കഴിഞ്ഞ ദിവസമായിരുന്നു ബോളിവുഡ് താരം സൊനാക്ഷി സിന്‍ഹയുടെയും നടന്‍ സഹീര്‍ ഇഖ്ബാലിന്റെയും വിവാഹം. രജിസ്റ്റര്‍ വിവാഹത്തിന് ശേഷം ഇരുവരും അടുത്ത സുഹൃത്തുക്കള്‍ക്കും കുടുംബാംഗങ്ങള്‍ക്കും പാര്‍ട്ടിയും ഒരുക്കിയിരുന്നു. ഏഴ് വര്‍ഷത്തെ പ്രണയത്തിന് ശേഷമാണ് ഇരുവരും ഒന്നിച്ചത്.
എന്നാല്‍ സഹീറുമായുള്ള വിവാഹത്തിന് ആദ്യം സൊനാക്ഷിയുടെ കുടുംബം എതിര്‍പ്പ് പ്രകടിപ്പിച്ചിരുന്നു. എന്നാല്‍ ഏക മകളുടെ വിവാഹത്തില്‍ അച്ഛന്‍ ശത്രുഘ്നന് സിന്‍ഹയും അമ്മ പൂനം സിന്‍ഹയും ദേഷ്യമെല്ലാം മാറ്റിവെച്ച് പങ്കെടുത്തു.
രജിസ്റ്ററില്‍ ഒപ്പ് വച്ച ശേഷം ശത്രുഘ്നന് സിന്‍ഹയുടേയും പൂനത്തിന്റേയും കാല്‍ തൊട്ട് വണങ്ങുന്ന സഹീറിന്റെ വീഡിയോയും സോഷ്യല്‍ മീഡിയയില്‍ വൈറലായിരുന്നു. തന്റെ കുടുംബത്തെയും സഹോദരങ്ങളെയും കുറിച്ച് മുമ്പൊരു അഭിമുഖത്തില്‍ സൊനാക്ഷി പറഞ്ഞ കാര്യങ്ങളാണ് ഇപ്പോള്‍ ശ്രദ്ധ നേടുന്നത്.
സൊനാക്ഷിയുടേത് രാമായണത്തില്‍ നിന്നും പ്രചോദനമുള്‍കൊണ്ട കുടുംബമാണ് എന്ന് സംവിധായിക ഫറാ ഖാന്‍ പറഞ്ഞപ്പോഴാണ് കുടുംബവുമായി ബന്ധപ്പെട്ട കൗതുകകരമായ ആ കാര്യം സൊനാക്ഷി വെളിപ്പെടുത്തിയത്. ”എന്റെ വീടിന്റെ പേര് രാമായണം എന്നാണ്. അച്ഛന്റെ പേര് ശത്രുഘ്നന് സിന്‍ഹ.”
”അദ്ദേഹത്തിന്റെ സഹോദരങ്ങള്‍ രാം, ലക്ഷ്മണ്‍, ഭരത്. തീരുന്നില്ല, എന്റെ സഹോദരന്മാരുടെ പേര് ലവ്, കുശ്” എന്നാണ് സൊനാക്ഷി പറഞ്ഞത്. അതേസമയം,ബോളിവുഡിലെ താരവിവാഹങ്ങളില്‍ നിന്നും വ്യത്യസ്തമായി ലളിതമായിട്ടായിരുന്നു സൊനാക്ഷിയുടെയും സഹീറിന്റെയും വിവാഹം.
സൊനാക്ഷിയുടെ സഹോദരങ്ങളായ ലവ് സിന്‍ഹയും ഖുശ് സിന്‍ഹയും വിവാഹത്തില്‍ പങ്കെടുത്തില്ലെന്ന റിപ്പോര്‍ട്ടുകള്‍ പ്രചരിച്ചിരുന്നു. എന്നാല്‍ ഇക്കാര്യത്തില്‍ വിശദീകരണവുമായി ഇരുവരും രംഗത്തെത്തിയിരുന്നു. താന്‍ ചടങ്ങുകളില്‍ പങ്കെടുത്തിട്ടുണ്ടെന്നും കുടുംബത്തെ സംബന്ധിച്ച് സെന്‍സിറ്റീവ് ടൈം ആണെന്നും ഖുശ് വ്യക്തമാക്കി. ലവ് സിന്‍ഹയും ഇന്‍സ്റ്റഗ്രാം സ്റ്റോറിയിലൂടെ പ്രതികരിച്ചിട്ടുണ്ട്.