ഷാരൂഖ് ഖാന്‍ തന്റെ ഭര്‍ത്താവിന് നല്‍കിയ വാക്ക് പാലിക്കണമെന്ന ആവശ്യവുമായി അന്തരിച്ച ഗായകന്‍ ആദേഷ് ശ്രീവാസ്തവയുടെ ഭാര്യയും നടിയുമായ വിജയ്ത പണ്ഡിറ്റ്. സംഗീതജ്ഞനായ തന്റെ മകന് അവിതേഷ് ശ്രീവാസ്തവയ്ക്ക് സിനിമയില്‍ അവസരം നല്‍കണം എന്നാണ് വിജയ്ത ഒരു അഭിമുഖത്തില്‍ ആവശ്യപ്പെട്ടിരിക്കുന്നത്.
എന്റെ മകന് സിനിമാ മേഖലയില്‍ നിന്ന് പിന്തുണയോ മാര്‍ഗനിര്‍ദേശമോ ലഭിക്കുന്നില്ല. ആദേഷ് ഇന്ന് ഇല്ലെന്ന് ഇന്‍ഡസ്ട്രിയില്‍ ഉള്ളവര്‍ക്ക് അറിയാം. അദ്ദേഹം മരണക്കിടക്കയില്‍ ആയിരുന്നപ്പോള്‍ ഷാരൂഖ് ഖാന്‍ അദ്ദേഹത്തെ കാണാന്‍ വരാറുണ്ടായിരുന്നു. അദ്ദേഹത്തിന് അന്ന് സംസാരിക്കാന്‍ പോലും കഴിയാത്ത അവസ്ഥയായിരുന്നു.
അദ്ദേഹം ഷാരൂഖിന്റെ കൈയില്‍ പിടിച്ച് ‘എന്റെ മകനെ നോക്കണം’ എന്ന് ആംഗ്യത്തിലൂടെ പറഞ്ഞിരുന്നു. എനിക്ക് ഇപ്പോള്‍ ഷാരൂഖിനെ ബന്ധപ്പെടാന്‍ കഴിയുന്നില്ല. അദ്ദേഹം എന്റെ മകന് നല്‍കിയ നമ്പര്‍ പ്രവര്‍ത്തനരഹിതമാണ്. ഷാരൂഖ് എന്റെ ഭര്‍ത്താവിന്റെ നല്ലൊരു സുഹൃത്ത് ആയിരുന്നു.
ഞങ്ങള്‍ക്ക് താങ്കളെ ഇപ്പോള്‍ ആവശ്യമുള്ള സമയമാണ്. എന്റെ മകനെ നിങ്ങള്‍ സഹായിക്കണം. എന്റെ മകനാണ് എന്റെയും കുടുംബത്തിന്റെയും ഭാവി. ഞാന്‍ ഇപ്പോള്‍ ഒന്നും സമ്പാദിക്കുന്നില്ല. ഷാരൂഖ് ഖാന്‍ ഇന്ന് വലിയ താരമാണ്. എന്റെ സഹോദരങ്ങളും ഷാരൂഖിന്റെ കരിയറില്‍ സുപ്രധാന പങ്കുവഹിച്ചിട്ടുണ്ട്.
ഷാരൂഖിന്റെ സൂപ്പര്‍ ഹിറ്റ് സിനിമകളില്‍ അവര്‍ സൂപ്പര്‍ഹിറ്റ് ഗാനങ്ങള്‍ ഒരുക്കി. ഷാരൂഖിന്റെ വിജയത്തില്‍ എന്റെ സഹോദരങ്ങള്‍ പ്രധാന പങ്കുവഹിച്ചു, ഇതെല്ലാം പരിഗണിച്ച് എന്റെ കുടുംബത്തിനായി എന്തെങ്കിലും ചെയ്യണം എന്നാണ് വിജയ്ത പണ്ഡിറ്റ് ആവശ്യപ്പെട്ടിരിക്കുന്നത്.
