സ്ത്രീകള്‍ ഇറക്കം കുറഞ്ഞ വസ്ത്രം ധരിക്കുന്നതില്‍ ഭര്‍ത്താക്കന്‍മാരെ കുറ്റപ്പെടുത്തുന്ന പ്രസ്താവന നടത്തിയ നടി സന ഖാനെതിരെ രംഗത്തെത്തി സോഷ്യല്‍ മീഡിയയില്‍ സെന്‍സേഷനലായ ഉര്‍ഫി ജാവേദ്. നിങ്ങളുടെ പുതിയ വസ്ത്ര ധാരണ ചോയ്‌സ് കാരണം നിങ്ങള്‍ അവര്‍ക്ക് മുകളിലാണെന്ന് സ്വയം കരുതരുതെന്ന് ഉര്‍ഫി പറഞ്ഞു.
നിങ്ങള്‍ മറ്റ് സ്ത്രീകളെ ഇടിച്ച് താഴ്ത്തുന്നു, നിങ്ങളുടെ പുതിയ വസ്ത്ര ധാരണ ചോയ്‌സ് കാരണം സ്വയം അവര്‍ക്ക് മുകളിലാണെന്ന് കരുതുന്നു. നിങ്ങളുടെ ചോയ്‌സുകള്‍ വ്യത്യസ്തമായ ചോയ്‌സുള്ള മറ്റുള്ളവരില്‍ നിന്നും നിങ്ങളെ വലിയ ആളാക്കുന്നില്ല.
നിങ്ങളുടെ വസ്ത്രധാരണത്തില്‍ മറ്റ് സ്ത്രീകള്‍ക്ക് നിങ്ങളെ ആക്ഷേപിക്കാം. എന്നാല്‍ ഞങ്ങളത് ചെയ്യുന്നില്ല. നിങ്ങള്‍ക്ക് ഇഷ്ടമുള്ള വസ്ത്രം ധരിക്കണമെന്നും അതിന്റെ പേരില്‍ ജഡ്ജ് ചെയ്യരുതെന്നും ഉണ്ടെങ്കില്‍ അതിന് മറ്റ് സ്ത്രീകള്‍ക്കും അവകാശമുണ്ട്- ഉര്‍ഫി ജാവേദ് വ്യക്തമാക്കി.
ഇറക്കമില്ലാത്ത വസ്ത്രം ധരിക്കാന്‍ ഭാര്യമാരെ അനുവദിക്കുന്ന പുരുഷന്‍മാരെ തനിക്ക് മനസിലാകുന്നില്ലെന്നാണ് കഴിഞ്ഞ ദിവസം ഒരു ചാറ്റ് ഷോയില്‍ സന ഖാന്‍ പറഞ്ഞത്. ഭര്‍ത്താക്കന്‍മാര്‍ക്ക് ഇതില്‍ എങ്ങനെ അഭിമാനിക്കാനാകുന്നു എന്നതില്‍ തനിക്ക് അത്ഭുതം തോന്നുന്നെന്നും സന ഖാന്‍ പറഞ്ഞു.