായ വാര്‍ത്തയായിരുന്നു അധോലോകനേതാവ് ദാവൂദ് ഇബ്രാഹിമിന്റെ പാര്‍ട്ടിയില്‍ നടിയും എഴുത്തുകാരിയുമായ ട്വിങ്കിള്‍ ഖന്ന നൃത്തം ചെയ്തിട്ടുണ്ട് എന്നത്. കരിയറിന്റെ തുടക്കകാലത്ത് ദാവൂദ് ഇബ്രാഹിമിന്റെ പാര്‍ട്ടിയില്‍ നടി നൃത്തം ചെയ്തു എന്ന വാര്‍ത്തകളായിരുന്നു എത്തിയത്.
തന്റെ പേരില്‍ പ്രചരിക്കുന്ന ഈ വ്യാജ വാര്‍ത്തയ്‌ക്കെതിരെ പ്രതികരിച്ചിരിക്കുകയാണ് ട്വിങ്കിള്‍ ഇപ്പോള്‍. വ്യാജ വാര്‍ത്തകളെ കുറിച്ച് സംസാരിക്കവെയാണ് തന്റെ പേരില്‍ പ്രചരിച്ച പഴയ സംഭവത്തെ കുറിച്ച് ട്വിങ്കിള്‍ സംസാരിച്ചത്.
”നിരവധി വ്യാജ വാര്‍ത്തകള്‍ നാം കണ്ടിട്ടുണ്ട്. മുമ്പൊരിക്കല്‍ ദുബൈയിലെ ദാവൂദിന്റെ പാര്‍ട്ടികളില്‍ ഞാന്‍ നൃത്തം ചെയ്തിട്ടുണ്ടെന്ന് ഒരു മുഖ്യധാരാ ടെലിവിഷന്‍ ചാനലില്‍ വാര്‍ത്ത വന്നു. ഗുസ്തി മത്സരം കാണുന്നതിന് തുല്യമാണ് എന്റെ നൃത്തമെന്നാണ് കുട്ടികള്‍ പോലും പറയുന്നത്.”
”ഒരു കാര്യം വാര്‍ത്താ ചാനലുകള്‍ അറിഞ്ഞിരിക്കണം, ദാവൂദ് കൂടുതല്‍ വിദഗ്ധരായ കലാകാരന്മാരെ തിരഞ്ഞെടുക്കുമെന്ന്. ഇത് വ്യാജ വാര്‍ത്തകളുടെ ലോകമാണ്” എന്നാണ് ട്വിങ്കിള്‍ ഖന്ന പറയുന്നത്. ട്വിങ്കിള്‍ ഖന്നയുടെ ഭര്‍ത്താവും നടനുമായ അക്ഷയ് കുമാറും ഈ വിഷയത്തില്‍ ഒരിക്കല്‍ പ്രതികരിച്ചിരുന്നു.
അധോലോക നായകന്‍ നടത്തിയ പാര്‍ട്ടികളില്‍ തന്റെ ഭാര്യ പങ്കെടുത്തുവെന്ന വാര്‍ത്ത അസത്യമാണ് എന്നായിരുന്നു നടന്‍ പറഞ്ഞത്. ട്വിങ്കിള്‍ ഖന്ന ബോളിവുഡില്‍ തിളങ്ങി നില്‍ക്കുമ്പോഴാണ് നടന്‍ അക്ഷയ് കുമാറുമായുള്ള വിവാഹം. ആരവ് കുമാര്‍, നിതാര എന്നിവരാണ് ഇവരുടെ മക്കള്‍.