ആമിര്‍ ഖാന്റെയും കിരണ്‍ റാവുവിന്റെയും വിവാഹമോചന വാര്‍ത്തകള്‍ക്ക് പിന്നാലെ നടി ഫാത്തിമ സന ഷെയ്ഖിന്റെ പേരാണ് ട്വിറ്ററില്‍ ട്രെന്‍ഡിംഗ് ആകുന്നത്. പതിനഞ്ച് വര്‍ഷത്തെ ദാമ്പത്യ ജീവിതം അവസാനിപ്പിച്ചാണ് ആമിറും കിരണും വിവാഹമോചിതരാകുന്നത്.
ഫാത്തിമ സന ഷെയ്ഖുമായുള്ള ആമിറിന്റെ പ്രണയമാണ് കിരണുമായുള്ള വിവാഹമോചനത്തിലേക്ക് എത്തിച്ചത് എന്നാണ് റിപ്പോര്‍ട്ടുകള്‍. ബാലതാരമായി സിനിമയില്‍ എത്തിയ ഫാത്തിമ ആമിര്‍ ഖാന്റെ ദംഗല്‍ എന്ന സൂപ്പര്‍ ഹിറ്റ് ചിത്രത്തിലൂടെയാണ് നായികയായി അരങ്ങേറ്റം കുറിച്ചത്.
ദംഗലിലൂടെ ഏറെ ശ്രദ്ധേയായ ഫാത്തിമ ആമിറിനൊപ്പം തഗ്‌സ് ഓഫ് ഹിന്ദുസ്ഥാന്‍, അനുരാഗ് ബസുവിന്റെ ലൂഡോ എന്നീ സിനിമകളിലും മികച്ച വേഷങ്ങളില്‍ എത്തി. ആമിറിന്റേയും സനയുടേയും ഒരുമിച്ചുള്ള ചിത്രങ്ങള്‍ പങ്കുവെച്ച് ട്വിറ്ററില്‍ ആശംസകള്‍ ഉള്‍പ്പെടെ പങ്കുവയ്ക്കുകയാണ് പലരും.
മുമ്പ് ഇരുവരും തമ്മിലുള്ള പ്രണയ വാര്‍ത്തകള്‍ പ്രചരിച്ചപ്പോള്‍ ഫാത്തിമ ഗോസിപ്പുകളെ തള്ളിയിരുന്നു. ആമിറിന് തന്റെ ജീവിതത്തിലുള്ളത് വലിയ സ്ഥാനമാണെന്നും താരം പ്രതികരിച്ചിരുന്നു. ആമിറിന്റെ വിവാഹമോചനത്തോടെ ഇരുവരും തമ്മില്‍ പ്രണയത്തിലാണെന്ന തരത്തില്‍ വീണ്ടും ചര്‍ച്ചകള്‍ സജീവമായിരിക്കുകയാണ്.